[SCUELE]

Vinars ai 29 di Setembar par celebrâ la Zornade internazionâl de alfabetizazion (8 di Setembar), il Club Unesco di Udin al organize une convigne a lis 17, li di palaç Florio, abitance de Universitât furlane in vie Palladio 8. Livio Sossi al frontarà la cuistion: “I nuovi analfabeti” e Maura Pontoni e cjacararà di “Esperiencis di alfabetizazion lenghistiche sul teritori”. La jentrade le fasarà la presidente dal club udinês Renata Capria D’Aronco.

[DIASPORE]

E je dedicade ai moviments migratoris da l’Europe di soreli jevât la III edizion di “Ator pal mont”, manifestazion su lis migrazions par cure de clape “Gentes” di Grions de Tor. I apontaments a vegnaran proponûts dai 29 di Setembar ai 8 di Otubar a Grions di Paulêt, a Remanzâs e a Udin.

[ECONOMIE]

La Propietât coletive di Pesariis e smire di valorizâ la culture matereâl dal Cjanâl di San Canzian cuntun progjet di promozion didatiche e turistiche. La presentazion de iniziative e je stabilide par vinars ai 29 di Setembar, a lis 17 li dal Centri frazionâl.

[SOCIETÂT]

La clape gurizane “Concordia et pax”, vinars ai 29 di Setembar, e organize une visite a Lubiane, par memoreâ lis vitimis civîls de ocupazion fassiste (1941-1943) e i militârs talians muarts intant de prime vuere e sapulîts li dal cimitieri central. E sarà visitade ancje la mostre su lis depuartazions dal 1942 imbastide li dal “Muzej Novejse Zgodovine”. Par informazions: 333 3561718 - 0481 530193 (des 16 a lis 17.30).

[AMBIENT]

E tache vinars ai 29 di Setembar, la visite di Donatella Murtas in Friûl. L’esperte taliane di ecomuseus a lis 17 e anime un ’seminari par insegnants li de Direzion didatiche di Glemone (in strade dai Pioppi). Sabide 30 a lis 16.30 e interven a la scree de mostre dal fotograf Albano Quiattini, li dal museu di “Mulino Cocconi” a Ospedâl Piçul.

[MOSTRIS]

Dai 29 di Setembar ai 17 di Decembar, li de glesie di San Laurinç di San Vît dal Tiliment, une grande mostre monografiche e siere lis celebrazions in onôr dal pitôr Pomponio Amalteo (1508-1588), protagonist da l’art furlane dal XVI secul. L’esposizion e je intitolade “Pomponio Amalteo pictor Sancit Viti (1508-1588)”.

[LIBRIS]

L’institût “Achille Tellini” di Manzan, cu la clape “I Viandants” e la Glesie di Basilian, al organize la presentazion dal libri di Anita Salvador “Santuts e preieris, il respîr de anime furlane”. La convigne e tache vinars ai 29 di Setembar, a lis 20.30 li de glesie parochiâl di Basilian. “I Viandants” e la Cantorie di Basilian a animaran la serade.

[CONVIGNIS]

La clape “Bilanci di Giustizia” e il “Grop di compre solidâl” di Udin e di Çuian a organizin une convigne su “Detersîfs e ambient: instruzions par un ûs sustignibil”. La riunion e tacarà a lis 20.30 di vinars 29, li dal circul “Nuovi Orizzonti” (vie Brescia 3) ai Riçs di Udin. Reladôr Fabrizio Zag.

[AMBIENT]

“Scarpe&Cervello”, il program di escursions di “Legambiente”, sabide ai 30 di Setembar e domenie I di Otubar, al propon un fin di setemane sul Cjars gurizan, in colaborazion cul parc rurâl “Alture di Polazzo”.

[SCUELE]

Vinars ai 29 di Setembar, a lis 17 in vie Bellini 3 di Gurize, la “Filologjiche” ur consegne ju atestâts ai arlêfs dai cors di formazion di lenghe furlane par insegnants. Chê istesse ceremonie e vegnarà proponude ancje a Tumieç, vinars ai 6 di Otubar (a lis 17, li di cjase Gortani) e vinars ai 13 di Otubar a San Vît dal Tiliment (a lis 17, li dal municipi).