[INFORMAZION]

Miercus ai 7 di Decembar, la schirie des convignis “Tornâ a pensâ la democrazie inte ete de globalizazion”, par cure dal Centri “Luigi Sturzo”, e propon une riflession sul libri di Giovanni Sartori “Homo videns: televisione e post-pensiero”. A lis 18 li de Facultât di Economie di Udin (in vie Tomadini 3/a), al cjacare Guglielmo Cevolin de Universitât furlane.

[DIASPORE]

Par svilupâ la sô ativitât a pro de comunitât furlane d’Argjentine, i Fogolârs ch’a aderissin a “Friûl pal Mont” a an nomenât un coordenament ch’al cjape dentri Javier Delbon, puartevôs dal Comitât dai coregjonâi tal forest; Mario Bianchi e Luis Grion, puartevôs dai presidents dai Fogolârs; Daniel Lirussi e Claudio Bravin, puartevôs dai imprendidôrs; Patricia Venturini e Pablo della Savia, puartevôs dai zovins; e Nestor Mattiazzi, operadôr tecnic.

[ECONOMIE]

“Confartesanât” e Cjamare di cumierç di Pordenon, miercus ai 7 di Decembar, a presentin il volum “Sessant’anni di artigianato nel Friuli occidentale”. L’apontament cul assessôr regjonâl Enrico Bertossi, il president de Provincie Elio De Anna, il sindic Sergio Bolzonello e Silvano Pascolo, president di “Confartesanât Pordenon”, al è stabilît pes 17.30 li di palaç Mantica.

[NAZIONS]

La comunitât slovene dal Mandament di Mafalcon, miercus ai 7 di Decembar, e propon la presentazion dal libri “Slovenci v laskem. Cenni storici sulla comunità slovena nel Monfalconese”. Dal volum a cjacararan Branko Marusic, Fabio Del Bello e Vlado Klemse, miercus ai 7 di Decembar, a lis 18 li dal municipi.

[TEATRI]

La Glesie di Mafalcon, miercus ai 7 di Decembar, e fâs la fieste dal so sant protetôr Ambrôs. A lis 20.30 li dal dom, si presente la rapresentazion sacrade “Cercando”, par cure dal grop teatrâl “Teatro dell’Altrove”.

[SOCIETÂT]

La Societât operarie di Pordenon e finìs 139 agn di vite e par chel e propon une schirie di celebrazions ch’a tachin miercus ai 7 di Decembar. A lis 20.45, li dal dom di San Marc, al vegnarà proponût un grant conciert. A lis 10 di joibe e seguissarà la comemorazion uficiâl, li dal centri culturâl, cu la premiazion dai artiscj Maria Chiara, Bruno Giaiotti, Marta Lantieri e Cecilia Seghizzi. Ai 13 di Decembar si scree la mostre “Quando il giocattolo diventa passione…” e ai 18, a lis 10 li dal auditorium regjonâl, si fasarà la fieste pai viei “Natale dell’anziano”.

[SCUELE]

Nunziant che dentri di 3 agns il Friûl orientâl al varà il so “Campus universitari complet”, il retôr Furio Honsell, ai 5 di Decembar, al à screât il XIII an academic de abitance gurizane dal Ateneu furlan. In zornade di vuê, a Gurize e a Cormòns, a studiin 3 mil 500 zovins, guidâts di 60 insegnants, ch’a frecuentin lis 4 laureadis trienâls inviadis o lis 8 laureadis magjistrâls, o un dai 6 “master”.

[POLITICHE]

Di chê strade dal cjadalan de Declarazion universâl dai derits dal om, dai 8 ai 11 di Decembar il Coordenament regjonâl dai ents locâi pe pâs al organize une schirie di apontaments a Gurize, Gradiscje Imperiâl e Sacîl. Il program complet al è disponibil tal lûc internet: www.cevi.coop, par cure dal Centri di volontariât internazionâl di Udin.

[GLESIE FURLANE]

La dì de Madone di Decembar, al cole il LX cjadalan de conclusion dal Concei Vatican II, ch’al à mudât la muse de Glesie catoliche. Di chê strade, pape Benedet XVI al à concedude un’indulgjence plenarie. Fra i paris conciliârs, ancje un troput di gleseastics furlans. Par un esempli: il gardenâl Ermenegildo Florit, esegjet e vescul di Florence, mons. Andrea Pangrazio, arcivescul di Gurize e protagonist dal rinovament ecumenic, il storic tumiecin mons. Pio Paschini, il sôl studiôs che un so libri (chel su Galileo Galilei) al è stât citât tai documents conciliârs.

[NAZIONS]

Cuntune schirie di atentâts dimostratîfs, ju indipendentiscj bascs dal “Eta”, ai 6 di Decembar, a an segnade la zornade che la Spagne e ricuardave la proclamazion de sô constituzion, aprovade tal indoman de ditature franchiste. L’“Eta” al à pandût la volontât di domandâur ai mieçs d’informazion internazionâi «un impuls par une soluzion negoziade» dal conflit cul stât spagnûl par otignî il derit da l’autodeterminazion. Pal premier spagnûl Zapatero si po vê fiducie intune soluzion politiche. Il parlament di Madrid, difat, al à stabilît che il guvier al podarà tacâ la negoziazion se i nazionaliscj bascs a nunziaran di rinunciâ al ûs des armis.