[DIASPORE]

Martars ai 2 di Decembar, la Cjamare di cumierç taliane pe Ongjarie organize la Cene di Nadâl par operadôrs e amîs. E tacarà a 20 li dal Institût talian di culture a Budapest (Bródy Sándor utca 8.). Pe organizazion al à colaborât ancje il Fogolâr furlan de capitâl ongjarese (pietro.vacchiano@gmail.com).

[DIASPORE]

La clape “France Frioul” di Parîs (29 rue Ordener - 75018 Paris) e organize la rapresentazion teatrâl “Come il grano tra i sassi”, par cure dal “Teatro spesso”. E vegnarà ufierte ai 7 di Decembar a 15, li de sale Saint Bruno (9, rue Saint Bruno Paris 18è).

[DIASPORE]

Joibe ai 11 di Decembar, Fondazion Crup, “Cirf” e Clape “Friûl dal Mont” a proponin un convigne su la cuistion: “Fevelâ furlan in Argjentine”. A 11 li de sede de Fondazion in vie Manin 15 a Udin, Sofia Solayne Noboa Feliz e presentarà: “Imaginis e impressions di un viaç di ricercje in Argjentine, in preparazion de tesi di lauree in Lenghis e leteraturis forestis”. La ricercjadore, dai 9 di Otubar ai 15 di Novembar, e à contatât dibot 150 fameis di emigrâts furlans di Buenos Aires, di Cordoba e di Colonia Caroya.

[DIASPORE]

L’Associação italiana de Santa Maria (Rio Grande do Sul, Brasîl), dulà ch’al colabore ancje il Circul furlan, e invide ducj i amîs par un “Filó de Natal” speciâl. Lunis ai 15 di Decembar, si daran dongje scuelârs, socis e dute la comunitât par une serade musicâl cu lis corâls “Giuseppe Verdi” e “Aabb”. Par jentrâ si varà di puartâ une guantiere di dolçs par fâ un ghiringhel in companie daspò de rapresentazion, ch’e tache a 20.

[DIASPORE]

Domenie ai 21 di Decembar, il Fogolâr di Turin si da dongje pe Messe di Nadâl. Le cjantarà te sede di cors Francia 275b a 9.45 pre’ Ermis Segatti.

[DIASPORE]

Il spetacul “Dagos. Furlans pal marimont”, ch’al unìs intune “La passione” di Mario Luzi, “Odissee” di Gian Antonio Stella, “L’America degli italiani” di Alberto Giovannetti, “Attività degli agenti di emigrazione in Friuli” di Luigi Pellegrini e il diari di Vilma Watkins, fie di furlans emigrâts in Australie, “Pukunja, un posto lontano”, al ven replicât domenie ai 21 di Decembar a 21 li dal Centri Caenazzo di Grions de Tor. La serade e je organizade de clape culturâl “Gentes”, cu la partecipazion dai artiscj Loris Vescovo, Claudia Grimaz, Natalia Molebatsiù, Leo Virgili, Simone Serafini e Nicola Tuniz.

[DIASPORE]

Al è saltât fûr il boletin de “Clape Friûl dal Mont” pal Invier 2008. Tes paginis 1 e 2, l’associazion di promozion sociâl dai emigrants tornâts in Friûl e propon i siei obietîfs: premiâ i emigrants che di passe 35 agn a vivin tal forest; creâ tai comuns clapis di “Paesans tal mont”; meti in zornade lis notis eletorâls “Aire”; ameti la possibilitât di votâ tal forest ancje pai Cumons e pai referendum; inviâ scandais sociâi e economics sui ripatriâts; svilup dai archîfs comunâi de emigrazion.

[DIASPORE]

Ancje pal guvier di Rome la Convenzion di Strasburc, ch’e smire di ridusi lis “cittadinanze plurime”, e je «anacronistiche e in contrast cul orientament des legislazions europeanis, comprindude chê taliane, dal moment ch’e pant une concezion esclusiviste de sotanance». Cussì il sotsecretari Alfredo Mantica al à pandût condivision pe propueste di denunciâ la Convenzion e di rivâ al ricognossiment de sotanance dople pai talians ch’a vivin in Europe. L’iniziative e je stade cjapade dai parlamentârs Bucchino, Farina, Fedi, Garavini, Narducci e Porta.

[DIASPORE]

Il Fogolâr di Rome al spiete dentri dai 20 di Genâr lis segnalazions di candidâts pai premis “Giovanni da Udine - Presenza friulana a Roma e nel Lazio”. L’edizion 2009 e sarà la X e e intint di celebrâ il LX di fondazion dal Fogolâr.