[SCUELE]

Al torne a tacâ il ’seminari regjonâl su la citadinanze europeane par insegnants. Si podarà di dâsi in note li dal Ufici scolasti regjonâl. La presentazion e je stabilide joibe ai 22 di Otubar, a 9.30.

[INFORMAZION]

I dirigjents des stazions televisivis plui impuartantis d’Europe, dai 17 ai 23 di Otubar, si daran dongje a Gurize pe prime edizion dal “workshop” “Eurodoc Executives”. L’organizazion e sarà curade da Friuli-V. G. Film Commission.

[CULTURE]

Franco Loi, Giovanni Tesio, Piero Gibellini, Edda Serra e Gianni Oliva, chest an, a àn sielzût il bisiac Ivan Crico (http://ivancrico.blogspot.com) e Piero Marelli pe assegnazion dal VII premi “Biagio Marin”. La ceremonie de consegne e je stabilide li dal municipi di Grau, sabide ai 17 di Otubar a 17.30. Il concors di Grau al è calcolât il premi talian plui impuartant dedicât a la poesie in dialet.

[MOSTRIS]

Par dut il mês di Otubar, li dal municipi di Forgjarie, e restarà imbastide la mostre di Fernando Gerometta “Forgaria-Bagni Anduins, Berlino (Est), Ormuz, Beirut, Bengasi, Forgaria-Bagni Anduins”. E vegnarà screade a 18 di sabide ai 17 di Otubar, cuant che Francesco Rossi al proponarà lis sôs musichis. Par informazions: 347 0737298.

[GLESIE FURLANE]

Sabide ai 17 di Otubar, la Glesie di Concuardie e di Pordenon e celebre la “Vegle missionarie”. Di chê strade dal jubileu dal santuari, e je programade a 20.30 li de glesie di Sante Marie par sore Cueste.

[LIBRIS]

Li de Biblioteche comunâl di Concuardie, al è stât creât un ambient gnûf pe informazion e pe divulgazion. Al ven screât sabide ai 17 di Otubar a 15 cul non “Circolo Antiqui”. Al ufrissarà 3 mil imprescj bibliografics, che a insiorin un patrimoni librari di 20mil volums. Al vierzarà di martars fin joibe, 8.30-12 / 14-17.30; vinars e sabide, 8.30-12.

[MOSTRIS]

E restarà vierte fint ai 8 di Dicembar, li dal Centri “Pieri Pauli Pasolini” di Cjasarse, la mostre “La luce incisa”, che i fâs fieste al fotograf Elio Ciol (www.friul.net/dizionario_biografico.php) tal an ch’al finìs 80 agns. Oraris: martars, miercus e vinars, 15-18; joibe, 9-12; sabide, 16-20; dmenie, 10.30-12.30 /16-20.

[GLESIE FURLANE]

Domenie ai 18 di Otubar, cu la celebrazion dal ingrès a 16 li de catedrâl, al devente in plen arcivescul di Udin monsignôr Andrea Bruno Mazzocato. Clamât par dâi la volte a monsignôr Pieri Brollo, Mazzocato al rive de Glesie di Trevîs, dulà ch’al è nassût (1948), ch’al è deventât predi (1972) e ch’al à stât vescul (2004-2009), dopo di vê guidât ancje la Glesie di Adria-Rovigo (2000-2003).

[GLESIE FURLANE]

L’arcivescul gnûf di Udin al rivarà in Friûl tor 14. Il prin apontament uficiâl cu la sô gnove Glesie al è stabilît a 14.20 sul sagrât dal dom di Tisane. A Udin al rivarà a 16 pe messe grande te catedrâl. Il salût de citât lu ricevarà dal sot sindic Vincenzo Martines. La liturgje de Cene dal Signôr e sarà concelebrade dai vescui furlans Pieri Brollo, Dino De Antoni, Alfredo Battisti, Diego Causero, Tito Solari e Lucio Soravito, dal vescul sloven Metod Pirih di Koper, dal vescul di Triest Giampaolo Crepaldi e dai vescui venits Angelo Scola, Beniamino Pizziol e Corrado Pizziolo. La celebrazion e sarà trasmetude di “Radio Spazio 103” e de television “Free” (cjanâi 46 e 69).

[CONVIGNIS]

Domenie ai 18 di Otubar, a Mortean, i Osovans e i lôr amîs a fasin la sô convigne. Si daran dongje a 9.45 po, a 11.45 tal Centri Davide Paroni, Ugo Finetti al proponarà une relazion su “Resistenza e resistenze. Unità e divisioni nella guerra di liberazione”.