[GLESIE FURLANE]

Sabide ai 9 di Jugn, la Glesie gurizane e celebre la samblee diocesane dai catechiscj. La convigne e je stabilide a lis 15 li dal auditorium Fogar di Gurize. E vegnarà frontade la cuistion: “Dutrine, afetivitât, educazion a la sperance”.

[GLESIE FURLANE]

Ai 9 e ai 16 di Jugn a colin i ultins 2 apontaments dal prin cicli di lezions dal cors sul cristianisim in Aquilee e in Friûl, par cure de Biblioteche dal ’seminari di Udin, dal InStitût di siencis religjosis e dal Ufici scuele diocesan di Udin. Lis lezions a van des 15 a lis 18, li de Biblioteche in viâl Ongjarie. Il secont cicli al partissarà tal mês di Otubar (ai 6 e ai 20 e po ai 3 e ai 17 di Novembar).

[ECONOMIE]

Ai 9, ai 16 e ai 23 di Jugn, lis Buteghis dal mont di Udin, di Tumieç e di Spilimberc a organizin 3 degustazions di prodots dal cumierç just e solidâl, in convigne cun “Slow food” dal Friûl. Ju apontaments a tacaran a lis 18, li de sede udinese in borc di Trep.

[TEATRI]

La companie teatrâl “I filandieri” di Tumieç, sabide ai 9 di Jugn, e presente a Comeliàns il spetacul conciert “Dietro ogni scemo c’è un confine”. L’apontament al è a lis 20.45 li de sale “L’Alpina”. L’opare e presente tescj di Leonardo Zanier e di Giorgio Ferigo e musichis di Fabrizio De Andrè.

[GLESIE FURLANE]

Dai 14 ai 20 di Lui, la sezion gurizane dal “Unitalsi” e organize il piligrinaç diocesan a Lourdes, guidât dal arcivescul Dino De Antoni. Lis inscrizions a vegnaran acetadis fint ai 21 di Jugn. Vie pal 2007, l’“Unitalsi” dal Friûl orientâl al organizarà ancje piligrinaçs a Lorêt (28 di Lui-I di Avost) e a Fatime (apontament regjonâl cul tren; 17-25 e 20-24 di Otubar).

[MOSTRIS]

Li de glesie di San Laurinç, a San Vît dal Tiliment, domenie ai 10 di Jugn si scree la mostre “Dall’identità al segno”, cu l’opare grafiche dal artist Luîs Spacal tignude cont te colezion “Ai Colonos” di Vilecjace di Listize. La ceremonie e je stabilide a lis 11, in colaborazion cul Museu Spacal di Stanjel (sul Cjars), te suage des manifestazions pal centenari dal grafic sloven.

[DIASPORE]

I furlans dal Agro Pontino, ma ancje chei di Rome e dal Lazi, si dan dongje domenie ai 10 di Jugn pe XXVII edizion de “Fragolata” tal parc dal Circeo, inmaneade dal Fogolâr di Latine. A misdì e sarà cjantade messe, po si gustarà in companie.

[CULTURE]

La Filologjiche furlane, domenie ai 10 di Jugn, e propon la sô “Frae de Vierte” a Paulâr. L’apontament al tache a lis 9.30 li dal parc dai Salets cu la filarmoniche “Nascimbeni”. Intant de zornade, esibizions corâls, premiazions, discors dai sorestants e visitis turistichis. A lis 17.30 e sarà cjantade messe li de glesie di San Vît.

[POLITICHE]

In 36 oris, i partesans de riunificazion di Plodn/Sapade cul Friûl a an rivât adore di tirâ sù dutis lis firmis necessariis par domandâi al consei comunâl de vile todescje su lis Alps cjargnelis l’organizazion dal referemdum popolâr pal mudament di Regjon. Sapade e je stade dividude ministrativementri dal Friûl tal 1852.

[POLITICHE]

Ancje l’associazion sportive “Camosci” di Plodn/Sapade e fronte la cuistion dal mudament di Regjon. Tal so lûc internet al è in linie un scandai dulà che si pues fâ une sielte virtuâl fra Venit e Friûl. Pal 79% di chei ch’a an firmât (cuintri dal 21%), la riunificazion ministrative cu la Patrie e je necessarie.