[SOCIETÂT]

Uficialmentri i triestins a son i miôr a prontâ progjets. A motivin cussì stampe e puartevôs dal mont dal volontariât il fat che la Regjon Friûl-V. J., cu la sô leç a pro dal servizi civîl volontari (64/2002), e à destinât di finanziâ 120 puescj fra chei domandâts de Aziende sanitarie di Triest, a pet di 194 puescj disponibii in dut e par dut. I progjets presentâts di dutis lis provinciis a jerin 67 par 450 puescj, ma lis risorsis a disposizion a àn rivât a finanziânt dome une vincjine concentrantju te citât juliane.

[SPORT]

La “Pro Val Pesarina”, domenie ai 8 di Lui, e organize la XVII edizion de marcje no competitive fin sul al ripâr De Gasperi “Scarpon 2007”. Lis inscrizions a son viertis des 8 a lis 9, li dal Otel Pradibosc. Si partìs a ls 9.

[CINE]

Vie pai mês di Lui e di Avost, e torne a Grau la manifestazion “Laguna Movies” cun proiezions, convignis e escursions. Par informazions su la IV edizion: 0431 898212.

[POLITICHE]

Fra i articui dal prin numar dal 2007 de riviste gurizane “Nuova Iniziativa isontina”, a ’nd è un di Ferruccio Tassin dedicât al centenari de vitorie eletorâl dal Partît catolic popolâr furlan, che intal 1907 al puartà doi siei puartevôs, Luîs Faidutti e Josef Bugatto, sui bancs dal parlament di Viene. Il saç al è intitolât “La vittoria del 1907. I deputati cattolici Faidutti e Bugatto, speranza per la nostra gente”.

[CORS]

A son viertis lis inscrizions pai cors di mosaics inmaneâts de Fondazion fruts e autisim di Pordenon (segreteria@bambinieautismo.org). Te suage dal Istât pordenonês, a duraran 8 oris e a son destinâts ai principiants. Apontament li de “Officina dell’Arte” di strade Molinari 41 ai 17 e ai 18 e po ai 24 e ai 25 di Lui.

[AMBIENT]

Ancje tai mês di Lui, di Avost e di Setemabr a van indevant lis visitis organizadis li dal Parc des Prealps Juliis. La pluipart dai apontaments a colin di domenie e di sabide. Cualchi volte la prenotazion e je obligatorie. Par informazions: 0433 53483.

[MOSTRIS]

Clamant il numar 0432 856958, si pues visitâ il “Museu dal scus e dai vencs”, imbastît in place de Cente, a Reane, li de sale pes mostris. Al conte la storie de cooperative artesane dai scartossârs furlans, nassude dal 1964 in gracie di pre’ Mario Fabrizio, e operative fintremai tal 1987.

[GLESIE FURLANE]

Dai 9 ai 27 di Lui, Pape Benedet al polsarà fra lis monts dal Cjadovri, a Lorenzago, tal istès puest là ch’al jere stât par 6 viaçs ancje Pape Zuan Pauli II. Di chê strade il Pape, ch’al ven de regjon bavarese leade par antîc cu la metropolie di Aquilee, al torne intune des tieris aquileiesis. Il Cjadovri, difat, in plui che componente politiche de Patrie dal Friûl, al è stât ancje leât cu la Glesie diocesane di Udin fintremai tal 1800.

[CONVIGNIS]

Lunis ai 9 di Lui, li dal Palaç des professions di Udin, l’avocat Gianni Zgagliardich al cure il ’seminari di profondiment su la risoluzion des litighis ch’a puedin saltâ fûr intant di un apalt public. A son invidâts professioniscj, progjetiscj, diretôrs di lavôrs publics, funzionaris, imprendidôrs e tecnics d’imprese.

[MUSICHE]

Lunis ai 9 di Lui, il Comitât di san Florean al propon a Tumieç la “Messa da Requiem” di Giuseppe Verdi. L’esecuzion dal “Sofia festival Orchestra” e de corâl nazionâl di Sofie e tacarà a lis 20.30, li dal dom di Tumieç.