[DIASPORE]

Ancje il conciert “Note Meticce”, li dal “Deposito Giordani” di Pordenon vinars ai 16 di Decembar, al coventarà par popolarizâ e par sustignî “Progjet Snait”, a pro dai laboratoris educatîfs e artistics dal borc Ferrari di Buenos Aires. L’iniziative e je prudelade dal “Progjet zoventût” dal Comun di Pordenon (0434 392624).

[CONVIGNIS]

La “Cjase pa l’Europe” di Glemone e organize une convigne su lis “Feminis in Europe”. L’apontament al tache a lis 19 li dal Centri socio-culturâl “Julius Kugy” di Tarvis, vinars ai 16 di Decembar. Intervents di Renato Damiani (“La donna nella legislazione dell’Unione Europea”), di Marina De Colle (“Due progetti al femminile: Futura e Imprenderò”), di Michela Gasparutti (“La politica della Provincia di Udine a favore della donna”) e di Francesca Comello (“Analisi del mondo femminile nel Tarvisiano”).

[ART]

Fra Decembar 2005 e Sierade dal 2006, i Comuns di Udin e di Pordenon a proponin 3 mostris su l’opare di Afro Basaldella (Udin, 1912-Zuric 1976; www.friul.net/dizionario_biografico.php). La manifestazion culturâl “Tal segn di Afro” si scree ai 16 di Decembar, li de glesie di San Francesc di Udin.

[MUSICHE]

Sot Nadâl, l’associazion culturâl “Furclap” e propon i concierts “Incontri d’aria”. I apontaments a van indevant ai 16 di Decembar a lis 21, li de glesie di Possec; ai 17 a lis 21, a Spilimberc, li dal teatri; e ai 18, li de glesie di San Laurinç di Sedean in glesie. Si esibissin il Cuartet corâl di Gjiviane, Valvano Quirino cu lis totorossis dal Pollino, Simona Totaro e Maria Acconciagioco di Salerno e il “Strepitz ensamble”.

[LIBRIS]

L’Institût regjonâl “Ville Venete”, vinars ai 16 di Decembar, al presente li di vile Manin di Passarian il volum “Ville Venete: La Regione Friuli Venezia Giulia”. L’apontament al è stabilît pes 18.

[MUSICHE]

Conciert di Alpenberkrainer, di Denis Novato, di Sebastiano Zorza e di Markus Oberleiter, sabide ai 17 di Decembar a Comeliàns, pe manifestazion “L’armoniche a Nadâl”. La serade e tache a lis 20 e e je organizade de clape “Fisarmonicarnia”.

[NAZIONS]

La nazionâl ocitane di balon, sabide ai 17 di Decembar, e zuie cuintri dal Monaco. La partide e tache a lis 15, li dal cjamp municipâl di Cap d’Ail. Pe scuadre “sandue e oro” di Ocitanie si trate de tierce partide internazionâl.

[LIBRIS]

Sabide ai 17 di Decembar, si presente a Tumieç il libri di Giovanna Nieddu “Di terre lontane”. La convigne e tache a lis 18, li de Comunitât montane cjargnele. A cjacararan Ermes Dorigo e Carlo Sanna, president de clape regjonâl dai sardegnûi in Friûl.

[LIBRIS]

Li di palaç Montereale Mantica di Pordenon, sabide ai 17 di Decembar a lis 17.30, “pordenonelegge.it” al presente une conversazion cun Alfonso Berardinelli, Carlo Ginzburg e Carlo Cecchi, ch’al leiarà ancje “La pianura proibita” di Cesare Garboli.

[POLITICHE]

Te riforme regjonâl des autonomiis locâls il Friûl nol à acet. L’emendament ch’al domandave la possibilitât di meti sù la “Samblee dal Friûl” par permeti il confront dai Conseis provinciâi di Gurize, di Pordenon e di Udin su lis cuistions instituzionâls, culturâls, economichis e sociâls comuns al è stât ignorât (a an votât 35 conseîrs su 60) e po boçât (in 11 a an votât di “Sì” e 24 di “No”).