[TEATRI]

A rivin in Friûl di dutis lis regjons da l’Europe centrâl i protagoniscj dal “Puppet festival” di Gurize, inmaneât dal “Cta” vie pai mês di Lui, di Avost e di Setembar.

[NAZIONS]

La capitâl austriache ur da acet a dôs mostris sul art dai aborigjins austalians. Fintremai ai 28 di Lui, li de Galarie Wolfrun (Augustinesatrasse 10), e sarà vierte la rassegne “Aboriginal Art Now - Contemporary Australian Art” (www.wolfrum.at). L’Albertina di Albertinaplatz 1, impen, e propon insin ai 26 di Avost “Desert Dreaming - Australian Aboriginal Art” (www.albertina.at).

[LIBRIS]

A son 4 i volums stampâts fin vuê de Associazion culturâl “Carlo Cattaneo” di Pordenon. La golane “Europe. Confront di dibatiments e di ideis” e cjape dentri lis ricoltis di contribuzions sul avignî des euregjons (“Euroregioni quale futuro”) e sul miscliçaments des culturis (“La nostra libertà e le altre culture”) e dôs oparis dal inteletuâl olandês Pim Fortuyn (1948-2002), sassinât a Hilversum e sapulît in Friûl, a Provesan: “Contro l’islamizzazione della nostra cultura” e il tratât religjôs-sociologjic “La società orfana”.

[SALÛT]

Ai 5 di Lui al comence un percors informatîfs pes fameis dai malâts di Alzheimer e di altris demencis, par cure dal Ambit sociâl e assistenziâl di Tarcint e de Associazion Alzheimer di Udin. Lis convignis sul aiût mutuâl a tacaran a lis 18 di joibe ai 5 di Lui e a laran indevant ai 12, ai 19 e ai 26 di chest mês, li di vile Pontoni in vie Frangipane 24 di Tarcint.

[INFORMAZION]

Il centri florentin pai popui menaçâts al segnale lis ultimis publicazions su lis nazions cence stât da l’Europe. “Etudes Tsiganes” 27-28 al fronte la cuistion des migrazion ziganis (www.etudestsiganes.asso.fr/presentationrevue.html. “Le peuple breton” dal mês di Jugn al tamese lis votazions in France (www.udb-bzh.net). Di elezions in Gales e in Scozie al scrîf ancje il galês “Planet” di Jugn e di Lui (www.planetmagazine.org.uk). La cuistion corsicane e je tamesade di “U Ribombu Internaziunale” (www.uribombu.com).

[NAZIONS]

Fra i colaboradôrs furlans de riviste “Lem”, curade dal “Bersntoler Kulturinstitut” di Palai en Bersntol (Trent), in plui di Velia Plozner di Tischlbong/Tamau e di Lucia Protto di Zahre/Sauris, al è ancje il diretôr dal Servizi regjonâl pes identitâts lenghistischis e culturâls, Marco Stolfo. Tal numar 9/10 al à scrit su “Editorie e minorancis lenghistichis” e al à dismenteât, fra l’altri, i dizionaris di Gianni Nazzi e de “Clape culturâl Aquilee” e il lûc internet www.friul.net (che di agn ju proferìs ai navigadôrs di dut il mont).

[MUSICHE]

Dai 5 ai 29 di Lui, al torne “Folkest” il plui impuartant festival furlan di musiche folk. Al proponarà musiche di cualitât par dute la Patrie, in Istrie e a Triest.

[NAZIONS]

Joibe ai 5 di Lui, a Gradiscje Imperiâl, e tache la V edizion dal “Ethnic festival”, cun musiche, bal, spetacui, culture e convignis. Ju apontaments a laran indevant fintremai ai 8 di lui, te place da l’unitât.

[MOSTRIS]

La Galarie dai dissens e des stampis e il Museu furlan de fotografie, joibe ai 5 di Lui, a presentin a Udin la mostre “di castelli friulani”, ch’e confronte i dissens di Antonio Pontini e lis fotografiis di Attilio Brisighelli. La convigne a lis 18.30 par cure di Cristina Donazzolo Cristante.

[MUSICHE]

Si varà timp insin ai 20 di Lui par presentâ lis cjançons par bisiac destinadis al “Cantafestival de la Bisiacarìa”. Mediant di une selezion, po, a saran sielzudis lis oparis ch’a cjaparan part a la IV edizion dal concors.