[MOSTRIS]

Dai 5 ai 8 di Jugn, li de Galarie d’arte contemporanie di Monfalcon, a saran in mostre i lavôrs finâi dal progjet speciâl “MusicaArteTeatro+Scienza”, par cure di “Teatro&Scuola”. L’ativitât didatiche proponude dal Ent teatrâl e à impegnât 300 arlêfs des scuelis primariis “Duca d’Aosta” e “Cesare Battisti” di Monfalcon.

[LIBRIS]

Miercus ai 6 di Jugn, li de Biblioteche di Tumieç, la clape culturâl “0432 théâtre numérique” e propon une convigne di narazion a lis 17, intitolade “Se il tempo nasce dal temporale”. Par informazions e prenotazions: 0433 487950.

[MUSICHE]

Lis scuelis dal Cjanâl di Guart a sierin l’anade cuntune rassegne corâl, miercus ai 6 di Jugn. Il conciert al tache a lis 20.30 tai ambients di Fuina, tal comun di Prât.

[CONCORS]

E je partide la V edizion dal concors di Manià “Lama e trama” par contis zalis e neris inspiradis a lamis e curtìs. Lis oparis a varan di jessi consegnadis dentri dai 14 di Setembar. Il regolament al è disponibil su la rêt.

[CONCORS]

I students universitaris furlans e venits a puedin cjapâ part dentri dai 30 di Jugn al premi “Monica Casonato” pal miôr studi su lis culturis locâls des provinciis di Pordenon, di Trevîs e di Vignesie. La direzion dal premi e je li de Biblioteche comunâl di Danon, tal Friûl concuardiês sot di Vignesie.

[MOSTRIS]

La Beneska galerija di San Pieri dai Sclavons/Speter e propon la mostre des inlustrazions di Alessandra D’Este pe flabe di mons. Ivan Trinko “Boter petelin”. La rassegne e je stade screade ai 17 di Mai e si pues visitâle ducj i dîs des 16 a lis 18, gjavâts i dîs di fieste e la sabide. Finide l’esposizion in Sclavanie, la mostre e larà in Portugal.

[SCUELE]

La direzion didatiche di Aquilee, di Sant Zorç di Noiâr e di Tisane e l’Institût comprensîf di Palaçûl a an inmaneât il spetacul: “Incuintri dai fruts dal Friûl. Peraulis, cjants, bai da nestre tiere”. L’apontament al è miercus ai 6 di Jugn a lis 10, li de sale Romane di Aquilee. Il program al proferissarà “Il zîr dal mont a pît? Basta decidi” (scuele primarie di Tierç); “Cjantin e balin insiemi” (scuelis primariis di San Zorç e di Muçane); “Conte furlane” (scuele primarie di Porpêt) e “Musical Furlan” (scuele pe infanzie di Perteade).

[CONVIGNIS]

Al sarà dedicât a la citât e al mût di stabilî valôrs e regulis par fâle cressi in cualitât il XXVII ’seminari su lis professionalitâts gnovis ch’al organize a Pordenon l’Institût regjonâl di studis europeus, ai 7 e ai 8 di Jugn. La convigne e sarà proponude li de Cjase Zanussi in vie Concordia 7 cun relazions, esperiencis e dibatiments.

[LIBRIS]

L’omaç di Sacîl a Syria Poletti (www.friul.net/dizionario_biografico.php) al tire adilunc cu la presentazion de prime traduzion par talian di 3 oparis de grande scritore argjentine di divignince furlane. Il Comun di Sacîl al à curât l’edizion des contis par fruts “Le marionette di Ninin” e “Un fidanzato per Inambù”, ch’a vegnin presentadis ai 7 di Jugn, e la ricolte di contis “La linea del fuoco”, ch’e saltarà fûr ai 9 di Jugn, a lis 18 li de glesie di San Grivôr, dulà che fintremai ai 10 di Jugn e je imbastide ancje une mostre documentarie. Par informazions: 0434 734822.

[CONVIGNIS]

Il comun di Tavagnà vie pal mês di Jugn al propon dôs convignis cun Renato Iacumin, li de gleseute di Sant Lenart a Cjavalì. Joibe ai 7 di Jugn, il studiât acuileiês al cjacararà su “I mosaics di Aquilee - Aule Nord”; joibe ai 14 di Jugn al presentarà i mosaics de aule sud. Lis lezions a tachin a lis 20.30.