1 | 2 | 3 | 4 | 5 | 6 | 7 | 8 | 9 |

[ECONOMIE]

Martars ai 9 di Fevrâr, si presente la riviste “Multiverso”, publicade de “Forum editrice universitaria udinese”. A 18.30 li dal teatri “San Giorgio” di Udin, a cjacararan dal ultin numar, intitulât “Crac” e curât di Andrea Csillaghy e di Francesco Marangon, Cristiana Compagno, Gianpiero Dalla Zuanna, Gian Paolo Gri, Laila Wadia e Marco Breschi. Riccardo Maranzana e Serena Di Blasio a proponaran une leture sceniche di “Troppo straniera” di Laila Wadia.

[ECONOMIE]

Lis 3 associazions de cooperazion sociâl furlane e triestine – “Agci-Solidarietà”, “Federsolidarietà-Confcooperative” e “Legacoopsociali” – a spietin di podê incuintrâsi cul president de Regjon Renzo Tondo par disberdeâ i problems dal setôr e par confrontâsi sul ordin dal dì dal consei regjonâl votât a la fin di an passât. In zornade di vuê, lis cooperativis sociâls in Friûl e a Triest a son 200, cun 9 mil socis lavoradôrs, comprendûts un miâr di lavoradôrs “svantaggiati”.

[ECONOMIE]

Il president de associazion taliane pe agricolture biologiche “Aiab”, tal editoriâl dal notiziari informatic “Bioagricoltura Notizie” (An VIII, numar 4, ai 5 di Fevrâr dal 2010), al judiche la sentence dal Consei di stât su la possibilitât di semenâ blave “ogm”. Tal articul “Libertà di contaminarci?”, Andrea Ferrante al scrîf: «L’Italia, con le eccezioni di Confagricoltura e Federalimentare, ha scelto per il proprio modello agricolo di essere libera da Ogm: questa è politica agraria e non ha niente a che fare con la libertà individuale». Par “Aiab”, la clape di Pordenon “Futuragra” (www.futuragra.it/), ch’e à otignût il parê favorevul de Consulte, no pues rivendicâ il derit de libertât individuâl parcè che «ovunque si è seminato si è dimostrato che la coesistenza fra Ogm e Bio è impossibile» e duncje semenâ “Ogm” al scancelarès il derit di fâ agricolture biologiche.

[SCUELE]

Dai 8 di Fevrâr ai 3 di Març, scuelârs e insegnants de provincie di Udin a son invidâts a visitâ la mostre “H2Ok”, inmaneade dal “Cevi” par presentâ il derit a l’aghe e lis cuistions leadis cu la gestion globâl e locâl de aghe. La mostre e je vierte di 8.30 a 12.30 e dopomisdì “a richiesta”, li dal Missionaris saverians di strade Monte San Michele, a Udin.

[CONVIGNIS]

Un an di lavôr daprûf dal proget “Una mappa per Godo” al ven presentât martars ai 9 di Fevrâr, li dal centri culturâl de frazion di Glemone, a 21. L’apontament al cole di chê strade di san Valantin, ch’al è protetôr di Gôt.

[LIBRIS]

Il saç di Miklav Komelj su lis letaris ineditis di Tina Modotti, ch’al à recuperât tai archîfs de Republiche di Slovenie daspò 70 agns, al è publicât, in esclusive pa l’Italie, de riviste “Perimmagine”. Il studi al presente documents scrits di Parîs de Modote e di Vittorio (Toio) Vidali ai amîs di Mosche e di Vidali a Ivan (Matteo) Regent, dopo de muart de fotografe rivoluzionarie udinese (www.friul.net/dizionario_biografico.php).

[LIBRIS]

Martars ai 9 di Fevrâr, la Biblioteche civiche di Udin e organize la presentazion de conte “Dove danzavano le streghe” di Gabriella Chmet. A 18 te sale Ajace dal Cumon (place Libertât) a intervegnin Silvio Cattalini e Romano Vecchiet.

[SCUELE]

I students des scuelis superiôrs di Tumieç, sabide ai 13 di Fevrâr, a fasin il “Torneu scuelastics di scas 2010”. Lis partidis a tacaran a 8.15 li dal institût “Candoni”. Martars ai 9 e joibe ai 11 di Fevrâr, li dal institût “Solari”, a 14 a vegnaran proponudis dôs lezions su lis “Aperture” te partide taliane e in chê spagnule. Te organizazion, a son ingaiâts i professôrs di ginastiche.

[CINE]

Il documentari di Gloria De Antoni e di Oreste De Fornari “La città di Angiolina - Trieste ai tempi del film Senilità”, produsût de “Cineteche dal Friûl”, martars ai 9 di Fevrâr, al ven proietât li dal cine “Sociale” di Glemone (a 21), cul film di Mauro Bolognini “Senilità” (a 19). A presentin Livio Jacob e Carlo Gaberscek. Fra i protagoniscj dal documentari Claudia Cardinale, Philippe Leroy, Piero Tosi, Claudio Magris, Tullio Kezich e Lelio Luttazzi.

[MOSTRIS]

Li dal Museu cjargnel des arts e des tradizions popolârs di Tumieç, di chê strade de cope europeane di schi par pidimentâts (programade sul Çoncolan dai 11 ai 14 di Fevrâr), e je imbastide une mostre di dissen e di fotografie. Inamneade dal ”Sci Club Due” di Monfalcon, l’esposizion e propon oparis dai fruts des scuelis de regjon su la disabilitât e su “Lo sci speciale” dai fotografs Andrea Carloni e Pino Marcuzzi.