Friûl.net

O proponìn l’articul publicât ai 24 di Fevrâr dal cuindisinâl “il Diari” su la gnove situazion de Lagune di Maran, dopo che il Cumon (nocate la difide di Co.Mo.Bi.M.) al à stabilît di concedi a une associazion temporanie d’imprese la permission di arlevâ caparots te proprietât coletive de Comunitât di Maran.

“Une svoltade tal cors de storie”: cussì al è stât piturât ce che al è sucedût a Maran ai 27 di Zenâr. In chê dì, il sindic Mario Cepile al à tignût di voli ae firme de concession che i permet ae associazion temporanie di imprese impastanade de cooperative Almar Acquacoltura Lagunare Marinetta, de societât consortîl Molluschicoltura Maranese e de Cooperativa Pescatori San Vito di arlevâ caparots in siet cent etars di lagune maranese, escludint ogni altri pescjadôr.
Pe firme a jerin stâts invidâts il ministri des politichis agrariis e alimentârs, Luca Zaia, e l’assessôr regjonâl aes risorsis agriculis e alimentârs, Claudio Violino, ma in plui dai firmataris (al ven a stâi il responsabil dal procediment, Stefano Zampar, il president di Almar, Jean Marc Rossetto, e de Coop San Vito, Achille Ghenda, puartevôs di dusinte cincuante socis) si è presentade dome la diretore dal servizi regjonâl pescje e agheculture, Marina Bertotto.
Seont i promotôrs de svoltade, la rivoluzion che il sisteme des concessions al smire di legalizâ al è il passaç de racuelte spontanie dai caparots (e, plui in gjenerâl, de pescje “in libero accesso”) ae “venericoltura” e, duncje, al arlevament programât di Tapes philippinarum (che par talian e sarès la “vongola verace filippina”).
A son passe dîs agns che il setôr cooperatîf de agheculture, in convigne cul comun e cu la regjon, al sburte al viers di cheste bande, partint dal principi che il setôr de pescje tradizionâl al sarès “in declino”.
Lant di cheste bande, seont il sindic Mario Cepile, e varès di cressi la ocupazion (intune prime fase i pescjadôrs impleâts a varessin di jessi sù par jù cent e cincuante) e sore il dut al varès di finî, “garantint sigurece su lis formis, i timps e lis cuantitâts di caparots pescjâts te lagune, un timp di anarchie e di conflits sociâi”. “Lassant là i aspiets economics – al à ancje declarât il dean di Maran –, il business dai caparots al tornarà a dâur unitât e serenitât a dute la int dal paîs”.
Ma la sielte dal “business dai caparots” e cheste direzion no son condividudis piç di une part numerose de int di Maran, che in chescj agns a àn operât mediant de Comunità di Marano (www.comunitadimarano.it) e dal consorzi pe gjestion de pescje dai moluscs “bivalvi” te lagune di Maran Co.Mo.Bi.M.
La prime e conteste il progjet pal fat che e riten la lagune une proprietât coletive dai maranês, che no à nuie ce fâ cul demani maritim assegnât dal stât ae regjon e nancje cuntun presumût ûs civic che il comun al pretindarès di aministrâ in dite dai citadins.
Pe lagune maranese par altri, no si pues, seont la Comunità, cjacarâ di pescje “in libero accesso” (cemût che a fasin ancje publicazions uficiâls come Il programma Sfop 2000-2006 per la pesca e l’acquacoltura nella regione Friuli V. G.), stant che par secui i maranês a àn gjestît e difindût in mût esclusîf il lôr patrimoni naturâl cun tecnichis e regulis ecosustignibils, prin ancjemò che cheste impostazion e deventàs patrimoni des politichis statâls e internazionâls.
Che anzit, al ven calcolât paradossâl che chei istès pescjadôrs che, fint in zornade di vuê, a àn curât come proprietaris il lôr patrimoni, cumò par vuadagnâsi il pan a varessin di deventâ dipendents di realtâts economichis vignudis di fûr.
Ancjemò plui ferbint al è il riviel dal consorzi Co.Mo.Bi.M., che al è intervignût prin de firme de concession cuntune difide. Pal president Emilio Driussi, ai 27 di Zenâr nol è stât rispietât il dirit esclusîf di pescje dai titolârs dal dirit civic e si à procedût cuntune espropriazion. La firme de concession, tant e tant, e sarès dome l’ultin di une schirie di abûs, començâts cu la apropriazion de bande de regjon dal dirit di proprietât su la lagune.
Ma Driussi al bat ancje su la cuistion dai caparots naturâi che a vivin za tai siet cent etars di lagune concedûts dal comun. “Di cui sono? Dal sigûr no dai concessionaris, che a a scuegnin ancjemò semenâ i lôr, ma ben dai citadins di Maran”, che duncje a varan di jessi rifondûts. “Considerant une rese prudenziâl di trê chilos di caparots par metri cuadrât e une vendite pal so mancul a doi euros al chilos, a risultin 42 milions di euros. Cui isal che al vûl regalâ chest patrimoni coletîf e parcè?”.
Daûr dai conflits e de anarchie che al cjacare il sindic, seont Driussi, a son cuistions une vore plui penzis, stant che l’espropriazion de lagune e sarès dome la prime cundizion par realizâ altris progjets “come i 25mil puescj di barcje tes lagunis di Maran e di Grau, il progjet turistic sponsorizât Lega Coop dal Albergo diffuso e lis cassis di incolmade (a presi di dusinte e trente milions di euros) necessariis par discjamâ i pantans dai dragaçs”.