Friûl.net

Il Consorzi privât dai antîcs origjinaris di Gjiviano dal 1980 e an scuignût passâ lis brenis a la ministrazion comunâl di Rigulât, ma cu la specificazion: «par cont de frazion di Gjiviano». Ûs civics, duncje, o ben frazionâi, cemût che si vûl clamâju. Cheste situazion e à durât fin tal 1924, cuant che il guvier fassist al à imponût il belanç unic. Ma cun dut a chel, dal 1927, cui vuadagns dai Ûs civics a è stade realizade la gnove scuele, il gnûf acuedot e la pedrade dilunc il paîs. Finide la vuere dal ’40-’45 e lât jù il guvier fassist, Gjiviano al si è apelât al Comissari dai Ûs civics, in chê volte a Vignesie, che, viodudis lis buinis resons, al à tornât ce che ai ere stât cjolt al paîs. Tal mês di Novembar dal 1963, a è stade concedude la complete separazion dai bens frazionâi. Intal libri storic de canoniche di Gjiviano al è scrit (voltât dal talian): «il Comissari dai Ûs civics di Triest a nol à crodût oportun di adivignî ae concession dal belanç separât, come che al ere prin de unificazion, ma al à ordenât la complete separazion dai bens frazionâi di Gjiviano e de lôr separazion de Ministrazion comunâl di Rigulât». Ai 8 di Decembar di chel an a son stadis fatis lis primis elezions. E an votât 130 abitants su 195. Cussì si è lâts indenant fin tal 1984, cuant che par mancjance di votants, che a vevin di jessi residents, la ministrazion a è passade a un comissari nomenât di Udin, par passâle daspò a la Ministrazion comunâl di Rigulât. Ma, al è impuartant specificâlu, Gjiviano a nol à pierdût nissun derit, no son i Ûs civics ch’a son passâts a Rigulât, come che purtrop tante int a crôt, ma nome la ministrazion. E i ministradôrs e an il compit di ministrâju par cont de frazion di Gjiviano.
E cui ch’al à provis che la situazion no sedi cussì che si fasi indenant. Al à coventât dut chest par rivâ ae situazion de strade par Gjiviano. Lis dôs Culinos, ancjemò dal 1910, cui bêçs dal lôr bosc, e an fate la lôr strade dal Fulìn, che passant par Tors e va a rivâ inte statâl alajù de galarie par For. Dal 1916, la strade militâr ch’e va sù in Crostis a si è cjapade intar chê strade dal Gravon e a ven sù viers Gjiviano fin a Plan des Clâs, dulà ch’i clamin dal Volton. Alfìn, dal 1921, al è stât fat l’ultin toc par rivâ in paîs, in part cun finanziaments pai dams di vuere (chê strade – al va notât – a va sù, de galarie fin inte alte mont, dut sul teritori dai Ûs civics) e in part dal Comun di Rigulât. Poben, i prins 300 metros di chel toc al è ancjemò tâl e cuâl chel dal 1921, un metro plui strete dal rest (il prin toc 4, il secont 3 e po 3,50 e il toc da Culino 4) e nome cumò ch’e stave par franâ si è proviodût a trapanâ e a meti uns cetancj tubos e lis tabelis, daspò 80 agns di pericul e di strade strete e di lavôrs in cors. A è sacrosante veretât che tar un toc par dongje il paîs par 60 metros al è stât fat un lavôr che al è nome di laudâ in dutis lis manieris, fate ancje in prospetive, largje 5 metros. Ma bastiel cussì? Cumò finalmentri nus an fat savê che a son a disposizion une grampe di euros ch’a rivaran apenis par blecâ sù a la miôr ce ch’al podeve sei fat agnorums indaûr. Jo no pues dî nuie, che no soi nissun. Cuant ch’o ai fate cualchi domande mi an rispuindût cussì: «Tu, se tu vûs dî alc, presentiti candidât, se tu vegnis votât bon, se no tu âs nome di tasê». Democrazie, po! Alore i lassi la peraule a Gjiviano che, cemût, ch’o vin viodût al à ducj i derits par pratindi ce ch’al è just. E Gjiviano al dîs cussì: «Jo no domandi ni 200 ni 2 milions di euros. Jo o pratint che la mê strade e sei fate dilunc come chê ch’e va dal For a Culino.
I miei antenâts a si son risiervâts chê part dal gno bosc pes mês dibisugnis. Cumò jo o ai streme bisugne par doi motîfs: un parcè ch’al è just che daspò 80 agns a vegnin cjolts provediments necessaris, secont parcè che al pont ch’i sin, al è il plui impuartant mieç par fâmi tornâ a vivi. Ce vuelial dî: “Salviamo la montagna”? O sai che mi vegnarà metût sul plat la mancjance di mieçs e al è par chest che o soi ca par dâus la soluzion; che si vierzi un mutuo poiât sul gno bosc par integrâ ducj i eventuâi contribûts ch’a son simpri benvignûts. Facil, no?». Sperìn che cheste a no resti letare muarte e ch’a vebi il seguit just. Une detule a dîs: «Vôs di mus no va in cîl». A mi mi bastarès ch’e ledi ben ben plui in jù...