[GLESIE FURLANE]

E je rivade in Friûl il I di Jugn la delegazion francese di Montcuq-Saint Gènies guidade dal vescul di Cahors e di un dissindint de famee dal patriarcje Beltram par cjapâ part a lis celebrazions in onôr dal sant vescul. Sabide ai 2 di Jugn i piligrins francês a cjaminaran su lis stradis segnadis dal cjaluni di Tolose Clément Tournier tal libri “Le Voyage en Frioul”. Domenie ai 3 di Jugn a saran a lis 10 li de gleseute di San Nicolau di San Zorç de Richinvelde pe eucaristie in memorie di Beltram, tal lûc là che ai 6 di Jugn dal 1350 al fo sassinât de nobiltât furlane.

[GLESIE FURLANE]

Domenie ai 3 di Jugn, lis Glesiis des valadis de Tor e dal Cuarnap si dan dongje a Montevierte/Viskuorsa pe bussade des crôs, li dal santuari de Trinitât. A lis 11 al cjantarà messe il plevan Bruno D’Andrea, compagnât de corâl Vizont-Cjalminis; a lis 16 e tacarà la ceremonie de bussade des crôs cui vicjaris foraniâi di Nimis, mons. Rizieri De Tina, e di Tarcint, mons. Duilio Corgnali. La glesie de Trinitât e je calcolade la mariglesie des comunitâts de Sclavanie furlane e de valade slovene dal Lisunç.

[GLESIE FURLANE]

Une gnove opare e presente la figure dal sant capucin Marc di Davian. Le an scrite Venanzio Renier e Giuliana Fantuz che le an intitolade “Marco d’Aviano e Innocenzo XI in difesa della cristianità” (“Segno”, 2007). Il religjôs furlan al è nassût a Davian tal 1631, frari dal 1648 e predi dal 1655, al fo un dai protagoniscj de difese di Viene des armadis turchis di Kara Mustafa Pasha. Cuant che Zuan Pauli II lu à beatificât tal 2003, lu à piturât tant che «profete cence armis de misericordie di Diu» e difensôr de libertât e de unitât da l’Èurope cristiane.

[GLESIE FURLANE]

Sabide ai 9 di Jugn, la Glesie gurizane e celebre la samblee diocesane dai catechiscj. La convigne e je stabilide a lis 15 li dal auditorium Fogar di Gurize. E vegnarà frontade la cuistion: “Dutrine, afetivitât, educazion a la sperance”.

[GLESIE FURLANE]

Ai 9 e ai 16 di Jugn a colin i ultins 2 apontaments dal prin cicli di lezions dal cors sul cristianisim in Aquilee e in Friûl, par cure de Biblioteche dal ’seminari di Udin, dal InStitût di siencis religjosis e dal Ufici scuele diocesan di Udin. Lis lezions a van des 15 a lis 18, li de Biblioteche in viâl Ongjarie. Il secont cicli al partissarà tal mês di Otubar (ai 6 e ai 20 e po ai 3 e ai 17 di Novembar).

[GLESIE FURLANE]

Dai 14 ai 20 di Lui, la sezion gurizane dal “Unitalsi” e organize il piligrinaç diocesan a Lourdes, guidât dal arcivescul Dino De Antoni. Lis inscrizions a vegnaran acetadis fint ai 21 di Jugn. Vie pal 2007, l’“Unitalsi” dal Friûl orientâl al organizarà ancje piligrinaçs a Lorêt (28 di Lui-I di Avost) e a Fatime (apontament regjonâl cul tren; 17-25 e 20-24 di Otubar).

[GLESIE FURLANE]

Dai 15 ai 21 di Jugn, l’icone di Taizé, ch’e compagne dutis lis convignis internazionâls de comunitât ecumeniche francese (www.taize.fr), e je in Friûl. Vinars 15 e compagnarà il piligrinaç di San Zuan di Manzan viers la badie di Rosacis cu la zoventût de foranie e lis glesiis evangjeliche-metodiste, ortodosse e pentecostâl (a lis 20). Sabide 16 a lis 20.30 e sarà a Madone di Mont/Stara Gora par une vegle li dal santuari. Joibe 21 a lis 20.30 a Torean di Martignà, la comunitât “Emet” e propon un incuintri di preiere e di riflession par ducj.

[GLESIE FURLANE]

A son 30 agn de “Samblee dai cristians pe riconstruzion e pe rinassince dal Friûl”. La grande convigne gleseastiche, volude dal vescul Alfredo Battisti, dai 17 ai 19 di Jugn dal 1977, e butà lis fondis par une riconstruzion cu l’anime dal Friûl taramotât e e tornà a bati su la necessitât da la partecipazione popolâr in dutis lis sieltis strategjichis sul avignî de regjon.

[GLESIE FURLANE]

Li de badie carintiane di Millstatt, sabide ai 23 di Jugn, i cristians des Glesiis di Udin, di Lubiane e di Gurk-Clanfurt si dan dongje pal Piligrinaç dai 3 popui. A lis 10.30 i vescui a cjantaran messe grande, impensantsi dai 25 agn dal apontament internazionâl metût sù pal prin viaç dai vescui Fredo Battisti, Alojs Sustar e Egon Kapellari.

[GLESIE FURLANE]

A Madone di Mont, sabide ai 23 di Jugn a comencin ju apontaments di culture e di spiritualitât pal Istât 2007. A lis 20.45 li de plaçute dal poç, Luigi Maieron al presentarà il spetacul “Il vangelo secondo Marco”. Chei altris apontaments a son stabilîts pai 30 di Jugn (“Storie di angeli, storie di uomini”, cun “NSTrings”) e pai 6 di Lui (“Storie d’amore” cu la corâl Coceancigh di Diplis di Premariâs). Dutis lis seradis des sabidis dai mês di Lui e di Avost, i fraris di Madone di Mont a vierzaran la glesie dal santuari pe preiere e pe riflession da lis 21 a lis 23.

[GLESIE FURLANE]

Domenie ai 24 di di Jugn, li de catedrâl di Iasi, te Moldavie rumene, a saran ordenâts predis 18 zovins. Siet di lôr a son stâts “adotâts” di Glesiis de Arcidiocese di Gurize, che dal 1998 incà e prudele cun convinzion la Glesie rumene tes sôs necessitâts spirtuâls e matereâls. In zornade di vuê i predis gnûfs adotâts tal Friûl orientâl a son 74.

[GLESIE FURLANE]

Al jere de vile dal Friûl concuardiês sot Vignesie di Sant Stin il frari capucin Giorgio Zulianello, muart in Angola tal avion colât a Mbanza Congo, ai 28 di Jugn. Il missionari furlan al lavorave dal 1972 in Afriche a pro dai “meninos feiticeiros”, al ven a stâi di chei frutins ch’a vegnin parâts vie dai lôr borcs parcè che calcolâts puartadôrs di disfortune e indemoneâts.