[ECONOMIE]

Il rapuart “The State of the World’s Animal Genetic Resources for Food and Agriculture” da la “Fao” al à denunciât che la menace plui grande a lis cualitâts di nemâi e dipint da l’espansion de produzion zootecniche massive. I studiâts dal argagn internazionâl a calcolin che, di 7 agns incà, ogni mês si piert une cualitât.

[ECONOMIE]

Sabide ai 7 di Lui, la rêt di Comuns “Aleance tes Alps” e fiesteze ancje in Friûl il decenâl de sô fondazion. A lis 15.30, li dal museu de centrâl di Malnîs, a Montreâl, e vegnarà fate une convigne sul svilup sustignibil e, in specialitât, su la multifunzionalitât te economie montane.

[ECONOMIE]

Ai 8 di Lui, li dal Centri di formazion forestâl di Ossiach, e je programade la Fiere dal bosc, dal len e de energjie. La fieste e rive a la XIII edizion e e je compagnade cul VIII campionât dal boschedôr de Carintie. L’Ossiacher Bildungspartnerschaft, che al organize l’apontament e ch’al è nassût tal 1953, al à formât in 50 agn di ativitât formative 160 mil personis.

[ECONOMIE]

Ai 11 di Lui, la samblee dai delegâts de Associazion dai industriâi de provincie di Udin e je clamade a votâ il gnûf president. Adriano Luci al è stât destinât dal consei diretîf a dâi la volte a Giovanni Fantoni e par chel al presenarà i siei programs pa l’incarhe e i nons dai sotpresidents.

[ECONOMIE]

Par difindi lis etichetis e garantî i compradôrs su la divignince di ce che ur tocje di mangjâ, “Coldiretti” e “Slow Food”, martars ai 17 di Lui, a organizin une convigne a Udin li de Cjamare di cumierç a lis 10. Di chê strade al sarà consegnât ancje il premi di laureade Paolo Bertoli.

[ECONOMIE]

Ai 20 di Lui, la zonte regjonâl e à fat buinis lis liniis guide pe redazion dal disen di leç ch’al varès di regolamentâ lis propietâts coletivis dal Friûl e dal Cjars triestin. Un passut viers une riforme ch’e jere stade imprometude tal imprin de legjisladure e che il popul des Tieris civichis al spiete di cuant che il Parlament al à fat bon il statût di autonomie regjonâl.

[ECONOMIE]

Si scuen notâsi dentri dai 30 di Lui ai cors di formazion sui belançs sociâi che la LegaCoop di Udin e proponarà a Udin e a Triest vie pal mês di Setembar cu ven.

[ECONOMIE]

Il mensîl da l’Associazion dai industriâi de provincie di Udin, “realtà industriale”, al à pandût ce che la Regjon e varès spindût par puartâ il Gîr d’Italie di ciclisim su la piche dal Çoncolan. Seont l’articul “Lo Zoncolan diventa leggenda”, la spese e sarès stade di 300 mil euros. Andrea Ioime nol à però sclarît trop ch’a an spindût ducj chei altris ents publics, de Provincie a la Comunitât montane, dai Comuns a la “Promotur”.

[ECONOMIE]

La “Coldiretti” e à prontât une piçule guide par savê i puescj là che i prodots agricui si puedin comprâ li dai contadins che ju produsin. L’iniziative si clame “Terramica” e si à mertât un finanziament europeu, te suage de colaborazion Italie-Slovenie. Lis ditis furlanis notadis te guide a son 2 in Cjargne, 11 tal Friûl ocidentâl, 13 in chel udinês e 6 in chel gurizan.