[SCUELE]

Tal lûc internet: www.cecudine.org, si cjate il program di dutis lis iniziativis didatichis programadis dal Centri espressions cinematografichis pal an scuelastic 2006-07.

[SOCIETÂT]

Tal XXX cjadalan dal taramot, il Comun di Buje al à curât une publicazion preciose. Te opare “Il grazie di Buja” a son memoreâts ducj chei ch’a an operât par solidaritât tai mês dramatics de emergjence e des primis fasis da la riconstruzion dal 1976: personis sengulis e clapis, instituzions e paîs, Glesiis, citâts talianis e forestis…

[CONCORS]

Al torne il concors dal progjet integrât dai Comuns di Buris, di Cjopris, di Cuar di Rosacis, di Manzan, di Pavie, di Pradaman, di Premariâs e di San Zuan di Manzan “Vilegnovella dal Judri”. Il premi leterari al è risiervât a contis par grancj, par talian e par furlan, e contis par fruts, par talian e par furlan, cuntune sezion risiervade ai autôrs forescj ancje inmigrâts. La consegne des oparis sul teme “Piccole storie di terra” e scjât ai 12 di Mai dal 2007.

[CINE]

Fintremai ai 5 di Novembar, la galarie “Sagittaria” di Pordenon e propon la mostre “Prima dei Lumière” cui documents e i ogjets sul cine de colezion Carlo Montanaro di Vignesie. Si jentre sorenuie tai dîs di vore 16-19.30; tai dîs di fieste 10.30-12.30 / 16-19.30, gjavât il I di Novembar.

[ECONOMIE]

La Regjon Venit, mediant di “Veneto agricoltura” e in gracie dal progjet “PrIsma”, e à prontât un cors di formazion “on line” par imprendidôrs biologjics. Il progjet al è intitolât “Gjestî l’aziende agricule biologjiche: lis sieltis imprenditoriâls”.

[ECONOMIE]

L’agriculture biologjiche de Furlanie e je daûr a cressi, planc a planc ma in mût constant. Lu à pandût “Aprobio”, comunicant che lis aziendis ch’a operin tes 3 provinciis furlanis e in chê di Triest a son 398 (+5,3% a pet dal 2004) e a coltivin passe 3 mil etars.

[CONVIGNIS]

La convigne internazionâl de Fondazion “Niccolò Canussio” di Cividât, chest an, e frontarà la cuistion dai indigjins, dai grêcs e dai romans te Asie minôr, fra Soreli jevât e Soreli amont. L’apontament al è dai 28 ai 30 di Setembar a Cividât.

[ECONOMIE]

La Pastorâl dal lavôr des Glesiis di Concuardie e di Vittorio Veneto a organizin un confront fra il secretari talian di “Filca-Cisl” e la presidente dai industriâi dal Friûl ocidental, Cinzia Palazzetti, sul compit dal sindicât e dai imprendidôrs par coniugâ cualitât di vite e di lavôr. La riunion e tache a lis 20.45 di joibe ai 28 di Setembar, li dal oratori de Glesie di Maron di Brugnere.

[TEATRI]

E torne la seconde edizion de rassegne “’900Civile”. Li dal “Deposito Giordani” di Pordenon, Assoprosa, Comun e Ent regjonâl teatrâl a presentaran i spetacui “Sexmachine” di Giuliana Musso ai 28 di Setembar; “La Turnàta” di Nicola Bonazzi e Mario Perrotta ai 4 di Otubar; “Mobbing!” di Giulio Baraldi ai 19 di Otubar; e “Corpo di stato” di Marco Baliani ai 27 di Otubar. Lis rapresentazions a tachin a lis 21.

[CINE]

Dai 28 ai 30 di Setembar, la “Setemane internazionâl de critiche”, daspò di jessi stade presentade a Vignesie, e rive in Friûl tornant a proponi i siei 7 cines li dal teatri “Zancanaro” di Sacîl. Lis oparis proietadis a saran une argjentine, une ongjarese, une merecane, une polonese, une francese, une canadese e une di Taiwan.