[AMBIENT]

La planificazion par areis slargjadis e reste un’utopie in cheste Regjon, ch’e à vût miôr di mantignî l’arbitrarietât totâl permetude in zornade di vuê ai Comuns. Al è il judizi di “Wwf” e di “Italia Nostra” sul “Plan teritoriâl regjonâl”, publicât sul Boletin uficiâl daspò de aprovazion dal mês di Novembar. I valôrs dal ambient, dal paisaç e dai bens culturâi, in cheste Regjon, a son ecuiordenâts cu l’incressite economiche.

[LIBRIS]

Al conte une storie di depuartazion politiche tai “lager” naziscj il libri “Il cielo di cenere” di Elvia Bergamasco, saltât fûr par cure di Imelde Rosa Pellegrini e di Ugo Perissinotto. L’edizion le à curade “Ediciclo / Nuovadimensione Editore” di Puart.

[CULTURE]

Il Centri di ricercje “Leopoldo Gasparini” di Gradiscje Imperiâl al è deventât ent colegât dal Institût talian pe storie dal moviment di liberazion, framieç di altris 65 institûts. Graciant chest ricognossiment al podarà incressi la sô ativitât a pro de formazion e dal inzornament dai insegnants. Il Centri di Gradiscje al è il prin dal Friûl orientâl a jentrât tal Institût talian.

[MOSTRIS]

La mostre su “Afro di zovin. Ricercjis, confronts e afinitâts. Oparis su cjarte 1928-1947” e restarà vierte fintremai ai 21 di Març li de glesie di San Francesc a Udin e fint ai 26 di Fevrâr li di palaç Ricchieri di Pordenon. Oaris di visite: a Udin, martars-vinars, 10-13 / 16-19, sabide, 10-13 / 16-20 e domenie, 10-13; a Pordenon, martars-sabide, 15-19, domenie10-13 / 15-19.

[SPORT]

L’associazion sportive “Camosci” di Plodn/Sapade, chest an, e organize dôs garis di skialpinisim noturnis. Prin apontament miercus ai 28 di Decembar cul II trofeu “Lorenzo Marchiando e Mario De Candido”. Partence a lis 17.30 dal borc di Palù. Vinars ai 6 di Zenâr, po, si corarà il I trofeu “Cumieli-Sapade”.

[SCUELE]

Il “Lunari dal 2006” de Scuele primarie di Prât, in Cjargne, al è dedicât a lis vilis dal Cjanâl de Pesarine. I fruts a an piturât i paîs di Pesariis, di Sostâs, di Davousse, di Prât, di Dasaie, di Prî, di Luc, di Pierie, di Predumbli e di Truie.

[MUSICHE]

Pantianins, in dite di dut il Friûl, al onore pre’ Angelo Della Picca, innomenât musicist ch’al vîf tai Stâts Unîts di 40 agns e ch’al è predi di 60 agns. Tal paîs là ch’al è nassût, ai 28 di Decembar, la corâl di Saint Henry di Erlangen (Kentucky) e proponarà un grant conciert a lis 20, li de glesie. Po e partissarà par une “tournée” ator pa l’Italie (Vignesie, Ravene, Assisi, Rome).

[GLESIE FURLANE]

La Glesie di Concuardie-Pordenon e je daûr a celebrâ la convigne diocesane, convocade dal vescul Ovidio Poletto. Lis voris, tacadis li de catedrâl di Concuardie ai 26 di Decembar, si sieraran joibe 29 a Pordenon. Titul de riflession pastorâl: “Glesie di Concuardie-Pordenon motive la tô sperance”.

[MUSICHE]

Joibe ai 29 di Decembar, l’orchestre filarmoniche “Paul Costantinescu” di Ploiesti (Rumenie) cul vincidôr dal concors iternazionâl di viulin “Rodolfo Lipizer” di Gurize al presente il conciert pal cjadalan, li dal teatri “Candoni” di Tumieç. Apontament a lis 20.45, par cure dal Comun.

[MUSICHE]

La rassegne “Gospel canto divino”, par cure dal “Folk club” di Buri, e tire adilunc cun apontaments a Pasian di Prât (ai 29 di Decembar, li dal auditorium) e il I di Zenâr a Tresesin (li dal dom). Tacant a lis 20.45, a cjantaran pal ordin “Joy to the world” e “Sails”.