[INFORMAZION]

Ancje in consei regjonâl, e je rivade la denuncie pal «pressapochismo linguistico» di “Rai Triest”. L’ultin scandul ch’al à sburtât il conseîr Giancarlo Tonutti a presentâ un’interogazion al è capitât ai 28 di Mai, cuant che i zornaliscj triestins a àn let par francês il non dal mulin di Merêt di Tombe, ch’al è deventât «mulen de marscè» impen di Mulin di Marchet. Tonutti al domande s’al è chest il mût di rispietâ il contrat di servizi fra “Rai” e Regjon, ch’e pae salât par che il furlan al sei promovût. «No saressial il câs – al domande il sorestant codroipin – che almancul cualchidun dai zornaliscj nol frecuenti un cors di geografie e di lenghis regjonâls?».

[INFORMAZION]

L’editôr anglês “Multilingual Matters”, specializât in cuistions lenghistichis, al à dât fûr il volum “Minority Language Media: Concepts, Critiques and Case Studies”, par cure di Mike Cormack e di Niamh Houri. Il libri al proferìs i studis di 14 specialiscj sui “media minoritaris”.

[INFORMAZION]

Il Centri di studi pai popui mençâts di Florence al segnale lis ultimis publicazions periodichis su lis nazions cence stât da l’Europe. A son saltâts fûr il numar 22 di “Bretons” (www.bretons-mag.com); il numar 14 di “Cornish Studies” (www.institutes.ex.ac.uk/ics), il numar 5 di “European Yearbook of Minority Issues” (www.brill.nl; www.ecmi.de; www.eurac.edu) e il numar 2 di “Nationalities Papers” (www.nationalities.org).

[INFORMAZION]

Al saltarà fûr in curt il secont numar dal mensîl bilengâl talian-chinês “Il Nostro giornale”, nassût par cure de clape “Forum Iulii”, ch’e opere par slargjâ pal mont la culture dal Friûl e di Triest, e dal editôr Penta Graph. Il fin dal sfuei, direzût di Alsessandro Di Giusto, al è chel di favorî l’integrazion fra comunitât chinese e furlans.

[INFORMAZION]

Cul numar di Jugn, al à finît un an “…Sconfinare” il periodic dât fûr de Associazion dai students di siencis internazionâls e deplomatichis di Gurize, cul jutori dal Consorzi universitari gurizan e dal “Erdisu” di Triest. Il sfuei, ch'al è direzût di Annalisa Turel, al à une part par talian e une par sloven.