[MOSTRIS]

In plui di chê di San Vît dal Tiliment, pal centenari de nassion di Loize Spacal a son stadis imbastidis altris 12 mostris sparniçadis pe Slovenie. Cinc a son a Kranj (pituris e sculturis fintremai ai 30 di Lui; e oparis su cjarte fint ai 31 di Avost), 2 a Cjaodistrie (“Spacal e l’Istrie”, fint ai 31 di Avost; e “Oparis”, fintremai ai 15 di Setembar); a Piran (mosaics e damascs, fint ai 31 di Avost); a Portorose (aredament navâl, fint ai 31 di Avost); a Stanjel (oparis grafichis, fint ai 15 di Decembar) e a Lubiane (l’artist e la machine fotografiche, fint ai 12 di Avost).

[MOSTRIS]

Fintremai ai 14 di Otubar, a Matera e je imbastide une grande mostre antologjiche dedicade a Mirko Basaldella (Udin 1910-Cambridge 1969). Giuseppe Appella e Isabella Reale le an curade in dôs sedis: li dal Museu de sculture contemporanie e li des glesiis “rupestri di Madonna delle Virtù e SanNicola dei Greci”. Visitis ducj i dîs, 10-20.

[LIBRIS]

«Ci spiace comunicare che il volume “Acquerelli friulani” che gentilmente avete pensato di donarci, non è adatto alle nostre raccolte. La preghiamo quindi di farlo ritirare entro un mese…»: cussì il Servizi bibliotecari dal Comun di Triest i à rispuindût al editôr “La Nuova Base” di Udin che i veve regalât a la Biblioteche civiche de citât juliane l’opare postume di Nadia Pauluzzo, curade di Gianfranco D’Aronco. Il fat al è comentât cun marum di Vittorio Zanon su “La Panarie”, cuinçât cuntune precisazion rivade di Triest, dopo che “La Nuova Base”, scaturide, e veve domandât un sclariment: «È prassi della mggiori biblioteche – a precisin i funzionaris de “Civiche” triestine – accogliere solo quelle pubblicazioni che sono coerenti con l’impostazione delle raccolte per conservare alle stesse, fisionomia precisa».

[ECONOMIE]

Miercus ai 27 di Jugn, il progjet Equal Solaris al propon un “Workshop” li dal Ires di vie Pradaman 4/A a Udin. A lis 14 al tacarà il confront su “L’imprese sociâl: oportunitât di autolavôr par personis disavantazadis”.

[TEATRI]

Dai 27 di Jugn ai 27 di Avost e torne la rassegne “Il Teatro: c’era una volta” par fruts e par fameis. Le organize tal Friûl ocidentâl “Ortoteatro”, proponint 9 spetacui a Pordenon e apontaments a Andreis, Barcis, Cjanive, Cimolais e Montreâl. Par informazions: 0434 961052 e 348 3009028.

[POLITICHE]

Ai 29 di Jugn Starançan al fâs fieste. Tal C innovâl de autonomie comunâl, otignude ai 5 di Decembar dal 1907 in gracie dal deputât dal partît catolic popolâr furlan Josef Bugatto (www.friul.net/dizinario_biografico.php), e je stade tornade a meti in vore la fieste civîl dai sants protetôrs Pieri e Pauli. Starançan, comun autonim dal 1850, al veve pierdude la sô autonomie zaromai tal 1867, cuant ch’al jere stât passât sot di Monfalcon, par contentâ la brame dai bacans locâi.

[INFORMAZION]

Al saltarà fûr in curt il secont numar dal mensîl bilengâl talian-chinês “Il Nostro giornale”, nassût par cure de clape “Forum Iulii”, ch’e opere par slargjâ pal mont la culture dal Friûl e di Triest, e dal editôr Penta Graph. Il fin dal sfuei, direzût di Alsessandro Di Giusto, al è chel di favorî l’integrazion fra comunitât chinese e furlans.

[CINE]

A van indevant par dut il mês di Lui e di Avost, lis “Visions sunorosis” inmaneadis di “Cinemazero” di Pordenon. Joibe 28, l’ultin apontament dal mês di Jugn, li dal centri studi cu l’Orchestra a plettro sanvitese e “Le canzoni di Totò” a lis 21.30.

[MUSICHE]

Il Conservatori triestin “Tartini” al à metût sù, fra i cors superiôrs sperimentâi di prin e di secont nivel, une Scuele di biblioteconomie e di bibliografie musicâl, coordenade dal professôr Paolo Da Col.

[MUSICHE]

“Dramsam”, dai 28 di Jugn ai 13 di Setembar, al propon la rassegne internazionâl “Musica Cortese”, tocjant 16 localitâts storichis dal Friûl cun 22 concierts.