[AMBIENT]

Cundut che la Provincie di Trent e à stabilît d’improibî la realizazion d’implants a biomassis tai Comuns là ch’al rive il gâs, parcè ch’a son mancul economics e plui incuinants, stant il cost dai transpuarts des biomassis e la necessitât d’incressi il trafic pesant, la Comunitât montane de Cjargne e à decidût di realizâ un grant implant di cheste fate propit a Darte dulà che si spiete in curt il metan. Par chel al è nassût il comitât “Viva la Carnia” ch’al smire di fermâ une spese publiche di 10 milions di euros par un implant ritignût “inutil”. Lis obiezions dal comitât a son stadis spedidis al sindic di Darte Marlino Peresson, al president de Regjon, Riccardo Illy, e ai assessôrs Enrico Bertossi e Gianfranco Moretton.

[CONCORS]

Ancje chest an il Cumon di Glemone al organize il premi “Glemone îr, vuê e doman” par contis, romançs o traduzions par fruts; lavôrs di didatiche dal furlan; e par ricercjis di fruts des scuelis elementârs e mezanis. La consegne des oparis e varà di jessi fate dentri dai 25 di Otubar, li dal municipi. Par informazions: 0432 973246 (ufici lenghe furlane) o 0432 973243 (ufici proveditorât).

[NAZIONS]

I slovens pal mont a an un lûc internet dulà ch’a son notadis lis comunitâts fûr de patrie e lis scuelis là che si pues imparâ la lenghe slovene. Destinataris dal servizi, sore il dut, ju insegnants e i gjenitôrs.

[LIBRIS]

L’editôr “Franco Angeli” al è daûr a stampâ il volum “Educazione linguistica democratica. A trent’anni dalle Dieci tesi”, par cure dal “Giscel” (Gruppo di intervento e di studio nel campo dell’educazione linguistica). Tes librariis su lu cjatarà da la fin dal mês di Jugn.

[DIASPORE]

La clape “Furlans di Baviere”, nassude par “cjapâ te rêt” la comunitât furlane di Munic e de regjon todescje e je daûr a svilupâ il so cjanâl di comunicazion “FriûlTv”. Il coordenadôr Luche Melchior, ch’al lavore li de Universitât bavarese, al propon ancje leturis di classics de leteradure furlane, come “Lis letaris ai furlans” di pre’ Josef Marchet.

[CINE]

Comuns, borcs e clapis a colaborin cul Centri espressions cinematografichis par puartâ il cine tes placis dal Friûl. La rassegne a la biele stele, tacade a Glemone, e tire adilunc a San Zuan di Manzan dai 18 di Jugn par 10 lunis e a Pavie dai 19 di Jugn. A saran tocjâts 41 paîs. Il calendari complet al sarà su la rêt des rêts.

[DIASPORE]

Dai 20 ai 24 di Jugn, Udin al ospite il “Festival des culturis migrantis” inmaneât de Associazion regjonâl lavoradôrs emigrâts “Alef”. A saran presentâts cines, libris, spetacui, concierts, convignis. A saran frontâts in specialitât i câs da l’Albanie, dal Sudafriche e da l’Etiopie. L’Universitât e à garantît il so patrocini.

[ECONOMIE]

“Legacoop Fvg”, miercus ai 20 di Jugn, e organize la samblee des cooperativis. Prin des operazions statutariis a saludaran il sindic di Udin Sergio Cecotti e l’assessôr regjonâl Enrico Bertossi. Il president regjonâl di “Legacoop”, Renzo Marinig, al fasarà une relazion. Lis conclusions lis proponarà Giorgio Bertinelli sotpresident talian. La convigne e tacarà a lis 16.30, in vie Cernazai 8 a Udin.

[SOCIETÂT]

Miercus ai 20 di Jugn, il Comun di san Denêl al presente il gnûf Plan citadin dal trafic. Il document al sarà inlustrât a lis 20.30 li de scuele elementâr là che dute la int dal paîs e je invidade.

[TEATRI]

La clape culturâl “0432 théâtre numérique” di Basilian e organize percors di narazion, laboratoris teatrâi, laboratoris creatîfs e spetacui di teatri di strade su la cuistion des scovacis e dal lôr riciclament. Dutis lis propuestis a son tal lûc internet www.associazione0432.it.