[INFORMAZION]

Al è publicât su la rêt des rêts il numar 100 de riviste tematiche “Alpinscena”, realizade par talian, francês, todesc e sloven di “Cipra” internazionâl, la comission pe protezion des Alps. Si pues domandâ ancje la copie stampade, domandant la direzion eletroniche.

[CULTURE]

Di chê strade des “Zornadis europeanis dal patrimoni”, il Museu archeologic di Cividât al propon apontaments ai 19 e domenie ai 20 di Setembar. Sabide a 20, a 22.15 e a 22.45, visitis guidadis a la mostre “I rituali funerari attraverso la storia” e a “Le pietre dei Patriarchi”; a 21 conciert “’900 e dintorni. Viaggio nella musica del secolo scorso”. Domenie a 10 e a 11.30, laboratori didatic “A tavola nel Rinascimento” (prenotazions obligatoriis).

[SCUELE]

A son viertis lis inscrizions pal secont an de “Scuele di politiche e di Etiche sociâl”, imbastide de Glesie udinese. I apontaments formatîfs a laran indevant dai 16 di Otubar ai 17 di Jugn. Vie pal an, si frontarà lis cuistions: “Persone e ben comun”, “Dotrine sociâl e impegn civîl”, “Culumie e lavôr”, “Sistem politic e ministratîf” e “Consens e comunicazion”. Lis lezions a colaran di vinars e di sabide, a Udin, li dal Centri culturâl “Paulin di Acuilee”. I ritîrs spirtuâi su Giuseppe Lazzati, pre’ Luigi Sturzo, Alcide De Gasperi e Giorgio La Pira a colaran di sabide, di 9 a 13.30.

[LIBRIS]

Cul librut “Quattro Lètaris ai Furlans in italiano e brasiliano”, curât di Cristine Koehler Zanella e di Gianni Nazzi, ch’al presente une cjerce dal classic dal 1966 “Letaris ai furlans” di pre’ Josef Marchet (www.friul.net/dizionario_biografico/index.php), la Clape culturâl Acuilee e à rivât adore di stampâ il centesim-tierç titul de sô strasordenarie golaine editoriâl. Te presentazion, Cristine Koehler Zanella e presente il so intindiment di ufrîur ai Brasilians e, massime, a chei di divignince furlane, ch’a vivin sore il dut a Santa Maria e tal Rio Grande do Sul, un «saggio-assaggio della cultura friulana».

[CINE]

L’anteprime dal ultin film di Alberto Fasulo, “Genitori”, e je stabilide joibe ai 24 di Setembar, a 20.45 li di “Cinemazero” di Pordenon. Tal indoman, il cine al sarà proietât a Udin, li dal “Visionario”. L’opare dal regissêr di San Vît dal Tiliment, ch’e cjacare di fameis cun fruts pidimentâts, e je produsude di “Nefertiti Film” cun “Rai Cinema”.

[AMBIENT]

Tal Parc regjonâl dai flums Reghine e Lemit e dai lâts di Cint, ancje chest an, si fasarà la “Fieste da lis Risultivis”, par valorizâ il patrimoni naturâl e il paisaç storic e gastronomic dal Friûl concuardiês. Lis manifestazions a son programadis dai 24 di Setembar ai 4 di Otubar, par cure des clapis congregadis te Consulte dal Parc. Par informazions, si pues domandâ la Biblioteche di Cint (0421 209534 int. 7). Vinars ai 25 di Setembar, la Fondazion “Santa Cecilia” di Puart e insiore l’inziative cuntun conciert a 21, li de badie di Sumaghe.

[CONVIGNIS]

L’Academie “Città di Udine”, joibe ai 24 di Setembar, e à invidât te sô abitance udinese di strade Anton Lazzaro Moro 58 Alessandro Bonomini par cjacarâ su “Cjaorêt tes memoriis dal nimì”. A 18, si resonarà sul diari dal generâl prussian Otto von Below, ch’al comandà la XIV Armade, e su la cronistorie dal generâl bavarês Konrad Krafft von Dellmensingen, organizadôr de operazion militâr. E po e sarà presentade l’opare “Tappe della Disfatta” dal tenent austriac Franz Weber, testemoni dal disastri talian e puartevôs dai comandants austroungarics.

[POLITICHE]

La convigne anuâl dal Centri pal biel acet “Pre’ Ernesto Balducci”, dai 24 ai 27 di Setembar, e celebrarà 20 agn di lote e d’impegn di “Libera”, la clape taliane cuintri di dutis lis mafiis. “Vent’anni liberi” e presentarà dibatiments, confronts, taulis tarondis, rapresentazions a Udin (li dal teatri “Giovanni da Udine”) e a Çuian di Puçui. Fra i protagoniscj, Roberto Scarpinato, Giancarlo Caselli, Lorenzo Frigerio, Enza Rando, pre’ Marcello Cozzi, Nando dalla Chiesa, Carlo Andorlini, Rosario Esposito La Rossa, Daniela Marcone, Davide Pati, Maddalena Stornaiuolo e pre’ Luigi Ciotti.

[MUSICHE]

Vinars ai 25 di Setembar, la clape culturâl “Furclap” e presente a Udin l’VIII edizion dal “Festival del Canto Spontaneo”. Apontament a 19, li de ostarie “Al vecchio stallo” cun Edda Pinzan e cun Novella Del Fabbro, cul grop corâl di Cuar di Rosacis e cul “Grop tradizionâl furlan”.

[AMBIENT]

Tulmin, vile slovene de valade dal Lusinç dapît de mont Triglav, vie pal 2016, e sarà la “Citât alpine dal an”, in gracie dal so impegn viers di un svilup sustignibil e atent a lis necessitâts des etis avignî (www.cipra.org/it/cipra/chi-siamo/reti/citta-alpina). Ai 21 di Setembar, al è stât presentât il program da lis azions di realizâ, stabilît parie cun chês altris “Citâts alpinis” dai agn passâts.