[ECONOMIE]

Vinars ai 8 di Jugn, sul fuart di Osôf, l’Ecomuseu des aghis dal mandament di Glemone al invide a une convigne cu la “Associazione Friulana Olivicoltori” (“Afrol”). A 20.30, li dal ambient “La Fortezza”, si presentarà il vueli “Evo”. Tal mandament di Glemone, si prodûs ogni an 10 mil litris di vueli di ulive e la clape “Afrol” e calcole ch’a son stâts implantâts fra 10 mil e 12 mil ulîfs.

[ECONOMIE]

Ancjemò une volte, il lûc internet “Pianeta Psr”, curât dal Ministeri pes politichis agriculis, di “Ismea” e di “Crea”, al tamese il stât di aplicazion dal “Plan di svilup rurâl” tes Regjons talianis. La situazion dal Friûl-V. J. si conferme dramatiche. In cont di spese dai finanziaments europeus, il scandai “Disimpegno e riserva di performance: la corsa dei PSR italiani riparte nel primo trimestre 2018”, al denuncie: «Sul versante opposto le percentuali più basse in Italia vengono registrate purtroppo dai PSR della Liguria e Friuli Venezia Giulia con il 5% e il 6% di attuazione finanziaria». La Regjon e figure fra chês ch’a riscjin di plui il «disimpegno automatico», al ven a stâi l’oblic di tornâ indaûr bêçs se no si rivarà a spindi une percentuâl stabilide sui finanziaments imprometûts. Friûl e Vignesie Julie a fasin une figurate ancje te percentuâl di atuazion finanziarie a pet dal «target intermedio prefissato», ferme al 30%, e dal «target finanziario della riserva», sot dal 20%. L’articul complet di Luigi Ottaviani al pues jessi let su la rêt des rêts.

[ECONOMIE]

Gianni Tamino, Danilo Merz, Giancarlo Pastorutti e Emilia Accomando, vinars ai 15 di Jugn, a cjacarin a Udin su “Aggiungi un piatto a tavola.. senza Ogm e pesticidi”. La convigne e je programade a 19, li de “Sale Cgil” te strade Bassi 36, par cure dal Comitât “Stop Ttip/Stop Ceta” di Udin.

[ECONOMIE]

La Comunitât di Paulêt e à rinovât il consei di ministrazion dai Bens di Marsure. L’antighe propietât coletive e sarà ministrade di Paolo Dallagnese, president; Giuliano Ballico, sotpresident; Ginelli Specogna, Luigino Merluzzi, Giorgio Tosolini, Luciano Sebastianutto, Lorenzo Merluzzi, Edi Bazzaro e Mario Cozzi, conseîrs. Giuseppe Missana, Virgilio Strizzolo e Renzo Sebastianutto a son i revisôrs dai conts gnûfs.

[ECONOMIE]

Il Forum regjonâl pai Bens comuns e pa l’Economie solidarie al è daûr a registrâ dutis lis pratichis positivis di Economie solidarie dal Friûl e di Triest, par podê meti in vore, in curt, la leç regjonâl 4/2017. Il censiment al pues jessi fat ancje su la rêt des rêts, compilant un cuistionari adatât.

[ECONOMIE]

Il IV “Summit nazionale delle Bandiere Verdi di Carovana delle Alpi”, che vie pal 2017 al jere stât inmaneât a Rezija/Resie, chest an al rive in Lombardie. Dai 29 di Jugn al I di Lui, al sarà fat a Ornica (Bg), dulà che si frontarà la cuistion: “La gestione forestale e i servizi ecosistemici nell’economia circolare”.

[ECONOMIE]

Par cure de delegazion taliane de “Convenzion des Alps”, joibe ai 28 di Jugn, si discorarà su “La selvicoltura nelle foreste alpine - green economy e funzioni di protezione ambientale”. Il dibatiment al è programât par dute la zornade (tacant a 9), li de “Regola di Santo Stefano di Cadore”, a Sant Stiefin (strade Udin 60).