[MUSICHE]

La clape “a.ArtistiAssociati” di Gurize e propon, ator pal Friûl, il so “Circuito danza”. Vinars ai 5 di Decemabr apontament a 21 li dal teatri di Tisane. Sabide ai 13 li dal teatri di Cormòns. Apontaments a Cormòns ancje ai 20 di Decembar, ai 24 di Genâr, ai 15 e ai 28 di Fevrâr e ai 28 di Març. E po ai 9 di Fevrâr a Cervignan e ai 9 di Mai a Gurize (Kulturni center Bratuz).

[MUSICHE]

La clape “a.ArtistiAssociati” di Gurize e propon 3 “workshop” di bal a Udin. Il prin dai 5 ai 7 di Decembar cun Iztok Kovac di Lubiane; dai 14 ai 15 di Fevrâr cun Simona Bucci e dai 22 ai 23 di Març cun Michele Abbondanza.

[MUSICHE]

La clape “Musicistitrevenezie” e organize une schirie di apontaments a Cjamin, li dal ambient “All’antica”. Ducj i concierts a tacaran a 21, ai 5 di Decembar (Michele Pucci); ai 12 (“BarraCuba”); e ai 20 (“Suingando”).

[AMBIENT]

Si è dât dongje a Palme, ai 4 di Decembar, l’Osservatori Adriatic Disore pal confront anuâl fra lis agenziis regjonâls e lis instituzions sientifichis ch’a lavorin par cognossi e par protegi la marine ch'e bagne la Furlanie. L’Osservatori al à prontât un proget strategic di proponi a la Euregjon adriatiche. La vore si clame “Image” (Integrate Management and Sustainable Governance of the marine and coastal Environment in the Adriatic Region) e e vegnarà proponude ancje al Comitât dal program comunitari “Ipa Adriatic”.

[ART]

Vinars ai 5 di Decembar, si scree li de galarie “Nuova Arcadia” di Padue (in vie San Martino e Solferino 10/12), la mostre di Michelangelo Grigoletti (Rorai Grant, 1801-Vignesie, 1870; www.friul.net/dizionario_biografico.php) “Tancredi e Clorinda”, ch’e restarà vierte fintremai ai 22 di Fevrâr dal 2009. Di chê strade, a 18 il diretôr dai Museus civics di Pordenon, Gilberto Ganzer, e Vania Gransinigh a presentaran il “Catalogo Generale delle opere di Michelangelo Grigoletti” (edizions Bruno Alfieri).

[MUSICHE]

Par fiestezâ il XL de sô fondazion, la “Polifoniche furlane Jacopo Tomadini” di San Vît dal Tiliment e organize 3 concierts. A comencin sabide ai 5 di Dicembar, li dal domo di Glemone. Il secont apontament al è stabilît par domenie ai 7 di Decembar li dal santuari di Madone di Rose a Sant Vît e il tierç li dal dom di Cividât ai 8, te fieste de Madone di Decembar. Ducj ju apontaments a tacaran a 20.45 e si jentrarà sore nuie.

[TEATRI]

Il spetacul “Tre uomini di parola...”, ch’al à par protagoniscj Mauro Corona, Toni Capuozzo e Luigi Maieron, al ven proponût vinars ai 5 di Decembar a 20.30 li dal teatri “Pasolini” di Cervignan. La manifestazion e jentre tal proget “Un ponte per Herat” a pro dal Afghanistan.

[ART]

Dai 10 ai 12 di Dicembar, al torne “Pixxelmusic”, il festival sul rapuart fra visîf e sunorôs, fra creativitât e tecnologjiis gnovis dal art digjitâl, puartant a Gurize artiscj come Eboman, Claudio Sinatti, Etoy e Antonio Riello. La mostre internazionâl “Pixxelpoint” dedicade a la “new media art” e sarà imbastide dai 5 ai 12 di Dicembar li de galarie comunâl di Nova Gorica. Ai 10 di Dicembar e sarà proponude une convigne in forme di cene cui artiscj, che e tacarà a 19.30. Ai 11, laboratori di sperimentazion cui artiscj multimediâi. Ai 12 fieste finâl a 22 di sere li dal centri culturâl Mostovna. A organizin Lucide e Dams de Universitât furlane.

[ECONOMIE]

“Banca Etica”, “Progetto Toc”, “Gruppi d’Acquisto Solidale” e “Arti & Mestieri (Spacci Popolari Autogestiti)” a son i protagoniscj dal confront programât dal circul “Arci Tina Merlin” di Montreâl, sabide ai 6 di Decembar. Al tacarà a 18, seguît di une cene sociâl (par informazions: 338 7434117).

[NAZIONS]

Ai 6 di Decembar, e je programade a Cuneo la zornade culturâl “Lenghe d’Òc patrimoni mondiâl de umanitât”. Manifestazions a vegnaran proponudis di 16 a 23, li de Provincie. Di chê strade, e vegnarà screade la mostre “Paesaggi d’Òc - 42 immagini d’Occitania in cammino da Vinadio a Vielha” di Riccardo Carnovalini che po e restarà vierte fint ai 8 di Decembar (dîs di vore, 14-18; dîs di fieste 15-19). A vegnaran presentâts i libris “Una lingua in cammino: Viaggio di una giapponese nelle Valli occitane in Italia” di Naoko Sano e “Mal di lingua” di Enric Larreula Vidal. A 21 “Aire de prima” e presentarà “Òc en chamin - chants d’Occitània”.