Friûl.net

Forsit al sarès il câs di modificâ il I articul de Costituzion, chel ch’al dîs che la Republiche taliane e je fondade sul lavôr. In realtât al semee che il lavôr plui grant e plui continuatîf lu vedin i scrutadôrs e i presidents des sentis eletorâls e la int, clamade, daspò des votazions politichis e ministrativis, a palesâ la propie adesion o la propie contrarietât a la riforme costituzionâl buride de Cjase de libertât sot la bachete magjiche e mediatiche di Berlusconi. I citadins plui sensibii e plui rispietôs des struturis puartantis de res publica e des esigjencis sacrosantis de legalitât e dal sens dal stât a invidin a meti un biel “no” su la schede referendarie, parcè che si trate di une riforme sbalade tal contignût e tal mût che e je stade puartade indenant. Un contignût disorganic e un mût che nol à nuie ce spartî cu la coralitât e la condivision che e à fat di scune al test fondant de nestre replubliche, tal rispiet de diviersitât des scuelis di pinsîr e des sensibilitâts politichis dal moment. Une coralitât e une unitât che a van recuperadis e rispietadis ogni volte che si met man a un istitût di fonde come chest.
O sin rivâts a un pont tâl di invelegnament e di imbarbariment de politiche che no si rive a cjatâ un sbit di convergjence su nuie e dut ce che si cîr di fâ, ancje in buine fede e cu lis intenzions plui onestis e seriis, al ven viodût e vivût dal bloc contrari come un atentât e un delit. La prove le vin denant dal vôi. Cuant che la çampe e à proponût di modificâ la Costituzion in sens plui federâl, la gjestre e à berlât al tradiment, come che a vessin metude une bombe disintegrant. Invezit al jere un prin pas, ancje se incomplet. Po e je rivade la volte de gjestre, sburtade e ricatade de Leghe di Bossi cu la sô devoluzion, sostitutive de prime propueste ben plui radicâl de secession. A chest pont la marce funebre le àn sunade e le sunin i gnûfs parons dal vapôr, rissolûts a disfâ midiant referendum popolâr il mâl fat. Par ironie, la çampe, che e varès di jessi rivoluzionarie, e dîs che la Costituzion nassude de resistence no si po tocjâle e la gjestre, che e varès di jessi reazionarie o consevadorie, si bat pal gambiament. Une inversion o perversion che e met in lûs la confusion e l’ideologjie che e regne tai palaçs dal podê e, di riflès, tal cjâf de int. Che e je tentade di mandâju a trai e di ritirâsi tune posizion di indiference cualuncuistiche, une malatie serie pe societât e mortâl pe democrazie. Parcè che e vierç la strade a l’anarchie o a la ditature.
Chei che si cjapin l’incarighe prestigjose e lucrose de militance politiche e de responsabilitât publiche a varessin di tignî presint che no si va in parlament o in senât par fâi dispiet a di chel che no le pense come me e a doprâ il timp, lis energjis e lis strategjiis par fâsi la forcje un cul altri. La int no ju vote e no ju manten par che si gjavin i vôi o si robin il pagnut fra di lôr ma par che a lavoredin pal ben di ducj. La funzion de maiorance, par chel ch’al vinç ancje se di pôc, no je di spesseâ a disfâ dut ce ch’a àn fat chei di prime, ma di viodi ben ce che si po salvâ, ce che si po miorâ e possibilmentri presentâ un progjet plui organic e ben fat. Che nol sucedi come in cualchi part dal mont, che, par butâ jù il “fascio” a àn butade jù ancje la scuele o, par rusin cuintri i colonizadôrs, a àn sdrumadis lis fabrichis. E l’oposizion e à di criticâ e sburtâ la maiorance a jessi di peraule cun ce che e à imprometût e a controlâ che a fasin lis robis par ben, no a meti ogni sorte di stralenc par paralizâ la vite publiche e invelegnâ la vite sociâl.
Ma prin di dut e sore dut si à di vê un grant sens etic de politiche, viodude e vivude come servizi e caritât e no come grepie par rifâsi di une fan trascurade. Ce ch’al mancje in Italie, là che la serietât, la severitât, l’etiche a semein eresiis e ingjenuitâts. Si sint simpri di plui chest vueit di moralitât, come che si sint la mancjance di un sens civic di partignince e di coresponsabilitât. I scandui tes bancjis e tal balon a son spieli di un cuarp malât, che nol à cuintricuarps. A cent e passe agns da l’unitât o unificazion, l’Italie e je plui dividude, spartide, separade, cuintriponude di prime. Ognun par cont so e ducj cuintri ducj. Forsit parcè che e mancje la robe plui impuartante: un progjet. Ognun al va indenant metint un blec ca e un blec là. Po al rive un altri e al sposte i blecs e in’ met di altris. Cul risultât che il vistît al è ancjemò di finî e nô o sin ducj arlechins e imblecâts.
Se la Costituzion e je la fonde de nestre esperience e convivence republicane, e va rispietade e metude in vore come dutis lis realtâts fondantis. No si po gambiâle a sorte, a caprici, a ricat, a dispiet. No si po gambiâle se no si à za clâr il mût di gambiâle. No par indebolîle, ma par rinfuartîle. No par butâle fûr di cors, ma par rindile plui adate a lis mutazions che a vegnin in ogni societât e sore dut in chescj timps di mobilitât acelerade. In chest sens o disìn che la Costituzion e va modificade, parcè che la situazion nazionâl e internazionâl e je gambiade e la sensibilitât de int e lis sôs esigjencis a son difarentis di 60 agns indaûr. La Costituzion no je une mumie ma un cuarp vîf. E à di tignî sù l’Italie dal tierç milenari e nus covente une Costituzion moderne, adeguade, vive e vitâl. Se, come che si prosum, il referendum al scancelarà lis contradizions e lis incongruencis dal progjet de Cjase de libertât, no si varà di pierdi un moment par rivâ, tune convergjence il plui possibil largje e armoniche, a la vere riforme costituzionâl che nus covente, a une Italie federâl, cun division clare des competencis e des funzions, che e comedi i dams di chê vision centralistiche e nazionalistiche che nancje la resistence no à savût parturî. E chest si à di fâlu no cun improvisazions e colps di cjâf o di man o cun ricats, ma lant a viodi i stâts socialmentri e politicamentri plui indenant, là che il federalisim nol à paralizât e penalizât lis cualitâts civichis e morâls de int ma al à savût meti a profit lis lôr cualitâts plui bielis, tune gare positive e benefiche di emulazion in alt e no in bas. Di chei che a paventin la balcanizazion dal stivâl, o rispuindìn che i stâts plui organizâts e produtîfs a son chei a struture federâl. Parcè che la diviersitât e je une des grandis e ultimis risorsis di chest mont simpri plui vualivât e mortificât.