Presentazion

Cul Decret dal President de Zonte de Regjon Autonome Friûl-Vignesie Julie dai 6 di novembar dal 1996, daûr dal art. 13 de L.R. 15/96, la lenghe furlane e à vût la sô grafie uficiâl. E je stade sielzude la propueste di grafie decretade ai 15 di lui dal 1986 dal Consei de Provincie di Udin, in cunvigne cu lis Provinciis di Gurize e di Pordenon. La grafie e je stade elaborade dal prof. Xavier Lamuela, incaricât de stesse Provincie, su indicazion de Comission pe grafie istituide a chel fin. La Comission e veve cjapade in esam la cuistion tal so complès e e veve fatis diferentis propuestis di presentâ al prof. Lamuela, che al veve di fâ une sielte par rivâ a un sisteme coerent plui che al jere pussibil. La Comission e jere componude di chescj membris: Adrian Cescje (president), Silvana Fachin Schiavi, Giovanni Frau, Amedeo Giacomini, Aldo Moretti, Gianni Nazzi, Etelredo Pascolo, Nereo Perini, Giancarlo Ricci, Piera Rizzolatti e Eraldo Sgubin.
Il prof. Lamuela al sielzè un sisteme grafic cjapant a riferiment chel doprât de Societât Filologjiche Furlane, elaborant intal stes moment une propueste leade a un model di lenghe normalizade, chê de tradizion leterarie dal Friûl centrâl, o lenghe comune.
Daspò dal Decret dai 6 di novembar 1996, l'Osservatori Regjonâl de Lenghe e de Culture Furlanis e la Societât Filologjiche Furlane, inte sierade dal 1997, a àn cjatât un acuardi suntune modifiche dal sisteme decretât pe sostituzion dal digrame «ts» in inizi e in cuarp di peraule cul segn «z», e pal ûs dal segn «q» intai toponims o antroponims storics tant che «Aquilee» o «Quarin». Il sisteme grafic uficiâl de lenghe furlane, cun cheste modifiche, al è stât votât inte vierte dal 1998 tant che emendament de L.R. 15/96 dal stes Consei de Regjon. Cun chest at la lungje cuistion de grafie de lenghe furlane e je sierade e cumò i Furlans di ogni dontri a àn l'imprest par scrivi la lôr lenghe par judâle a cressi e a rinfuarcîsi.
Al è dal sigûr impuartant che i Furlans a conservin la lôr fevele locâl, la lôr variante, intai rapuarts informâi o pe espression poetiche, ma ancjemò plui impuartant al è che a imparin a doprâ la lenghe comune massime intai rapuarts formâi, intal scrivi, pe prose e pai messaçs che a àn par destinatari ducj i Furlans.

L'Osservatori de lenghe e de culture furlanis