[MUSICHE]

Par fiestezâ il XXX cjadalan, la corâl “Claudio Monteverdi” di Rude i ufrìs a la sô comunitât la manifestazion “Note di fine Estate”. Il spetacul cul sopran Eva Zampieron e cul duo pianistic Helena e Radomir Melmuka di Praghe al tache a lis 21 di joibe ai 14 di Setembar, li di vile Toppani.

[ECONOMIE]

Ancje vie pal 2005, la “Rizzani de Eccher Spa” e je cressude. Rivade al LXXI puest te classifiche mondiâl des impresis di construzion, e à vût un util net di 5,1 milions di euros cuntun valor complessîf de produzion di 418,2 milions di euros. An passât, la dite di Cjargnà di Puçui e à lavorât in Tajikistan, Quatar, Russie, Canadà, Chine, Usa, Arabie Saudite, Italie e a Dubai. L’imprese furlane, ai 23 di Març dal 2006, e à aderît al protocol “Global compact” dal “Onu” pal rispiet dai derits dal om, dai derits dai lavoradôrs e pe responsabilitât ambientâl.

[SPORT]

Al è l’udinês Gianpaolo Tosel il gnûf judiç sportîf de schiriis “A” e “B” di balon. Lu à nomenât il comissari de Federazion taliane dal balon “Figc”, cul compit di stabilî lis scualifichis e lis multis, scrutinant lis decisions dai arbitris. Tosel al à stât sostitût de Procure e procuradôr circondariâl a Udin e procuradôr gjenerâl a Vignesie.

[SOCIETÂT]

La Comunitât colinâr e fâs memorie dal XXX cjadalan dai taramots dal mês di Setembar dal 1976, ch’a an causionât il sfolament dai paîs marturizâts su la marine adriatiche. Un conciert, li dal cjiscjel di Cjassà, al tacarà a lis 21 di vinars ai 15 di Setembar. La corâl “Gotis di Notis” e presentarà il spetacul “Par maj e par simpri”.

[SCUELE]

Vinars ai 15 di Setembar, a San Zorç de Richinvelde, il cjadalan dal taramot dal 1976 al ven memoreât li de Biblioteche, dulà che Gianni Colledani al presente il libri “A flagjelo taramoto liberanus Domine”. L’opare le an curade i fruts de Scuele mezane di Travês e Sandra Lenarduzzi. La jentrade e je de poete Novella Cantarutti.

[AMBIENT]

Dai 15 ai 17 di Setembar, lis clapis impegnadis te protezion dal Tiliment si dan dongje pes manifestazions “Tagliamento Acquambiente. Scopriamo le ricchezze del re dei fiumi alpini”. I apontaments a vegnaran proponûts a Caprizi di Soclêf.

[CINE]

8 cines dal mês di Setembar fin Decembar: al è il program prontât dal circul “Cinemanova” di Palme, te suage dal cineforum “Le Folle e il Folle”. I apontaments a tachin ai 15 di Setembar (“I lunedì al sole” di Fernando León de Aranoa) e a van indevant di vinars a lis 20.30 li dal Auditorium San Marco.

[POLITICHE]

Sabide ai 16 di Setembar, la clape dai sindics de riconstruzion e propon une convigne par rifleti sun “Int e instituzions tal taramot”. Lis voris a tachin a lis 9 li dal cjiscjel di Udin.

[GLESIE FURLANE]

Dai 16 ai 17 di Setembar, la Glesie di Plodn/Sapade e fâs il so tradizionâl piligrinaç a Maria Luggau, començât passe 200 agn indaûr. I piligrins a partissin a lis 3 di gnot di sabide de glesie di Z’Plodn/Cime par rivâ a Luggau tor 14.15. A lis 7.45 di domenie a cjantaran messe li dal santuari carintian e po a tornaran a partî par tornâ cjase. Il piligrinaç al finìs a lis 19.30 li de glesie di Sante Margarite cul cjant dal “Te Deum”.

[DIASPORE]

Isal just che lis gjernaziis dai emigrants straplantadis tai Paîs da l’Europe (tant comunitarie che ancjemò su la strade da l’adesion a la “Ue”) no sedino judadis a recuperâ la lôr citadinance taliane, tal câs ch’a sedin stadis obleadis a pierdile par colpe di ditaturis e di ribaltons politics dai timps passâts? La cuistion al torne a proponile mediant dal lûc internet www.friul.net Salvatore Roman-Vals, citadin rumen di divignince furlane, ch’al vîf a Tulcea e ch’al è component de “Icas-Comunità italiana”. I siei vons a jerin di Borc Vals di Pofavri (Frisanc).