[ECONOMIE]

Ancje il câs dal Friûl concuardiês sot di Vignesie ch’al smire la riunificazion ministrative cul rest de Patrie al è frontât te tese di dotorât discutude li de Universitât Ca’ Foscari a Vignesie di Paolo Zulian. La sô tese di laureade trienâl “Analisi della convenienza per alcuni Comuni del Veneto al cambio di Regione” e je stade presentade a la Facultât di Economie. In zornade di vuê, a an organizât referendums pal passaç di Regjon i Comuns furlans di San Micjêl, di Tei, di Cint, di Pramaiôr e di Gruâr.

[GLESIE FURLANE]

La dì de Madone di Setembar, lis Glesiis di Gurize e di Udin a celebrin i piligrinaçs anuâi a Barbane e a Madone di Mont. I piligrins udinês a partissaran a pît di Cjararie di Cividât a lis 15 di vinars ai 8 di Setembar e a lis 17.30 a cjantaran messe. Chei dal Friûl orientâl a saran guidâts dal vescul Dino De Antoni ch’al cjantarà messe a lis 10 li dal innomenât santuari su l’isule daprûf Grau.

[ART]

Vinars ai 8 di Setembar, te suage de X Mostre internazionâl di architeture di Vignesie, si scree la mostre “Formula new Lubljana”. L’apontament al tache a lis 19 li dal padilion sloven.

[NAZIONS]

Fintremai ai 17 di Setembar, a Lusérn, la vile cimbre dal Trentin, e je vierte la cjase museu “Haus von Prükk”, in place Pill. Il museu dal Centri di documentazion di Lusérn al è viert cul orari: 10-11.30 / 15-17.

[MUSICHE]

Ai 8 e ai 10 di Setembar, su la place da la Transalpine, “Zavod” Gong di Nova Gorica e “Centro Servizi Culturali Internazionali” di Gurize a presentin “Squarci di Pace - Go Rock 2”, rassegne di musiche cun 10 oris di concierts.

[NAZIONS]

Ju Institûts ladins “Micurà de Rü” e “Cèsa de Jan”, vinars ai 8 di Setembar a lis 20.30 li de cjase dal Comun a Anpezo, a presentin il libri di Eugen Trapp “Testimonianze di storia e d’arte nelle valli ladine”. L’opare e je la prime ch’e proferìs in mût unitari i tesaurs artistics des 5 valadis ladinis: Badie, Gherdene, Fasse, Plêf e Dimpeç. Tal 2003, il volum al è za saltât fûr par todesc.

[SOCIETÂT]

Religjon e culture a saran ju ingredients de fieste de Madone Inmacolade di Malisane, dai 8 ai 10 di Setembar. La comunitât di 460 animis cul so plevan, pre’ Oreste Zorzenon, si daran dongje domenie, a lis 10.30 pe messe grande e pe prucission des 20.30. A fasaran servizi la corâl “La Colone” e la bande “Rossini” di Cjasteons di Strade. Daspò messe, a saran presentâts i libris: “Malisane: la vite e la economie di un piçul borc rurâl inte Basse furlane dal ’600” di Lodovico Rustico e “Santuts e preieris-Il respîr de anime furlane” di Anita Salvador.

[CONCORS]

La zoventût dai 15 ai 25 agn a an timp fint ai 20 di Setembar par cjapâ part al concors “cinegiovani” par senegjaduris e curtmetraçs. Il premi al è organizât de clape culturâl cjargnele “Elio cav. Cortolezzis” di Trep. Par informazions: 349 2159118.

[TEATRI]

Dai 4 di Setembar, si pues fâ l’abonament pe seson udinese dal teatri “Giovanni da Udine”. Fintremai ai 12 di Setembar ducj i vielis abonâts a podaran confermâ il so puest. Ai 13, ai 18 e ai 22 di Setembar a tachin lis fasis seguitivis, risiervadis pai abonâts gnûfs e pai abonâts ch’a intindin di mudâ abonament. La Bilietarie e restarà vierte di lunis fin sabide, 9.30-12.30 / 16-19.

[SOCIETÂT]

La int di Raviei e pant il so agrât par ducj chei che le an socorude tal indoman dal taramot. La fieste de solidaritât e dal ringraziament e tache sabide ai 9 di Setembar, a lis 18 li dal municipi, cul benvignût a ducj i ospits-benefatôrs. A lis 20.30 li dal ricreatori i zovins a presentin il documentari “Raveo ed Esemon di Sopra. Dalla tragedia alla speranza: 1976-2006”. Domenie a lis 10.30 mons. Guerrino Marta al cjante messe, compagnât de corâl “Las vosutes di Raviei”. Daspò dai salûts dai sorestants, e vegnarà proponude une spassizade gastronomiche par mangjâ une bocjade tes cjasis dal paîs, visitant i borcs là ch’a jerin i cantîrs de riconstruzion: “Vedue-Fravins”, “Canoniche”, “Margel”.