I PAÎS DE PATRIE | Dizionariut toponomastic

I nons dai paîs tes lenghis de regjon

Gjavâts chei ch'a son rivâts par ultins, in regjon o vin ducj sanc miscliçât, ducj o vin scoltât o cjacarât plui di une lenghe, ducj o vin gjoldût de ricjece che nus an stramandât i nestris vons.
Tant e tant no sin bogns di doprâ simpri cun precision ducj i 4 regjistris lenghistics regjonâi, cu la ricjece ferbint dai tancj dialets ch'a diamantin lis 4 lenghis. S'o vin di doprâ i toponims, massime di vilis e paîs, dispès o sin cjamâts di scrupui parvìe de storie balarine de regjon e di sieltis dai nons dispès fatis di diletants o ancje di professioniscj par resons nazionalistichis o par imposizions politichis inicuis, che si sono stratificadis di ogni bande, massime de metât dal Votcent in ca. O bramarès che, bandonâts i confronts polemics dal passât, ducj o podessin usâsi a doprâ cun comprension mutuâl e rispiet i nons juscj che cualchidun si è proponût di proferînus cun comprension mutuâl e rispiet.
Ogni non al à la sô storie e la sô divignince che s'insede intune suaze storiche e lenghistiche precise. Un grum di nons, po, a an lidrîs cetant plui antighis des 4 lenghis modernis che vuê a regnin chenti. Ma ducj i nons a an riferiments plurilengâi precîs, che nus pandin assendencis, tradizions e particularitâts ricjis di storie. Cundiplui, ogni lenghe e ogni dialet a an la sô individualitât musicâl, ch'e rapresente une ricjece ulteriôr de regjon.
O pensi dispès al gno basavon Carlo Bortolotti di Damâr=Amaro, emigrant te prime metât dal Votcent par fâ il sartôr sot de marine militâr a Pula=Pola e che si sposà a Dignan d'Istrie=Dignano d'Istria=Vodnjan, a so fi Luigi ch'al nassè là, ma ch'al cjatâ di lavorâ a Monfalcon=Trzič na Gorenjskem=Neumarktl, a so fie Rine, mê mari, ch'e rivà a Triest=Trieste=Trst=Tri´est, dulà ch'e maridà un triestin sloven cu lis lidrîs sul Cjars=Carso=Kras=Karst e te valade de Vipau=Vipacco=Vipava=Wippach ... Chel chi al è il gno tesaur personâl.
"La Patrie dal Friûl" e à dât dongje nons ch'a jerin stâts publicâts za inaltrò, proferint pal ûs lis formis plui justis tes 4 koinès lenghistichis regjonâls. Ancje chest al è un sistem par cognossisi miôr e par podê rispietâsi di plui un cul altri. Al mancje ancjemò un grum di lavôr par sclarî il significât dai nons, toponim par toponim, e la lôr storie. Ma intant chest dizionari cuadrilengâl al rapresente une fonde preciose par une coabitazion e convivence pacifiche e profitevul.

Pavle Merkù