[NAZIONS]

“Indigenous Rights and United Nations Standards: Self-Determination, Culture and Land”, chest volum di Alexandra Xanthaki (Cambridge University Press, 2007) al propon un scandai sun cemût che il derit internazionâl al fronte la cuistion dai popui indigjins e trop necessari ch’al sarès metilu in zornade.

[MOSTRIS]

Fintremai ai 25 di Jugn, li dal Museu dal teritori di San Denêl si pues visitâ la mostre fotografiche “Gulu, Uganda” di Mauro Fermariello. Le à organizade il circul fotografic de vile colinâr “E. Battigelli”. I oraris a son: vinars, 18-20; sabide e domenie 10.30-12.30 / 16.30-20.

[ECONOMIE]

Al è in linie il lûc internet de Propietât coletive di Pesariis, rinovât e insiorât.

[CINE]

Al è disponibil su la rêt des rêts il program complet de rassegne di cine a la bielestele, programade dai 10 di Jugn a la metât dal mês di Avost tai comuns di Glemone e di Trasaghis. La rassegne e je inmaneade da la “Cineteche dal Friûl”. Ducj i spetacui a tacaran a lis 21.30 fin Lui; tal mês di Avost, 15-30 minûts prin.

[MOSTRIS]

La mostre “Spacal, dall’identità al segno”, cu la colezion dai “Colonos” di Vilecjace des oparis grafichis dal artist sloven Luîs Spacal (Triest, 1907-2000), e restarà vierte fintremai ai 15 di Avost, li de glesie di San Laurinç a San Vît dal Tiliment. I oraris a saran: di joibe a domenie, 10-12.30 / 16-20. Par prenotazions: 0434 833295.

[MUSICHE]

Il gnûf cd di Aldo Rossi “Furlan”, dai 11 di Jugn, si pues scoltâlu tal lûc www.myspace.com/aldorossi. Daspò di une prime presentazion su radio Onde furlane, cheste setemane al sarà transmetût di “Radio Triest” ai 12 di Jugn a lis 14.30 e miercus ai 13 di Jugn par radio Spazio 103.

[ECONOMIE]

Martars ai 12 di Jugn, la Regjon e organize a Munic une convigne su i “Gnûfs prodots feroviaris e maritims par servî i trafics dal Orient dal marcjât bavarês”, te suage de rassegne internazionâl “Transport Logistic”. La convigne e vegnarà fate li de Hall A5 dal comprensori fieristic di Munic.

[LIBRIS]

Ai 12 di Jugn di 80 agn indaûr l’editôr Arturo Borsetti al nunziave la gnove edizion dal “Vocabolario friulano” di Jacopo Pirona (publicât pe prime volte tal 1871). L’edizion partide a dispensis tal 1927 e finide tal 1931 e fo curade di Giulio Andrea Pirona, di Ercole Carletti e di Giovanni Battista Corgnali.

[AMBIENT]

Al à vierzût l’ufici di Tumieç de Consulte di bacin dal alt Tiliment pal Progjet Warema. Al è logât li de Direzion regjonâl de montagne, in strade da la Vitorie 15/d. I oraris a son: lunis, 9-12; joibe, 14-17. Telefon: 0433 44955 - 0433 44933.

[DIASPORE]

Il Fogolâr di Turin al è daûr a organizâsi pal Istât. Ai 24 di Jugn al fasarà la gite sociâl a Usseaux e li dal lâc di Laux (prenotazions dentri dai 14 dal mês). Dai 30 di Lui ai 31 di Avost la sede e restarà sierade; vinars ai 10 di Avost i socis a son invidâts pal incuintri di “Ferragosto” a Dieç in Cjargne cu la visite a la mostre da l’Apocalissi (prenotazions dentri dai 30 di Lui).