[MOSTRIS]

Dai 12 di Decembar ai 25 di Genâr dal 2009, lis instituzions e lis clapis di Vençon a proponin la mostre “Espressioni artistiche venzonesi” cu lis oparis realizadis di artiscj e di paisans dal biel ingegn. E sarà vierte li di palaç Orgnani-Martina sabide 14-17 e domenie 10-12 / 14-17 (gjavâts i 25 di Decembar e il I e i 6 di Genâr).

[SALÛT]

Un cors di formazion continuade par servidôrs-insegnants dai Clubs dai alcoliscj in tratament al è programât a Tumieç ai 13 e ai 14 di Decembar. Al tacarà a 9 li dal coleç salesian di vie Dante. Animadôrs a saran Lucia Concina, pre’ Piergiorgio Rigolo e Mario Sartor ch’a frontaran la cuistion “Il presint, l’avignî… Cemût?”.

[MUSICHE]

Sabide ai 13 di Decembar, la clape “Musica aperta” di Gurize e organize l’omaç a Julius Kugy tal CL de nassion “Kugymusik: un Gaudeamus per Alpinisti (e non)”. Al tacarà a 17 li dai Museus provinciâi gurizans, tal Borc dal cjiscjel.

[MOSTRIS]

La mostre “Sflandôrs dal Gotic tal Patriarcjât di Aquilee”, imbastide a Udin li de glesie di san Francesc, e restarà vierte fintremai ai 19 di Avrîl. I oraris pes visitis a son: di martars fin vinars, 10-13 / 14-18; sabide e domenie 10-19; ai 26 di Dicembar e il I di Zenâr, 15-19. Par ativitâts didatichis: 0432 271980.

[LIBRIS]

Il cicloviazadôr e scritôr gurizan Emilio Rigatti, sabide ai 13 di Decembar, al incuintre i siei letôrs li dal ambient “La Posta” di Dael, ch’e je une tratorie gestide di une cooperative sociâl. La convigne, inmaneade in colaborazion cul editôr di Puart “Ediciclo”, e tacarà a 21.30.

[MOSTRIS]

La vuere, i sfolâts, la ocupazion… peraulis e inmagjinis a contin la tragjedie de vuere dal ’15, inte mostre fotografiche “1918 - L’orribile anno della vittoria”. E restarà imbastide fintremai ai 31 di Genâr li di palaç Frisacco, a Tumieç. Orari: 10.30-12.30 / 17-19 (ducj i dîs gjavât martars).

[LIBRIS]

Par cure dal periodic “il Timènt”, sabide ai 13 di Decembar, si presente a San Micjêl il libri di Massimiliano Galasso “Dulce et decorum est pro patria mori - I caduti del Comune di San Michele al Tagliamento e il territorio della Bassa tilaventina durante la grande guerra 1915-1918”. Su la cuistion a intervegnaran, li dal cine “Verdi” a 10.30, Enrico Pino, Adolfo Zamboni, Maurizio Marcon, Giorgio Vizzon, Federica Dalla Torre e Francesco Frattolin.

[MUSICHE]

E torne a San Laurinç di Mosse e a Roncjis di Monfalcon la rassegne “Friuli Sacro tra ’800 e ’900”. Sabide ai 13 di Decembar, conciert a 20.30 te glesie di san Laurinç. Domenie 14, te istesse ore al tacarà il conciert di Roncjis. Il grop polifonic “Claudio Monteverdi” di Rude al proponarà musichis corâls e strumentâls di Tomadini, di Perosa e di Dipiazza.

[MUSICHE]

Tierç apontament cu la II rassegne dai Concierts dal Avent, sabide ai 13 di Decembar, a 17.30 li de glesie di Sante Catarine di Pasian di Prât. L’Academie organistiche udinese e à invidât l’organist trevisan Giovanni Feltrin, interprit innomenât di musiche romantiche e insegnant dal Conservatori di Vicenze.

[MUSICHE]

E je tornade a tacâ la rassegne di cjantis e di tradizions di Nadâl in Alp Adrie “Nativitas”. Le organize l’union regjonâl des societâts corâls “Usci”. Ju apontaments a laran indevant fintremai ai 11 di Genâr dal 2009, tocjant dutis lis provinciis furlanis.