[LIBRIS]

Miercus ai 21 di Otubar, a 18 te sale Ajace dal palaç dal Cumon di Udin, la Biblioteche civiche e organize la presentazion dal libri “Il mio zoo sotto le stelle” di Margherita Hack e Bianca Paoluzzi.

[CONVIGNIS]

“Dal paisaç strategic al paisaç sustignibil. L’abandon dal sistem militâr furlan”: il dibatiment inmaneât joibe ai 22 di Otubar a Pordenon, cul architet Juan Manuel Palerm e cul geograf Massimo De Marchi, al sarà intitulât cussì. L’iniziative di “Cinemazero” e dal Laboratori regjonâl di educazion ambientâl su lis sclavitûts militârs, inviade tal 2008 te suage dal Festival “Le voci dell’inchiesta”, e tacarà a 20.30 li dal covent di san Francesc. Di chê strade, al sarà presentât il lûc internet www.primulecaserme.it (cun 152 struturis militârs bandonadis).

[SALÛT]

Lis associazion di Pordenon che si ocupin dai malâts di tumôr e ch’a àn inmaneât il proget “Prendersi cura”, joibe ai 22 di Otubar a 21, a proponin il spetacul di musiche e di bal “Il bello della vita è... Prendersi cura”. La rapresentazion realizade di zoventût dal Friûl ocidentâl e tacarà a 21, li dal teatri “Don Bosco”.

[CONVIGNIS]

Te suage de mostre fotografiche “Onora il padre e la madre. Badanti”, imbastide li de biblioteche di Cividât, joibe ai 22 di Otubar e je programade la convigne “Badanti, Badati, Famiglie. Piccole storie di vita quotidiana”. A 18.30 te sale pes riunions de biblioteche, si proietarà il video “Sidelki/Badanti” di Katia Bernardi, cun intervents di Anna Cragnolini de Associazion regjonâl dal lavôr, di cualchi famee resident tal Ambit distretuâl dal mandament di Cividât (www.ambito.cividale.net) e de scritore Milena Bidinost.

[NAZIONS]

Dai 22 ai 25 di Otubar, i tocje a Udin di dâi acet la la convigne plenarie des vilis gimuladis. Par chel, a rivaran in Friûl i puartevôs di 11 citâts europeanis: Albacete (Spagne), Esslingen am Neckar (Gjermanie), Maribor e Velenje (Slovenie), Neath Port Talbot (Gran Bretagne), Norrköping (Svezie), Obuda (Ongjarie), Piotrokow Trybunalski (Polonie), Schiedam (Olande), Vienne (France) e Vilac (Austrie). I delegâts si confrontaran su “Pâs, Partecipazion e Integrazion europeane”.

[SALÛT]

A son viertis fint ai 2 di Novembar, lis inscrizions pal cors di pront socors, proponût dal Centri regjonâl servizi volontariât. Al tacarà sabide ai 7 di Novembar li dal ufici “Csv” di Gurize (cors Italia 55). Il deplom otignût al varà valôr legâl.

[LIBRIS]

Li de Biblioteche Joppi di Udin, si podarà visitâ une mostre dedicade ai dizionaris de lenghe furlane. Le àn curade i adets de Sezion furlane, ch’e je direzude di Marzia Di Donato. Il percors te lessicografie furlane al partìs cun Jacopo Pirona (Vignesie, 1871) par rivâ fin tal dì di vuê.

[SOCIETÂT]

La clape “Oikos”, joibe ai 22 di Otubar, e organize une serade a Pradaman intitulade “Rotolando verso Sud - Esperienza di vita e di formazione, dal Friuli al cuore del Brasile - Andata e Ritorno”. La convigne e tacarà a 20.30 li de biblioteche.

[DIASPORE]

Joibe ai 22 di Otubar, il Fogolâr di Turin, te suage di “I giovedì della biblioteca”, al propon la proiezion dal dvd “Mugulis” su la vite di une volte a San Pauli di Morsan des Ocjis. Di chê strade, a saran memoreâts i paisans muarts vie pal an. La convigne e tacarà a 21 li de sede di cors Francia 275B.

[LIBRIS]

Intun curtîl di Remanzâs, intun vagon di tren dal 1920, joibe ai 22 di Otubar a 20.45 Checo Tam al presente il so libri “Scûr di lune”. Lussie di Uanis e proponarà des leturis, po dolçuts par ducj.