[MUSICHE]

Ai 7 di Novembar, e torne a vierzi “Arché notte”, la discoteche parochiâl di Codroip, dulà che si pues divertîsi cence sturnîsi, dal moment che no son ametudis bevandis alcolichis. I zovins dai 14 ai 19 agns a podaran balâ di 21 a miegegnot. Li di “Arché notte” si dan la volte 5 “dj” sot dai 20 agns ducj codroipins.

[LIBRIS]

Sabide ai 7 di Novembar, di chê strade di “Fuorirotta”, si presente li de librarie “Feltrinelli” di Udin la guide di Max Mauro “La bici sopra Berlino”. La convigne e tache a 16.30, inmaneade dal editôr di Puart “Ediciclo”, presint il cicloscritôr gurizan Emilio Rigatti.

[CORS]

Il “Mediterraneo folk club” di Triest, ai 7 e ai 8 di Novembar, al propon un ’seminari di bai balcanics cun Goran Mihailovic. Sabide al larà indevant di 16 a 19; domenie di 10 a 18.

[MUSICHE]

“Reverie”, sabide ai 7 di Novembar, e ufrìs un conciert a 18 li dal teatri “Arrigoni” di San Vît dal Tiliment. Il spetacul, intitulât “Reverie e poesia”, al proponarà poesiis gjavadis de ricolte di Eddy Bortolussi “Luna d’unviàr”.

[CONCORS]

Domenie ai 8 di Novembar, il Comitât regjonâl pal prin centenari di Romano Pascutto (1909-2009) cul Cumon di San Stin al organize la premiazion dal concors leterari “Giacomo Noventa-Romano Pascutto”, rivât a 16 edizions. La ceremonie e tacarà a 10.30 li dal teatri comunâl dedicât al poet, ancje om de resistence e ministradôr de sô comunitât (www.friul.net/dizionario_biografico.php).

[GLESIE FURLANE]

E comence la preparazion pal “Piligrinaç di fiducie su la tiere” 2009 proponût de comunitât ecumeniche di Taizé. L’apontament internazionâl al colarà a la fin dal an a Poznan (te Polonie). Il “Grop 89” di San Zuan di Manzan al organize un prin incuintri domenie ai 8 di Novembar a San Pieri dai Sclavons. A 14.30 apontament li de parochie.

[TEATRI]

La Fondazion Luigi Bon, te suage de rassegne Domeniche al Bon li dal teatri di Colugne, e propon doi apontaments tal mês di Novembar (a 16). Ai 8, Laboratorio Hattivo si esibissarà te opare Cosmonauti; ai 22, Etabeta teatro di Pordenon e Gazza ladra di Puart a rapresentin Paradiso 3x2.

[TEATRI]

La rassegne di teatri par fruts Bim bum bon, inmaneade de Fondazion Luigi Bon, si scree cun doi apontaments li dal teatri Bon di Colugne. A 16 dai 8 di Novembar Storie da fiera; a chê stesse ore dai 29 di Novembar Patatrac.

[TEATRI]

Domenie ai 8 di Novembar, il Teatro Incerto al presente il spetacul Laris, li dal auditorium comunâl di Rivignan a 17.

[SOCIETÂT]

E je programade dai 9 ai 16 di Novembar la XI edizion de “Setemane provinciâl de solidaritât”, inmaneade de Provincie di Udin li di “Udine e Gorizia Fiere”, a Torean di Martignà. Fra i apontaments: “Giovani e cultura della legalità - e tu da che parte stai?” (lunis 9); “Esperienze di affidamento di servizi da parte di aziende private alla cooperazione sociale nel quadro delle previsioni dell’art 14 del D.Lgs 276/03. Punti di forza e criticità” (martars 10); “5 in condotta. Prevenire e contrastare bulli, vandali e prepotenti a scuola e nel quartiere” (ai 11 e ai 12 di Novembar); e “Operatività fra i coniugi e tutela degli interessi dei minori” (vinars 13).