[POLITICHE]

Martars ai 5 di Setembar, il president de Zonte provinciâl di Bozen nol sarà a Trent dulà che la Regjon Trentin-Alt Adis e intint di memoreâ il compatât dal 1946 Degasperi-Gruber, ch’al à definît i confins fra Italie e Austrie daspò de seconde vuere mondiâl, confermant la division dal Tirol fra i doi Paîs. «A Trent no voi parcè che la ceremonie noaltris le fasarìn chi – al à declarât Luis Durnwalder, ch’al è puartevôs de “Svp” –. E je une biele disference fra cemût ch’a intindin di celebrâ lôr e noaltris. A Trent o crôt ch’a intindin di fâ fieste. Noaltris, impen, no vin nuie ce fiestezâ».

[POLITICHE]

I “Schützen” dal Sud Tirol, vie pe gnot dai 2 di Setembar, a an protestât pa l’“autodeterminazion dineade”. Ai 5 di Setembar, difat, al cole il cjadalan dal compatât Degasperi-Gruber, ch’al à confermât l’anession dal Sud Tirol a l’Italie. Sul confin cul Trentin un miâr di personis a an impiât passe 136 fugarilis. I “Schützen” sudtirolês, ai 9 di Setembar, a organizaran un’altre convigne dedicade a la cuistion: “60 agn di autodeterminazion dineade”.

[POLITICHE]

Dal I di Setembar e je in vore la riforme federâl de Gjermanie, votade de coalizion fra Democrazie cristiane e Socialdemocratics guidade di Angela Merkel. La plui grande riforme constituzionâl todescje dal 1949 incà e à svilupât lis competencis dai Länder e limitâts i podês di “veto” dal “Bundesrat”, il parlament des Regjons.

[POLITICHE]

Dutis lis fameis di Tei, di Cintel, di Merizi, di Ovaredo e di Perarut, vie pal mês di Avost, a an vût fra man l’ultin volantin dal Comitât pro Friûl (0421 706651), dulà che si denuncin lis manovris politichis par dineâ la volontât popolâr di mudâ Regjon (911 eletôrs a an votât di “sì” intal referendum dai 26 e dai 27 i Març, a pet dai 145 vôts pal “no”). Il Comitât al conteste la decision de ministrazion di no frontâ in consei comunâl une discussion sul referendum e al denuncie la volontât dai sorestants venits d’imbastî la gnove Provincie San Donà-Puart.

[POLITICHE]

Sabide ai 16 di Setembar, la clape dai sindics de riconstruzion e propon une convigne par rifleti sun “Int e instituzions tal taramot”. Lis voris a tachin a lis 9 li dal cjiscjel di Udin.

[POLITICHE]

Il conseîr comunâl di Majan, Christian Romanini, ai 29 di Setembar, al domandarà al so consei d’impegnâsi par proponi che Giuseppe Zamberletti, comissari strasordenari dal guvier daspò dal taramot dal 1976, al sedi nomenât senadôr in vite, pai siei merts civîi e pal impegn pandût in chê volte cun grande passion e competence. Daspò dai 29 di Setembar, un ordin dal dì cun chê propueste al girarà par ducj i Comuns dal Friûl, par prudelâ la propueste.