[CONCORS]

Trê poesiis ineditis par furlan o par talian: al varà di presentâlis li dal municipi di San Micjêl dentri dai 31 di Lui cui ch’al vûl cjapâ part al II concors “Nelso Tracanelli”, ch’al onore il grant furlan concuardiês, scritôr e partesan de riunificazion dal Mandament di Puart cu la Patrie, muart tal 2002 (www.friul.net/dizionario_biografico.php). Lis premiazions a saran fatis ai 7 di Otubar. Par informazions: 0431 50020.

[MUSICHE]

Lunis ai 25 di Jugn, l’associazion “XX secolo” di Prate e organize la presentazion dal cd di Mario Duella incidût cul organo de glesie parochiâl di Ghiran.

[CORS]

A la fin dal mês di Jugn al tache il cors avanzât di anglês par cure dal Centri pes convignis Palaç des professions di Udin. A saran organizadis 20 oris di lezions par piçulis clas di arlêfs, ogni martars e joibe, des 17.30 a lis 19.

[SALÛT]

Lis associazions dai Clubs dai alcoliscj in tratament e dai amîs de polizie stradâl e la clape europeane des vitimis da lis stradis ur an mandât une letare a dutis lis ministrazions comunâls e provinciâls d’Italie par proponi il spieli dal Comun di Rovereto (Trent), che par promovi la culture de salût e de sigurece, al à decidût di no patrocinâ plui manifestazions ch’a publicizin bevandis alcolichis e d’improibî tes sagris la vendite di alcolics a presit plui bas di chel dai ambients publics. Cun di plui, a saran prudeladis cun finanziaments plui alts lis manifestazions ch’a vendin bevandis cun basse gradazion o ch’a proviodin spazis pe prevenzion dal consum di sostancis.

[CULTURE]

Il grant “reporter” polonês Ryszard Kapuscinski al varès vût gole di stabilîsi a Udin cu la sô femine, ma la muart (ai 24 di Genâr) e à sfantât il so insium. Lu à pandût Laura Delsere tal speciâl che il cuotidian “Avvenire” i à dedicât al zornalist e scritôr, voltât par talian te golane “oltre” su lis letaris da l’Europe orientâl, par cure dal editôr furlan “Forum”.

[MOSTRIS]

E restarà vierte fintremai ai 14 di Otubar, la mostre che Glemone i dediche al so paisan architet, Raimondo D’Aronco. E je imbastide li di palaç Elti in vie Bini e s’intitole “L’inquieto ingegno. Architetto da Gemona alle porte dell’Oriente”. Oraris: sabide, domenie e dîs di fieste, 9.30-12.30 / 15-19; fintremai ai 19 di Avost ancje di martars fin vinars, 16-18.

[CULTURE]

Mafalcon, Duin, Çarvignan, Gurize e Aquilee a son lis vilis dulà che “Onde Mediterranee” 2007 e propon i siei apontaments, dai 26 di Jugn ai 14 di Lui.

[SPORT]

I campions dal alpinisim furlan Nives Meroi e Romano Benet di Fusinis, tal lôr lûc internet, a contin par fîl e par pont lis lôr grandis impresis. Un dongjelaltri a son lâts sù su 10 da lis 14 pichis imalaianis ch’a passin i 8 mil metris. L’ultime lôr scjalade e je stade chê dal Everest, tal mês di Mai.

[AMBIENT]

Dai 26 ai 28 di Jugn, la “Goletta verde” di “Legambiente” e je in Friûl. A Marina Lepanto di Mafalcon e propon lis sôs ativitâts di sensibilizazion su la protezion de marine. In gracie de colaborazion dal circul “Greeen Gang”, miercus ai 27 di Jugn a lis 11 a saran presentâts i dâts sul incuinament regjonâl; a lis 18 dibatiment su l’energjie; a lis 21 conciert cul grop “Prognosi Riservata”. Joibe ai 28 di Jugn, des 9.30 visite al implant pal tratament dai savalons gjavâts dai cjanâi de lagune e al sît d’impuartance comunitarie.

[SCUELE]

Dentri dai 4 di Lui a an di rivâ in municipi a Tavagnà lis domandis di amission pa la III borse di studi in memorie di Egidio Feruglio. A son ametûts candidâts sot dai 35 agn, indotorâts li de Universitât furlane o ch’a spietin di discori la lôr tese. A prudelin l’iniziative l’Universitât de Patagonie e il Museu paleontologjic “Egidio Feruglio” di Trelew (Argjentine).