[LIBRIS]

Dai 22 ai 24 di Setembar, e torne la rassegne “pordenonelegge.it”, barcon su lis letaris e sui autôrs plui innomenâts. Fra i protagoniscj: Bella Achmadulina, Vladimir Sorokin, Vladimir Bukovskij, John Coetzee, Erica Jong, Daniel Dennett, Vladimir Sorokin, Mauro Corona, Cristina Comencini, Stefano Zecchi e Joanne Harris. Il program dal festival al è su la rêt.

[SCUELE]

I retôrs Furio Honsell (Ateneu furlan) e Gianfranco Rebora (Ateneu Cattaneo di Varese); l’autôr Renato Stella; il diretôr dal Dipartiment di Sociologjie de Universitât di Padue; Enrico Sartor, diretôr dal Consorzi universitari di Pordenon; e Michele Lorenzon, president dal Consei dai students de Universitât di Udin, a saran i protagoniscj dal confront sul gnûf an academic, programât a Pordenon, sabide ai 23 di Setembar, a lis 18 li dal teatri “Verdi”. La riunion, te suage di “Pordenonelegge.it”, e je motivade dal libri “Lettera a una studentessa” dal editôr di Puart “Nuovadimensione”.

[CULTURE]

Sabide ai 23 di Setembar, il Fogolâr di Mafalcon, di chê strade dal congrès de Filologjiche, al organize la rapresentazion “Furlans dal Teritori”, in memorie di Enos Gerin e di Vico Bressan. A is 18, li de “Rotonda del Mercato Nuovo” (vie de Resistenza), recitazion di Massimo Somglino e cjantis de corâl “Lorenzo Perosi” di Flumisel, direzude di Italo Montiglio.

[MUSICHE]

L’associazion regjonâl des bandis autonimis “Anbima”, sabide ai 23 di Setembar, e organize la XXVII rassegne bandistiche di Udin. Su lis stradis e su lis placis de citât a sunaran, des 15.30, 31 grops musicâi cun passe mil sunadôrs.

[TEATRI]

Sabide ai 23 di Setembar, il “Teatro Incerto” al scree la X edizion di “Risate a Gradisca”, la rassegne teatrâl tes lenghis dal Nordest. Fabiano Fantini, Camilla Frontini e Claudio Moretti a presentin “Muradôrs” (une produzion “Css”). I spetacui a tacaran ducj a lis 20.45, di de sale “Bergamas” di Gradiscje Imperiâl. E organize la clape culturâl “Gradisca.., il Teatro”.

[MUSICHE]

A lis 20.30 di sabide 23, li de capele de Madone di Lourdes di Paulâr, “Carnia in Movimento” e organize une fieste pai 70 agns dal musicist Giovanni Canciani, fondadôr dal museu paularin “La Mozartina”. L’orchestre d’arcs “Jacopo Linussio” e la corâl “S. Ilario” a proponaran bocons dal mestri cjargnel e di Mozart.

[CONCORS]

Sabide ai 23 di Setembar, a lis 20.30, il Comun di Romans al presente la III edizion dal premi leterari “Tieris dal Lusinç tra memorie e avignî”, in memorie di Celso Macor. La serade e ven proponude li de glesie de Madone Lauretane, a Vierse. L’atôr Giorgio Monte al learà tocs in prose compagnât dal “duo” Daniela Bon e Mauro Bregant.

[CULTURE]

Domenie ai 24 di Setembar, la “Filologjiche” si da dongje a Mafalcon pal congrès anuâl. La manifestazion e tache a lis 10 in place de Republiche. La convigne e comence a lis 10.30 cuntun’esibizion de corâl dal “Collegio del Mondo unito” di Duin. Ferruccio Tassin po al presentarà il numar unic “Monfalcon”. A lis 18, messe grande par furlan li dal dom di Sant’Ambrôs.

[GLESIE FURLANE]

Cemût continu e miorâ il rapuart cu la Mariglesie di Aquilee? Cualis sono lis perspetivis ch’a divegnin de memorie dai sants vescui e dai paris di chê Glesie che Zuan Pauli II al à metût in zornade e ch’al à tornât a proponi cun sapience te sô visite dal 1992? A son lis cuistions che, daspò de visite pastorâl, il vescul di Gurize, Dino De Antoni, al rispuint tal so document finâl “A servizi di Crist sperance dal mont”, spedît a dutis lis Glesiis dal Friûl orientâl.

[MOSTRIS]

Li de innomenade “Metro Hall Rotunda”, la galarie dal municipi di Toronto, dai 24 di Setembar ai 4 di Otubar, l’associazion culturâl di Udin “Il Parnaso” e propon la mostre coletive “Paesaggi e figure d’Italia: Il Friuli”. A an curât l’esposizion il president Domenico Allescia e il regjissêr italo-canadês Frank Spezzano. Par informazions: 0432 523038 (tel. e fax).