Friûl.net

Si po scrupulâ che Vladimir Putin nol podès fâ altri che ce ch’al à fat, di front al at azardôs dal terorisim cecen ch’al veve secuestrât 800 spetadôr tun teatri di Mosche, ai 23 di Otubar, e che par 3 dîs al veve menaçât di fâ un macili e slargjât un sens di angosse in dute la Russie.
In face a chestis disfidis, il stât nol po che preservâ se stes, cence cediments di sorte. Nol po vê rimession e inciertecis, al scugne jessi violent e rindût s’al vûl salvâ no dome i citadins inocents che il terorisim al dopre come scûts, ma la propie stesse vocazion a pupilâ e a mantignî il “contrat sociâl”. Valadì che l’assalt dai reparts speciâi dal ministeri dal interni tal teatri di strade Melnikova e je la conseguence di dut chest, e l’operazion e sarès stade un sucès se nol fos par chel gâs doprât par vinci la resistence dal comant cecen e ch’al à copât, parie ai 50 teroriscj, ancje 90 dai lôr presonîrs. Dut câs la pagjine ch’e je stade scrite a Mosche e je scure e no promet nuie di bon. E sierf e je vere a unificâ il front mondiâl metût sù cuintri il terorisim, e inmò a infuartî e a incressi i podês e i mieçs dai aparâts poliziescs dai guviers menaçâts. E sierf a creâ l’inmagjin dominant ch’e olme chest scomençâ di secul, daspò la fin des ideologjiis: l’inmagjin di un terorisim globâl, ch’al dopre la fede musulmane come arme e come disfide al Ocident capitalist, dissolût e infedêl. Ma al sierf ancje a straviâ la realtât, a militarizâ l’art de pulitiche, a dâ di viodi che cheste ultime e à pierdût ogni gnerf, ogni autonomie, ogni capacitât di dâsi leçs che no sedin chês dal svindic e de punizion violente.
Il gnûf ordin mondiâl al riscje di jessi, magari cussì no, propite chest: a la pâs e a la pulitiche e va cjapant la volte une militarizazion dal mût di pensâ e di compuartâsi ch’e tint a vuaianûs ducj sot un unic emblem ch’al è stât batiât cul non di “III vuere mondiâl cuintri il terorisim islamic”. In sumis l’integralisim religjôs e la militarizazion de politiche a fasin tra di lôr un pat: il pat de vuere fra lis culturis. Aduncje il nimì dal indipendentisim cecen nol è Putin il politic, il gnûf “zar di Mosche”.
Al è Putin esponent de fede cristiane e cuintri di lui l’Islam al è clamât a batisi. Pal maiorent rus, inscuelât a so timp a la militance dal ateisim marxist, chest al è dibot un onôr, viodût che la realtât e je invezit ben divierse, ossei ch’al è imberdeât tune ordenarie e sanganose vuere colonialiste. Lis particularitâts locâls e nazionâls a van cussì a dispierdisi tal limbo mediatic di une globalizazion santificade de violence.
Lis aspirazions legjitimis d’indipendence dai popui minoritaris e des nazions dineadis a son paradis in fruçons di chest Moloch che dut al glot e che dut al stramude: il Moloch di un terorisim ch’al à podût aleâsi cu la mobilitazion cuintriteroriste e che cussientementri al ven clamât aes armis par scancelâ ogni rasonevul distinzion tra vueris justis e vueris injustis. In cheste maniere si gjave ogni sperance a cui che, in buine fede, al à crodût di scombati cuintri lis opressions e lis colonizazions. No dome: di fat si stan deresponsabilizant i colpevui di chestis opressions e colonizazions - come il guvier rus justeapont, tal câs dal atac al teatri di strade Melnikova - inludintsi che a traviers il terôr a puedin jessi indusûts a cjapâ cussience dai erôrs e a mendâsi.
Che cheste teorie e meni fûr di troi al è dimostrât dal fat che il terôr cuintri i civîi e la vuere dal Islam “kamikaze” a àn deresponsabilizât Sharon in Israêl, tant di permetii di refudâ lis richestis sacrosantis d’indipendence e autoguvier ch’a divegnin dal popul palestinês tai teritoris ocupâts. Ma inmò piês in Russie, te vuere de Cecenie che Putin al à tornade a inviâ sul scomençâ de sô cariere, te Sierade dal ’99: une brute vuere di distermini, cetant piês di chê che i israelians a stan puartant indenant in Palestine cuintri un terorisim che si pant simpri plui determinât e disperât. In ogni câs i acjadiments sucedûts te capitâl de federazion russe a son la cjosse piês ch’e podès capitâur al popul cecen e ai siei partesans: l’azion dai teroriscj tal teatri plen di citadins e met sul stes plan i 11 di Setembar di New York e i 23 di Otubar di Mosche, e cussì e messede ce che nol varès di jessi messedât.
Fintremai za fa cualchi mês il conflit puartât indenant des fuarcis armadis russis e jere une vuere platade: tignude lontane dai media, dai zornâi, de stesse opinion publiche russe, dal dut divierse de vuere puartade dai israelians tai teritoris ocupâts. Par un esempli des azions militârs di Saharon tal cjamp dai sfolâts palestinês a Jenin o vìn savût dut.
La Cecenie e je invezit une realtât sparniçade di centenârs di Jenin, ducj reâi, ducj clupîts. Ma cumò di vuere scuindude e dismenteade, la vuere cecene e je diventade une vuere «bandide». Vuere d’indipendece che nome cualchi inriducibil idealist al varà cûr inmò di difindi, in non dai derits fondamentâi dal om e dai popui, come chel primari da l’autodeterminazion e cuintri la menace, unevore probabil, di un gjenocidi.