[NAZIONS]

Invidât a Trent par memoreâ il cincuantenari dai Compatâts di Londre firmâts di Degasperi e di Gruber, in dite da l’Italie e da l’Austrie, par distrigâ la cuistion tirolese, Giulio Andreotti al à palesât cence pêl in bocje che «cence dal intervent di De Gasperi, il Sud Tirol al sarès passât sot di Viene, dal moment che ju Anglês a poiavin l’Austrie».

[NAZIONS]

Te ultime convigne dal “Club di Visegrad”, l’argagn ch’al cjape dentri i guviers di Polonie, di Slauachie, di Cechie e di Ongjarie, i sorestants di Budapest a an protestât pai fats di razisim cuintri de comunitât ongjarese ch’e vîf in Slauachie. Ancje il Consei d’Europe ur à domandât ai sorestants di Bratislave di condanâ l’intolerance etniche pe comunitât magiare, ch’e rapresente il 10% de popolazion slauache. Sun posizions cuintriongjaresis al è il “Partît nazionâl slauac” che di cualchi timp al è jentrât te maiorance di Bratislave.

[MOSTRIS]

Si pues visitâ fintremai ai 15 di Setembar, la Cjase-museu de civiltât contadine di Plodn/Sapade, imbadiste tal Borc Cretta. L’orari dal Istât al è: 17-19, ducj i dîs, di lunis fin sabide.

[SPORT]

Sabide ai 9 di Setembar, la societât sportive “Libertas” e propon la XV edizion dal trofeu internazionâl di atletiche lizere pe zoventût “Citât di Majan”. La manifestazion e tache a lis 14, li dal stadi comunâl.

[TEATRI]

A ’nd è timp fint ai 31 di Otubar par dâsi in note pal an academic 2006-07 de Academie civiche d’art dramatiche Nico Pepe di Udin.

[TEATRI]

Tal lûc internet www.ilrossetti.it, si cjatin lis schedis dai spetacui e il “dépliant” de seson teatrâl 2006-07 dal Teatri stabil triestin “Rossetti” (http://www.ilrossetti.com/IlRossetti-stagione-2006-2007.pdf). In spiete dal “Teatri stabil furlan”, domandât de petizion “Il teatri che nus covente” (www.friul.net), l’instituzion juliane e à ancjemò il non di “Teatro stabile del Friuli-Venezia Giulia”, ancje se i siei sorestants a son çontefûr di nomine triestine.

[CULTURE]

Fintremai ai 18 di Setembar, tal Friûl ocidentâl, a tirin adilunc i apontaments de rassegne “Musae. Percors culturâi in provincie”. Concierts e mostris a vegnaran proponudis a Cimolais, Barcis, Andreis, Montreâl, Davian, Pulcinic, Cjanive, Purcie, Sacîl, Brugnere, Fane, Pinçan, Secuals, San Quarin, Cordenons, Volveson, San Vît dal Tiliment, Morsan, Sest e Cjons. Par informazions: 0434 231342.

[DIASPORE]

Ancje la comunitât furlane e cjaparà part a la fieste dai emigrants inmaneade te citât argjentine di Rosario ai 10 di Setembar. Intant dai apontaments li dal “Parque de Italia” a saran popolarizadis lis recipis de cusine regjonâl.

[ECONOMIE]

Te suage de fieste “Arlois e Fasois”, par cure de “Pro Val Pesarina”, domenie ai 10 di Setembar a lis 15.30 si fasarà une riunion par discori su “Il compit dai agriturisims pe valorizazion dai prodots gjavâts des plantis autoctonis”. La convigne e à il patrocini dal Dipartiment di Siencis agrariis e ambientâls de Universitât furlane.

[CULTURE]

L’Institût di storie sociâl e religjose di Gurize al organize une visite in Trentin e in Sud Tirol par visitâ la mostre dal Romanino a Trent e l’esposizion “I protetôrs de diocesi te leiende, tal cult e tal art” a Brixen/Bressanon. Par dâsi in note: cul telefon lunis, 13.30-17; martars-vinars, 8.30-13.30 al numar 0481 530392; o par pueste eletroniche.