[CULTURE]

Ai 3 e ai 10 di Otubar, Cumon di Clausêt, Museu des grotis di Pradis e clape culturâl “Pradis” a organizin lis “Zornadis de preistorie”, cun laboratoris di archeologie e visitis guidadis, intant che ator pal Friûl a tirin adilunc lis convignis sul ultin om di Neandertal dal Friûl (chel di za fa 42 mil agn). I laboratoris “Une zornade di Neandertal” e “Une zornade di Sapiens” a saran proponûts li de grote dal Clusantin a 10, a 11, a 14, a 15 e a 16 des dôs domeniis. Pes visitis guidadis “Laboratori di ricercje archeologiche”, si partissarà li dal Museu de grote a 10.30 e a 15, tant ai 3 che ai 10 di Otubar (par prenotazions: 0427 80323 - 366 1687906).

[ECONOMIE]

La cooperative di produtôrs e di consumadôrs biologics “La Cirignicule” e scree une buteghe gnove. La fieste e cole sabide ai 2 di Otubar a 18, a Felet, te strade Feruglio 8. In specialitât, alì si vendarà cjars biologichis cuntun “Punto vendita certificato”. Domenie ai 3 di Otubar, intant de Fieste de Sierade, la buteghe e proponarà lis sôs specialitâts, biel tacant a 10 di matine.

[ART]

Il “Liberatorio d’arte Fuluio Zonch” al propon a Morâr la manifestazion “33 1/3” cuntun scjap di artiscj ch’a interpretin “dal vivo” la cuvierte di un disc classic. Sabide ai 2 di Otubar, a saran impegnâts, li dal zardin de Biblioteche comunâl di 17 a 23, Giancarlo Lombardi (conciert “live”) e i artiscj Dunia Chinese, Michele Nardon e Paola Guerra. Il titul de zornade al è “Le luci della centrale elettrica”.

[LIBRIS]

Sabide ai 2 di Otubar, li de Biblioteche Guarneriane di San Denêl, a 11 si presente il libri “Primavera” di Fancesco Paolo Decleva, te suage de rassegne “(8bre : 2) = 4 espressioni letterarie d’autore”. Leturis dal “Gad Q. Ronchi” e coment di Carlo Venuti.

[TEATRI]

A San Ciancian, e continue la rassegne teatrâl “Dialets in tournée”. I doi apontaments dal mês di Otubar a son stabilîts sabide 2 (“De Palo in frasca” di Antonio Boemo” cu l’Associazion “Grado Teatro”) e sabide 8 (“Eviva al Mesico…. Ma noi stemo qua!” di Fulvia Cristian cul grop teatrâl “Brandl” di Turiac). Lis rapresentazions a tachin a 20.45, li dal Oratori parochiâl.

[ECONOMIE]

Ai 3 di Otubar, e cole l’XI edizion di “BioDomenica”, l’apontament dulà che l’agricuture biologiche si presente tes placis di 100 citâts talianis e ator par dut il mont. In Italie si dan dongje te iniziative “Aiab”, “Coldiretti” e “Legambiente”. Il lûc internet par cognossi dutis lis propuestis (comprendude chê furlane di Riverote di Teôr) al è: www.biodomenica.it.

[CORS]

Dai 8 ai 10 di Otubar, l’associazion internazionâl di sperimentazion da lis dissiplinis ecocompatibils “L’albero della vita” e organize a Bean di Codroip un cors par cognossi e par inscuelâ i mus, in colaborazion cu l’aziende agricule “La Nuova Terra”. Il cors al sarà fat li de “Casa per Michele”, te strade Ferrovia 70. Il titul dal cors al è “Conoscere ed addestrare gli asini. Ritorniamo a coltivare i campi con gli animali”. Par dâsi in note: 0432 905724 (9-12), fax 1782749667.

[AMBIENT]

Intant de VIII edizion di “VogaNoncello” (di 9 a 14.30), la fieste nassude par valorizâ la gestion sustignibil dal flum di Pordenon, domenie ai 3 di Otubar, “Legambiente” e tire sù lis firmis pe propueste di leç d’iniziative popolâr a pro des energiis rinovabils (www.oltreilnucleare.it). A coventin 50 mil firmis dentri dal mês di Decembar.

[CULTURE]

Ancje il poet francês di divignince furlane Mario Urbanet al sarà fra i protagoniscj dal “Festival Losserand Poesie”, domenie ai 3 di Otubar a 15, li de librarie Tropiques (56, rue Raymond Losserand) di Paris XIVème. Al festival a son stâts invidâts poets e “conteurs du quartier”.

[TEATRI]

La companie teatrâl di Ruvigne e presente il libri ch’al conte la sô rapresentazion plui preferide. La presentazion e je stabilide domenie ai 3 di Otubar a 20.30, li de sale teatrâl di San Jacum. La companie e opere di passe 15 agn ator pal Friûl e fra i emigrants ator pal mont. La comedie “Tre pas tal curtîl”, publicade tal volum, e je stade proponude 75 voltis. Intant de serade, a saran tiradis sù ufiertis a pro de “Associazione Donne Operate al Seno” di San Denêl.