[GLESIE FURLANE]

Il Centri pastorâl pai cristians di lenghe slovene de Glesie gurizane, cul I di Setembar, al sarà animât di pre’ Marijan Markezic, plevan di Peume e di San Maur di Gurize. Cun lui al lavorarà il vicjari pre’ Alessio Stasi. Tai ultins 5 agn, il Centri lu an guidât i predis de Provincie slovene de Companie di Jesù.

[GLESIE FURLANE]

Domenie ai 3 di Setembar, Cividât al fâs memorie dal servizi pastorâl e culturâl dai jesuits te vile ducâl. La lôr presince e je començade tal XVII secul, ma il moment plui impuartant al è stât fra 1910 e 1915, cuant ch’a son rivâts chenti i novizis e i students di filosofie de Congregazion. Intant de convigne storiche inmaneade dal centri “Veritas” di Triest, direzût di pre’ Mario Vit, pre’ Roberto Busa, in dite de Companie di Jesù, i regalarà a la citât une copie dai “Manuscripta Forojuliensia”, 6 volums di filosofie elaborâts a Cividât dai jesuits ch’a an marcât la filosofie neoscuelastiche taliane.

[GLESIE FURLANE]

La dì de Madone di Setembar, lis Glesiis di Gurize e di Udin a celebrin i piligrinaçs anuâi a Barbane e a Madone di Mont. I piligrins udinês a partissaran a pît di Cjararie di Cividât a lis 15 di vinars ai 8 di Setembar e a lis 17.30 a cjantaran messe. Chei dal Friûl orientâl a saran guidâts dal vescul Dino De Antoni ch’al cjantarà messe a lis 10 li dal innomenât santuari su l’isule daprûf Grau.

[GLESIE FURLANE]

A Cueste di Davian, fintremai ai 17 di Setembar, par cure dal “Centri culturâl Augusto Del Noce” si podarà visitâ la mostre: “Madonna del Monte: Storia di un Santuario”.

[GLESIE FURLANE]

La Glesie filipine di Bolinao e à screât un monument in onôr dal francescan furlan Durì di Pordenon (1265-1331). Ad or dal mâr di chê isule, il sant missionari al cjantâ la sô prime messe tal teritori des Filipinis, prin di rivâ in Chine.

[GLESIE FURLANE]

Une companie di 30 predis e novizis chinês, indonesians e malês de congregazion “Dissipui dal Signôr”, vie pal mês di Avost, e à visitât lis Glesiis furlanis, visitant lûcs de vite e dal ministeri dal gardenâl Celso Costantini. Il predi concuardiês, prin di deventâ secretari de Congregazion vaticane di “Propaganda Fide”, al è stât dal 1922 al 1933 delegât apostolic in Chine, operant pal ricognossiment de culture locâl e fondant, juste 75 agn indaûr, la congregazion dai “Dissipui”. La delegazion orientâl e je stade a Cjasteons di Çopule, a Concuardie, in Aquilee e a Udin, su la tombe dal vanzelisadôr de Chine, Durì di Pordenon.

[GLESIE FURLANE]

Pre’ Franco Gismano, diretôr dal Ufici pastoral diocesan di Gurize, al è stat nomenât delegât pal Nort tal consei diretîf de Associazion teologjiche taliane pal studi de teologjie mondiâl.

[GLESIE FURLANE]

Dai 16 ai 17 di Setembar, la Glesie di Plodn/Sapade e fâs il so tradizionâl piligrinaç a Maria Luggau, començât passe 200 agn indaûr. I piligrins a partissin a lis 3 di gnot di sabide de glesie di Z’Plodn/Cime par rivâ a Luggau tor 14.15. A lis 7.45 di domenie a cjantaran messe li dal santuari carintian e po a tornaran a partî par tornâ cjase. Il piligrinaç al finìs a lis 19.30 li de glesie di Sante Margarite cul cjant dal “Te Deum”.

[GLESIE FURLANE]

Domenie ai 17 di Setembar, il Comitât di San Florean al organize a Dieç di Tumieç une convigne su “Laicitât e religjon: lis dôs reditâts dal Ocident”. A lis 16 li dal Teatritinde a intervegnin il jurist Antonio Baldassarre, il teolic Ghislain Lafont e l’atôr Moni Ovadia. La mostre “Martino”, imbastide li de Cjase des esposizions e restarà vierte fintremai ai 30 di Setembar.

[GLESIE FURLANE]

Cemût continu e miorâ il rapuart cu la Mariglesie di Aquilee? Cualis sono lis perspetivis ch’a divegnin de memorie dai sants vescui e dai paris di chê Glesie che Zuan Pauli II al à metût in zornade e ch’al à tornât a proponi cun sapience te sô visite dal 1992? A son lis cuistions che, daspò de visite pastorâl, il vescul di Gurize, Dino De Antoni, al rispuint tal so document finâl “A servizi di Crist sperance dal mont”, spedît a dutis lis Glesiis dal Friûl orientâl.

[GLESIE FURLANE]

Domenie I di Otubar, il moviment catolic “Rinovament dal Spirt” al organize a Grau, li dal “Palacongressi”, la sô convigne regjonâl. La fieste e tache a lis 8.30. A lis 16.30 al cjantarà messe il vescul di Triest, mons. Eugenio Ravignani.