[POLITICHE]

La Cjase pa l’Europe di Glemone e presente la traduzion par latin e par furlan de seconde part de Constituzion europeane. A cjacararan dal argument il vicjari gjenerâl de Glesie udinese, mons. Giulio Gherbezza, e il diretôr dal setemanâl “ilNuovo Fvg”, Mauro Tosoni. Vinars ai 2 di Decembar, a lis 18 li dal municipi di Glemone.

[POLITICHE]

Guvier e Parlament no vuelin la constituzion de gnove Provincie “San Donà-Puart” che un scjap di sorestants venits al volarès imponi par contrastâ la volontât furlaniste dal Mandament di Puart. Te leç finanziarie, discutude dal Parlament, no son stâts previodûts i 105 milions di euros che i senadôrs Falcier, Basso e Crema a bramavin pal lôr progjet.

[POLITICHE]

Di chê strade dal cjadalan de Declarazion universâl dai derits dal om, dai 8 ai 11 di Decembar il Coordenament regjonâl dai ents locâi pe pâs al organize une schirie di apontaments a Gurize, Gradiscje Imperiâl e Sacîl. Il program complet al è disponibil tal lûc internet: www.cevi.coop, par cure dal Centri di volontariât internazionâl di Udin.

[POLITICHE]

«Fâ deventâ Vignesie-Mestre la citât-Regjon dal Venit e dal Nordest, dal moment che altris citâts dal gjenar cassù no ’nd è». Al è l’obietîf che il filosof Massimo Cacciari al smire di rivâ intant dal so mandât di sindic di Vignesie. Cu la cuistion al à tornât a cjapâ flât il discors su la “macroregjon” dal Nordest, ch’al sgrisule cetancj di lôr e ch’al domande di disbratâ l’intric de “governance”. Il mensîl di Pordenon “Il Momento” al à stiçât il dibatiment, marcant che «Pordenon, Udin e Triest no puedin stâ a cjalâ sul barcon».

[POLITICHE]

«Insiemit par difindi il nestri avignî»: cun chest invît, il Coordenament tra i Comitâts cjargnei pe protezion dal ambient al propon une gnove manifestazion popolâr cuintri dai eletrodots e des gjavis. L’apontament al è stabilît a lis 20 di vinars ai 16 di Novembar, devant dal dom di Tumieç. Un corteu cun sindics, plevan, fuarcis politichis e economichis al partissarà di li par rivâ fin là dal auditorium dulà che si fasarà un dibatiment «par resonâ sul nestri futûr».

[POLITICHE]

Te riforme regjonâl des autonomiis locâls il Friûl nol à acet. L’emendament ch’al domandave la possibilitât di meti sù la “Samblee dal Friûl” par permeti il confront dai Conseis provinciâi di Gurize, di Pordenon e di Udin su lis cuistions instituzionâls, culturâls, economichis e sociâls comuns al è stât ignorât (a an votât 35 conseîrs su 60) e po boçât (in 11 a an votât di “Sì” e 24 di “No”).

[POLITICHE]

Ai 15 di Decembar, dome 11 conseîrs regjonâi su 60 si son inschiriâts de bande dal Friûl, domandant l’instituzion de “Samblee dal Friûl” par permetiur a lis Provinciis furlanis di frontâ intune lis cuistions comuns. Ve la note dai conseîrs favorevui: Alessandra Battellino, Fulvio Follegot, Claudio Violino, Maurizio Franz, Alessandra Guerra, Roberto Molinaro, Gina Fasan, Virgilio Disetti, Paolo Menis, Bruno Di Natale e Paolo Ciani.

[POLITICHE]

«Al è un fat che il Teatri stabil dal Friûl-V. J., ch’al è logât a Triest e che il so president al è parfin nomenât dal sindic de citât juliane, al è pardabon pôc atent a la produzion in lenghe furlane e ancje pôc atent a la promozion des culturis regjonâls»: lu à declarât ai 21 di Decembar il sotpresident dal grop consiliâr de “Margherita”, Giancarlo Tonutti, comentant la boçadure dal ordin dal dì ch’al domandave l’impegn de Regjon par meti sù il “Teatri stabil furlan”. Tonutti si console marcant che, in dut câs, la cuistion e je stade pandude e che pal avignî si domandarà «l’instituzion a Udin di une sezion in lenghe furlane dal Teatri stabil regjonâl».