[SOCIETÂT]

Ai 17 di Setembar, Pro loco e Comun di Cimolais a presentin la IV edizion di “Profums e tradizions de Sierade tal Parc naturâl des Dolomitis furlanis: Une montagne di gust”.

[CONVIGNIS]

Lunis ai 18 di Setembar, il storic triestin Giovanni Miccoli al cjacararà a Tumieç di fassisim e di cuintrifassisim in zornade di vuê. La convigne, inmaneade li de Comunitât montane de clape “Torre Picotta” e dal Centri Balducci di Çuian, e tache a lis 20.30 cuntune jentrade di Denis Baron.

[NAZIONS]

La vôs di Georg Mischi e propon il pont di viste dai ladins su la seson dal compatât di Parîs, intal numar speciâl dal mensîl de zonte provinciâl di Bolzan “Provincia autonoma”, saltât fûr di chê strade dal cjadalan dal acuardi fra Alcide Degasperi e Karl Gruber (ai 5 di Setembar dal 1946). Magari cussì no, chel compatât – al ricuarde Mischi – al à confermât la division dai ladins dolomitans in 3 Provinciis (Bolzan, Trent e Belum).

[CINE]

La Comune di Dartigne, par memoreâ il cjadalan dal taramot, e à publicât il dvd “Un fiore dopo la Tempesta”, dulà ch’a vegnin proponûts dai «percors di memorie, 30 agns daspò». Il lavôr al presente lis testemoneancis di Umberto Merluzzi, di Luigi Brollo e di mons. Angelo Zanello e lis intervistis dai assessôrs ch’a an ministrât il Comun dal 1976 al 1990.

[AMBIENT]

Framieç dai “buchi neri dello Stivale” e jentre ancje la dighe di Ravedis, cui siei 300 miliarts di liris bielzà spindûts e chei altris 45 milions di euros ch’a coventin par rivâ insom da l’opare. Une presentazion dal progjet, inviât tai agns dal Cincuante par garantî l’irigazion e la produzion di energjie eletriche, e je proferide dal scandai “Incompiute d’Italia”, publicât tal numar di Setembar de riviste “La nuova ecologia” di “Legambiente”.

[CINE]

Ai 21 e ai 28 di Setembar, intant dai apontaments di analise de struture e dal significât dal cine par cure di Giorgio Placereani, si profondissarà l’opare di Stanley Kubrick. Lis lezions a tacaran a lis 17.30, li dal Cine Visionario. E covente la prenotazion telefoniche o eletroniche (0432 299545).

[LIBRIS]

Miercus ai 20 di Setembar, si presente a Roncjis di Mafalcon il volum “8 settembre 1943 il caso di Ronchi”. La convigne, par cure dal Institût di storie sociâl e religjose e dal Institût di storie dal moviment di liberazion di Gurize e comence a lis 18, li di vile Vicentini Miniussi. A cjacararan Franco Cecotti e Pierantonio Gios.

[DIASPORE]

Dai 20 ai 22 di Setembar, te suage des manifestazions pal congrès de “Filologjiche furlane”, a vegnaran proponudis lis iniziativis par incressi i rapuarts di amistât fra Friûl e la comunitât argjentine di Salta, dulà ch’al opere ancje un Fogolâr associât a “Friûl pal Mont”.

[NAZIONS]

L’institût ladin di Vich (Vigo di Fassa), “Majon di Fascegn”, al à publicât il numar 29 dal boletin “Mondo Ladino”. Zontât cul volum, curât di Fabio Chiocchetti e di Guntram Plangg, il dvd dal “Altant ladin sunorôs”, realizât da l’Universitât di Salzburg.

[SCUELE]

Tal an academic 2006-07, l’Universitât furlane e scree a Pordenon il prin cors di dotorât. Al frontarà la Comunicazion multimediâl e al potenzie l’ufierte didatiche dal Dipartiment di Siencis e tecnologjiis multimediâls dal pôl pordenonês dal Ateneu, che in curt al varà la sô abitance li di palaç Badin.