[GLESIE FURLANE]

Par dut il mês di Avost, la Comunitât di Maran e celebre la “Triennale” in onôr de Madone de salût. Il prin apontament al sarà la “Zornade votive” cul transpuart de statue de Madone te glesie parochiâl, lunis I di Avost a 20.15. La prucission pe lagune e colarà lunis ai 15 di Avost, screade dai gjespui a 17.30. Tal indoman, ai 16 di Avost, e sarà cjantade messe par ducj i emigrants, a 10. A 18 di domenie ai 28 di Avost, la statue e tornarà li dal santuari.

[GLESIE FURLANE]

Vinars ai 5 di Avost, si scree un altri bocon dal proget “Una Bibbia a cielo aperto” di Çurçuvint. Il vescul di Udin Andrea Bruno Mazzocato al benedissarà la “Via della Misericordia”. La ceremonie e tacarà a 20.30 li de plêf di San Martin. Daspò de liturgie, a 21.15, si distaponaran lis gnovis oparis dilunc strade Cjabie.

[GLESIE FURLANE]

Ai 6 e ai 7 di Avost, la “Polse di Côugnes”, daprûf de plêf di San Pieri di Zui, e propon la convigne ecumeniche anuâl. Intant dai confronts, de preiere e des convignis, si frontarà la cuistion: “Una diversità riconciliata: la Chiesa di Gesù Cristo”. Fra i protagoniscj, al sarà il teolic riformât Paolo Ricca, che a 14.30 di sabide ai 6 di Avost, al cjacararà su “L’Universo della Riforma: il suo dono alla Chiesa di Cristo” e po, a 17.30, al guidarà un confront su “La spiritualità ecumenica come stile di vita”. La convigne e larà indevant fin domenie a 18, cuanch’e sarà cjantade messe li de plêf.

[GLESIE FURLANE]

Maria Luisa Candotti, pal impegn tal camp spirtuâl, Marco Marra, pal impegn tal camp artistic, e Paolo Agostinis, pal impegn tal camp sociâl e umanitari, sabide ai 6 di Avost, a ricevaran il “Baston di San Pieri”. Il premi al è stât inmaneât de Fraterne dal Spirtussant di San Pieri in Cjargne par valorizâ i cjargnei ch’a son daûr a lassâ une olme su la strade de «caritât spirtuâl, culturâl e sociâl» e al sarà assegnât a 17 li de Plêf di Zui.