[MUSICHE]

Barbara Errico, sabide ai 16 di Otubar, e scree a 18.30 li de buteghe “Angolo della musica” di Udin (borc Aquilee), la rassegne “Angolo Club 2010-2011”. Vie pal mês di Otubar, dopo di jê, si esibissaran Michele Pirona ai 23 e i “Nosisà” ai 30.

[CULTURE]

Dai 21 ai 25 di Otubar, e je programade a Turin la manifestazion “Terra Madre”. Al è “Slow food” ch’al à ideât chest “meeting” mondiâl dedicât a lis “Comunità del cibo”, al ven a stâi ducj chei che tal mont a samenin, ch’a transformin e ch’a vendin prodots locâi, tradizionâi e sustignibii. Chest an, in mût speciâl, lis iniziativis a marcaran l’impuartance des diviersitâts culturâls e lenghistichis ancje intal setôr de produzion de mangjative.

[DIASPORE]

Gualtiero Bertelli e Lino Straulino, domenie ai 17 di Otubar, a son i protagoniscj di un conciert cun musichis e cjantis dai inmigrâts talians li de sale “Pax” di Saorgnan di Paulêt, te suage de rassegne “Ator pal mont”, su lis migrazions. Il spetacul “I canti per la terra non più mia” al presentarà la «musiche come imprest d’identificazion», tacant a 20.30.

[CINE]

E scomence lunis ai 18 di Otubar a Cormòns la seson 2010-2011 di “Circuitocinema”, ch’e puarte il cine d’autôr ator pe Furlanie. Il prin cine dal cartelon al sarà “Niente paura” di Piergiorgio Gay, cun proiezions a Cormòns (ai 18, a 20.45), a San Denêl (ai 19 a 21), a Spilimberc (ai 20, a 21), a Cjasarse (a 21, a 21), a Çopule (ai 23, a 21), a San Vît dal Tiliment (ai 26, 21), a Glemone (ai 29, a 21) e a Codroip (ai 30, a 21).

[AMBIENT]

E tire adilunc la campagne cuintri des borsis di plastiche e pal svilup des energjiis alternativis. Domenie ai 17 di Otubar, a Pordenon, intant de manifestazion “Incontriamoci a Pordenone”, si tire sù firmis pe petizion a pro de abolizion dai sacs di plastiche (www.portalasporta.it) e pe propueste di leç cuintri des centrâls nucleârs (www.oltreilnucleare.it). L’apontament al sarà li di place Cavour dulà che si podarà ritirâ ancje lis borsis di piece dal “Ascom”. L’iniziative e je curade di “Legambiente”.

[MUSICHE]

Domenie ai 17 di Otubar, e tacarà a 15.45 la rassegne tradizionâl “Arriva la banda”. A la XI edizion a cjaparan part lis bandis di Buje, di Dartigne, di Cividât, di Feagne, di Madone di Buje, di Madrîs, di Narêt, di Orçan, di Reane, di Sudri e di Tresesin. A 17.30, conciert finâl cun 400 musiciscj e “majorettes”.

[MUSICHE]

L’associazion musicâl “Nam Lab” di Daçan (0434 633135), domenie ai 17 di Otubar, e propon te sô sede di strade De Sanctis 3, un laboratori musicâl cun Umberto Fiorentino, a 15. A son invidâts ancje scuelârs e gjenitôrs pe presentazion dai progjets scolastics pal an 2010-2011.

[INFORMAZION]

I “Grops di compre solâr”, ch’a son daûr a nassi ancje ator pe Patrie par judâ la int a sfrutâ lis energiis alternativis e i jutoris publics par svilupâlis, a saran presentâts lunis ai 18 di Otubar, intant di un program radiofonic ch’al tacarà a 11.30 par “Radio Triest”. Fra i invidâts, Alessandra Lepore dal “Gas” di Bordan, di Dartigne, di Glemone, di Trasaghis e di Vençon e Matteo Mazzolini e Fabio Dandri de “Agenzia per l’Energia” regjonâl.

[CONVIGNIS]

La XLIV convigne internazionâl dai “Incontri mitteleuropei”, programade dal institût gurizan zenso, dai 18 ai 19 di Otubar, e celebre il centenari de muart di Carli Michelstaedter (www.friul.net/dizionario_biografico.php). E sarà intitulade “La via della persuasione” e si le fasarà li de Fondazion “Carigo” di strade Carducci 2, a Gurize. Te suage de “Fieste de culture”, par cure di “Ex Border”, al sarà proponût ancje il spetacul “Il volo di Carlo Michelstaedter, sciamano d’Occidente”.

[MOSTRIS]

Fra lis iniziativis programadis a Gurize par memoreâ il C innovâl de muart di Carli Michelstaedter (www.friul.net/dizionario_biografico.php), e spiche la mostre “Carlo Michestaedter. Far di se stesso fiamma”, ch’e restarà vierte fintremai ai 27 di Fevrâr dal 2011, li de Fondazion “Carigo”. La mostre, curade di Sergio Campailla, e presente 250 documents sul filosof gurizan. Oraris: di martars fin vinars, 10-13 / 16-19; sabide e domenie, 10-19.