[CORS]

Ai 16 di Zenâr al scjât il timp par dâsi in note ai cors pal “Deplome di restauradôr dai bens culturâi cun specializazion in bens libraris, documentaris e oparis su cjarte”. Il cors al è inmaneât dal Centri regjonâl pe catalogazion e pal ristaur dai bens culturâi.

[INFORMAZION]

Vittore De Sandre i à dât la volte a Emanuele De Polo te direzion dal mensîl “Il Cadore”, ch’al è l’argagn informatîf uficiâl de “Magnifiche comunitât di Cjadovri”. De Polo al à direzût il sfuei cjadorin par 131 numars.

[ART]

Fint ai 8 di Zenâr, li di palaç Attems, e reste vierte la mostre ”Itinerari Pacassiani III”, dedicade a la famee Attems e a la vile di Pudigori/Podgora, dulà ch’a son stâts screâts i lavôrs par regolâ il “Ninfeo”. La propueste culturâl e je organizade de sezion gurizane dai “Amîs dai Museus”.

[AMBIENT]

La “Finanziarie” regjonâl pal 2006 e pant la «miopie di sieltis politichis ch’a impuarissin i bens coletîfs rapresentâts dal ambient». “Wwf” e “Lipu” a denuncin, cence pêl in bocje, une çoncjade dal 10% dai stanziaments pal ambient, dal 1999 incà, e une çoncjade dal 40% pal 2006 (2.742.000 euros), a pet dal 2005 (4.902.000 euros). «E sarès ore – a marchin “Wwf” e “Lipu” – che la ministrazion regjonâl e capìs che lis politichis inovativis in setôrs sicu turisim, culture e agriculture no puedin stâ sù cence une gjestion dal teritori atente e precise».

[MOSTRIS]

La “Stadtgalerie” di Clanfurt, in Carintie, fint ai 15 di Zenâr e presente lis aghefuartis di Rembrandt, di chê strade dal cuatricentesim cjadalan de nassite dal artist olandês (1606-1669). Lis 100 oparis in mostre a vegnin de Academie des bielis arts di Viene.

[MOSTRIS]

Fint ai 7 di Zenâr, li de glesie di San Grivôr di Sacîl, si pues visitâ la mostre “Murano 2025”, mostre stereoscopiche dal Museu dal veri di Muran (2000 agns di storie dal veri). Sabide e dîs di fieste, 10-12.30 / 15.30-21; dîs di vore, 17-21.