[SOCIETÂT]

Intant de samblee dal volontariât regjonâl, celebrade a Gurize sabide ai 23 di Jugn, al è stât rinovât il consei regjonâl dal volontariât. I 7 puartevôs des clapis, dal 2007 al 2010, a saran: Sergio Silvestre (Pordenon), Claudio Bortolotti e Antonio Maresca (Udin), Giuseppe Franco Livot (Gurize), Claudio Sangoi (Tumieç), Ahamed Faghielmi e Alda Paoletti (Triest). La prime riunion dal gnûf argagn e je stabilide pai 17 di Setembar. La samblee di Gurize e à rinovât ancje il comitât pe gjestion dal font speciâl. A son stâts votâts: Carlo Del Vecchio (Udin), Franco Trevisan (Pordenon), Aldo Furlan (Gurize) e Gianni Ferin (Triest).

[TEATRI]

E je tacade la rassegne itinerante “Burattini senza Confini 2007”. Il spetacul “Storie di lupi” di Alberto De Bastiani e di Giovanni Trimeri, cui purcinei di Michele Callegher e di Jimmi Davies, al vegnarà proponût domenie ai 24 di Jugn, li dal museu des carocis di San Martin di Codroip a lis 18.

[MUSICHE]

La bande dal cjanâl di guart e fiesteze 25 agn di musiche. Sabide ai 23 di Jugn, a lis 17 li dal centri sociâl di Davâr, a saran presentâts il libri “Note di un quarto” e il dvd “Ce banda!”. Lis fiestis a culminaran domenie ai 24 di Jugn a Luvinciis. A lis 10.30, lis bandis “Val di Gorto” e “Città di Cormòns” si dan dongje par une sfilade ator pal paîs.

[TEATRI]

Dai 24 ai 30 di Jugn, l’Academie di art dramatiche “Nico Pepe” di Udin e je invidade a Varsavie pal IV Festival internazionâl des scuelis di teatri. Di chê strade, e presentarà in concors l’opare “Don Giovanni e i sogni delle donne”.

[ART]

La Pro loco di Ravasclêt, domenie ai 24 di Jugn, e organize la V edizion di “Forme e Fiori”. Chest an, la manifestazion dedicade a l’art di esponi lis rosis e sarà in forme di laboratori di composizion floreâl, cu la partecipazion di Dina Pelizzotti e di Alba Dereani da l’Universitât pe tierce etât cjargnele. L’apontament al è a lis 16, te place di Zuviel.

[SPORT]

La piche cjargnele dal Çoncolan e torne sui titui dai sfueis talians, ma no par cualchi imprese sportive. I suspiets sul “doping” tal mont dal ciclisim a rivuardin ancje 4 campions che intant de tape dal “Gîr d’Italie” dai 30 di Mai a vevin discjadenât passion e batimans. I esams clinics su Di Luca, Simoni, Riccò e Mazzoleni fats in chê dì a an plaesât un profil ormonâl simil a di chel di un frut. Par chel, il president dal “Coni”, Gianni Petrucci, i à scrit al president de Union ciclistiche internazionâl, Pat McQuaid, domandant sclariments su la credibilitât e sui criteris dai esams. «L’opinion publiche – al à scrit Petrucci – e à la sensazion, palesade ancje dai media, che i atletiscj a gjestissin in mût “sientific” lis sôs prestazions, cul fin di puartâ i nivei fisiologjics ch’a risultin dai controi cuintri dal “doping” fint sul or dai limits permetûts».

[CULTURE]

Il grop dai custums tradizionâi bisiacs di Turiac, domenie ai 24 di Jugn, al organize une visite guidade a Zagabrie. La partence pe capitâl crauate e je stabilide a lis 6. Par informazions: 347 4612447.

[NAZIONS]

Dai 24 di Jugn ai 15 di Lui, a Turin, Dronero, Villar Pellice, Roccasparvera, Cuneo e Argentera, il Centri etnografic lenghistic, Folkclub e “Espaci occitan” a proponin “Occitanica 2007”, rassegne internazionâl di musiche e di culture ocitane e mondiâl.

[AMBIENT]

“Tav in Friûl: opare grande, benefici piçul” al è il titul de convigne programade lunis ai 25 di Jugn a Codroip, li de biblioteche a lis 20. Le organize il grop “GeOgraphia e su la cuistion si confrontin Rudy Fumolo e Andrea Wehrenfennig.

[LIBRIS]

Renzo Balzan al à publicât un libri gnûf. Par cure dal editôr Chiandetti di Reane e di “Ladins dal Friûl” e je stade stampade la ricolte di saçs “Usancis e cronichis de Patrie dal Friûl”. In passe 158 pagjinis, a son proferîts 51 bocons. Dean de Union scritôrs furlans, Renzo Balzan al è zornalist dal 1983. Dal 1999 al insegne lenghe e leteradure ladine a Tumieç, li de Universitât pe tierce etât.