[DIASPORE]

Dai 27 ai 29 di Lui, ju ex emigrants de valade de Tor si dan dongje a Bardo/Lusevare pe lôr fieste anuâl. In plui de musiche e dai gustâs dal emigrant (sabide a lis 19 e domenie a lis 13), a vegnaran proponudis la mostre “Antighis inmagjinutis devozionâls dai santuaris marians di Alp Adrie protetôrs dai emigrants” e il romanç di Dino Del Medico “Cioccolata salata”. A is 11.30 di domenie 29, e vegnarà cjantade messe li de glesie parochiâl.

[MOSTRIS]

Dai 27 di Lui ai 26 di Avost, li de Scuele mosaiciscj dal Friûl di Spilimberc, e je imbastide la mostre “Mosaico&Mosaici 2007” cui lavôrs dal ultin an scuelastic. Si podarà visitâle ducj i dîs de setemane: 10.30-12.30 / 17-20.

[DIASPORE]

Sabide ai 28 di Lui, la Provincie di Pordenon e consegne i premis “Durì di Pordenon”, par onorâ i emigrants dal Friûl ocidentâl.

[CULTURE]

La Comunitât “Piergiorgio” di Cjanive di Tumieç, sabide ai 28 di Lui, e ospite la presentazion dal libri di poesiis di Giovanna Nieddu “Un pezzo a piedi”. La serade e tacarà a lis 20.30. Daspò dai salûts di Nives Baldacconi, presidente de Comission cjargnele pes oportunitâts avuâls, e di Carlo Sanna, prsident regjonâl de clape dai sardegnûi ch'a vivin in Friûl, al cjacararà Igino Piutti. Po a saran letis lis poesiis de Nieddu cun framieç bocons musicâi par cure dal mestri Jhonny Dario.

[AMBIENT]

La fieste par salvâ il zardin di cjase Candussi di Romans di Gurize e tache a lis 18.30 di sabide ai 28 di Lui. Une part de popolazion si opon a la decision dal Comun di realizâ, li dal parc, une schirie di cjasis “Ater”, salvant un spazi dedicât al vert e a la ricreazion. Tal paîs dal Friûl orientâl la int e je daûr a cressi pal fat che cetancj monfalconês e triestins a decidin di stabilîsi chenti cirint cuiete e bonstâ. La fieste e tirarà adilunc fin daspò miegegnot.

[CULTURE]

Sabide ai 28 di Lui, a lis 18 li de place Italie, si scree la XLVII edizion dal “Festival di Majan”, ch’al proponarà une mostre antologjiche di Primo Dri, il IV concors di piture “Citât di Majan”, la XL mostre dal artesanât e il XVIII “Hobbycolli”.

[CONVIGNIS]

Ai 28 e ai 29 di Lui, “Carnia in movimento” e organize dôs zornadis dedicadis a l’invasion dai cosacs. A lis 17.30 di sabide, li dal agriturisim “Bosc di Museis” di Çurçuvint, discussion cun Fulvio Salimbeni, Leonardo Zanier e Gianfranco Ellero e a lis 21 proiezion dal documentari “Kosakenland in Italien”. Domenie 29, da lis 20, testemoneancis e teatri cun Giovanni Canciani, Giovanni D’Artegna, Leonardo Zanier, Dolores Job, Massimo Somaglino e Francesco Guadagni.

[GLESIE FURLANE]

In gracie de “Libreria editrice vaticana” e di chê strade da la fieste dai sants fondadôrs Ermagure e Furtunât, e je saltade fûr la ristampe anastatiche dal “Missale aquileyensis ecclesie” dal 1517. L’edizion, par cure di pre’ Giuseppe Peressotti, e torne a proponi un origjinâl tignût cont a Parme, stant che i volums presints a Gurize e a Udin a son mutilâts. Prime de edizion dal 1517, il Messâl aquileiês al jere stât stampât tal 1491 a Augsburg/Auguste e altris 4 voltis a Vignesie. L’ultime edizion e je stade chê dal 1519. A l’imprese editoriâl al à colaborât ancje l’institût “Pio Paschini” pe storie de Glesie in Friûl.

[AMBIENT]

Dai 28 ai 29 di Setembar, te vile francese di Argentière-la-Bessée, al vegnarà organizât il III ’seminari tematic dal progjet Dynalp2, dedicât a la cuistion: “Localitâts pal ski: valutazion ambientâl e diviersificazion”. L’apontament al è proponût de Rêt di Comuns “Aleance tes Alps”.

[MOSTRIS]

E je dedicade a Aldo Beltrame, la mostre che Antonio Giusa e à intitolât “La vore e il pinsîr fotografic” e ch’e restarà vierte fintremai ai 23 di Setembar li de Cort Europe di Spilimberc. Beltrame (1932) al è stât un component dal Grop furlan par une fotografie gnove, po al à fat San Martin e si è inlidrisât tai Abruçs. A son innomenâts i siei grafits li da l’Universitât romane “La Sapienza”.