[MOSTRIS]

E sarà intitolade “Carnia: landscapes of beauty. L’inmagante nature de regjon cjargnele dal Friûl” la mostre fotografiche di Ulderica Da Pozzo, imbastide li dai uficis regjonâi di Brussel dai 4 di Jugn ai 7 di Otubar. La scree e je stabilide a misdì di lunis.

[TEATRI]

Il Friûl si è impensât di Nico Pepe tal C innovâl de sô nassion. Mediant de Academie civiche di art dramatiche ch’e puarte il son non, il Comun e la Provincie di Udin e la Regjon a an imbastît une taule taronde il I di Jugn, une zornade di studi e un spetacul teatrâl ai 4 di Jugn. Pepe (1907-1987) al è stât un grant atôr, un regjissêr e un partesan convint dal “Teatri stabil furlan”. Par passe 20 agn al à lavorât tal “Piccolo teatro” di Milan cun Giorgio Strehler. Po al à direzût i teatris stabii di Turin e di Palermo.

[ECONOMIE]

Tal grim de Associazion regjonâl dai arlevadôrs al è nassût il “Grop dai arlevadôrs vuardians” cul fin di arlevâ cualitâts di nemâi d’interès storic, ch’a periculin di disparî. In gracie so, tal Plan di svilup rurâl 2007-2013, e je jentrade une “misure specifiche di aiût” in chest setôr fondamentâl pe protezion da la biodiviersitât.

[AMBIENT]

L’edizion 2007 de manifestazion “Fûcs su lis Alps” e sarà organizade par sburtâ i sorestants europeus a dirotâ daurman su lis feradis il transpuart des marcjanziis. L’apontament al sarà te gnot fra i 11 e i 12 di Avost su lis monts di dut l’arc alpin.

[ECONOMIE]

La “Federconsumadôrs” dal Friûl e di Triest e à vierzût a Palme il “Sportel turistic regjonâl” par ufriûr informazion, consulence e assistence par ducj i citadins di passaç o residents in cont di cuistions ch’a rivuardin il setôr turistic. I uficis a son in Borc Aquilee 3/B. Un avocat al è presint martars e joibe des 17 a lis 18. Il numar de secretarie telefoniche 24/24h al è: 0432 935548.

[NAZIONS]

Si pues consultâlu ancje su la rêt des rêts il manuâl pai slovens ch’a vuelin tornâ a vê il non di famee origjinâl, bandonant chel talianizât par colpe dai nazionalisims e dal fassisim. L’opare e je stade curade de “Skgz”, l’Union culturâl economiche slovene.

[CINE]

La Cineteche dal Friûl e à prontât un dvd gnûf cui doi “reportage” di Gloria De Antoni “I sentieri della gloria - In viaggio con Mario Monicelli sui luoghi della Grande Guerra” e “Ritorno al Tagliamento - Con Franco Interlenghi e Antonella Lualdi sui luoghi di Addio alle armi di Hemingway”.

[ART]

Fintemai ai 24 di Jugn, li de galarie “Mesta” di Lubiane (in Mestni trg 5) e je vierte la mostre cu lis oparis dal concors “Okno v svet” e cun altris oparis compradis de societât gurizane “KB1909”.

[ECONOMIE]

I ricercjadôrs dal Dipartiment di Siencis agrariis e ambientâls da l’Universitât furlane a son daûr a prontâ un lûc internet par ufrîur ai agricultôrs lis schedis tecnichis su lis varietâts di pomârs nostrans. Lis informazions a saran metudis in zornade an par an par orientâ cemût movisi fra vieris cualitâts e novitâts genetichis.

[INFORMAZION]

L’editôr anglês “Multilingual Matters”, specializât in cuistions lenghistichis, al à dât fûr il volum “Minority Language Media: Concepts, Critiques and Case Studies”, par cure di Mike Cormack e di Niamh Houri. Il libri al proferìs i studis di 14 specialiscj sui “media minoritaris”.