[CONCORS]

Joibe ai 8 di Decembar, a Glemone si proclamin i vincidôrs de IX edizion dal concors leterari “Glemone îr, vuê e doman”, par cure dal Comun. La ceremonie e tache a lis 18, li dal municipi.

[GLESIE FURLANE]

Giovanni Catapano di Pordenon al à cjapât il premi des Academiis pontificiis pe sô ricercje dotorâl sul concet di filosofie tai prins scrits di sant Gustin. In specialitât al à scrutinât i bocons metafilosofics dal “Contra Academicos” al “De vera religione”. Catapano al à ricevût il premi dal gardenâl Paul Poupard, president dal Consei pontifici de culture.

[POLITICHE]

«Fâ deventâ Vignesie-Mestre la citât-Regjon dal Venit e dal Nordest, dal moment che altris citâts dal gjenar cassù no ’nd è». Al è l’obietîf che il filosof Massimo Cacciari al smire di rivâ intant dal so mandât di sindic di Vignesie. Cu la cuistion al à tornât a cjapâ flât il discors su la “macroregjon” dal Nordest, ch’al sgrisule cetancj di lôr e ch’al domande di disbratâ l’intric de “governance”. Il mensîl di Pordenon “Il Momento” al à stiçât il dibatiment, marcant che «Pordenon, Udin e Triest no puedin stâ a cjalâ sul barcon».

[CONVIGNIS]

Dai 9 ai 11 di Decembar, il centri pai congrès di Sardagna (in provincie di Trent) al ospite la VI convigne internazionâl su la cuistion “Matriarcât e montagne”. Le organize il Centri di ecologjie alpine di Viote de mont Bondone.

[MUSICHE]

Vinars ai 9 di Novembar, l’associazion culturâl “Colonos” e presente une conference di Roberto Starec sul patrimoni etnomusicâl de tradizion religjose furlane. L’apontament al tache a lis 20.30, li dal agriturisim di Vilecjace di Lestize.

[ART]

Fint ai 20 di Decembar, cu la prime sezion, e po dai 21 di Decembar ai 5 di Zenâr, cu la seconde, e restarà vierte li de Biblioteche statâl isontine la mostre “Quadri e sculture per il 2006”, coletive d’art contemporanie par cure di Fabio Favretto e di Diego Valentinuzzi. Oraris: 10.30-18.30 (gjavâts sabide e domenie).

[SOCIETÂT]

Sabide ai 10 di Decembar e torne a Cjampfuarmit la convigne taliane su lis esperiencis e lis perspetivis dal auto aiût e des terapiis pai zuiadôrs di azart. Le organize l’associazion “Agita” dai ex zuiadôrs, li dal municipi. Lis voris a tachin a lis 9.

[ECONOMIE]

Li dal auditorium di Prât in Cjargne, sabide ai 10 di Decembar, la Propietât coletive di Pesariis, e propon la convigne: “Une spese che no pese sul ambient. Informazion e orientament par un consum cussient”. Si tache a lis 17.30 cui intervents di Delio Strazzaboschi, di Daniela Peresson dal “Aiab” e di Alessandro Spadoni dal “Icea”.

[CONVIGNIS]

Si discor di derit a l’aghe, sabide ai 10 di Decembar a Gurize, te suaze dal “Forum regjonâl su pâs e cooperazion”. Il “CeVi” di Udin al à organizât un confront cul Comitât talian pal derit a l’aghe, cui puartevôs dal “Ucai Fvg”, dal “Ato” di Vignesie, dai Comuns di Udin, di Pordenon, di Gurize e di Triest e cul president dal Consorzi acuedot Friûl centrâl. Lis voris a tachin a lis 10, li dal consei provinciâl.

[TEATRI]

Sabide ai 10 di Decembar, la clape “Amis du Frioul” e propon il teatri par furlan a Parîs. Li de sale “Albert Marquet” di La Frette sur Seine, la companie teatrâl di Ruvigne e presentarà “Plui di là che di cà”. Apontament a lis 16.30 e po cene sociâl.