[SOCIETÂT]

“Lassaitnus insumiâsi… un mont plui bon!”: al è il titul de setemane di musiche, di sport e di solidaritât imbastide li de Cjase de Inmacolade di pre’ Milio De Roja di Udin, dai 5 ai 12 di Jugn. Martars 7, a lis 21, intervent di fra’ Alex Zanotelli. Il program complet al è su la rêt des rêts.

[CULTURE]

La “Frae de Vierte” 2005 de Filologjiche e ven organizade a San Micjêl domenie ai 5 di Jugn, par compagnâ e incorazî la strasordenarie seson dai referendums popolârs pal passaç di Regjon dal Venit al Friûl, ch’a interessin dut il mandament di Puart.

[INFORMAZION]

I programs radiotelevisîfs produsûts in Sud Tirol par todesc e par ladin a saran transmetûts ancje in Provincie di Trent. E je un’iniziative stabilide dai Conseis e des Zontis provinciâls e regjonâls dal Trentin-Sud Tirol. Timp o tart, in Trentin si podarà ancje cjalâ i programs di altris emitentis mondiâls e todescjis (di Austrie, di Gjermanie e de Svuizare todescje). Il conseîr Luigi Chiocchetti de “Union autonomiste ladine”, pandint la sô sodisfazion, al à bramât che dutis lis instituzions sensibils ai problems des comunitâts lenghistichis a seguissin daurman chest biel spieli.

[CORS]

Dal mês di Jugn al mês di Decembar, l’associazion “Le Arti Tessili” di Montreâl e organize i “Laboratori Filò”. Par informazions e inscrizions si pues contatâ la biblioteche comunâl (0427 79179).

[SCUELE]

“Alform”: une rêt regjonâl pe ricercje e l’inovazion. Il progjet realizât de Universitât dal Friûl e di chê di Triest cu la contribuzion de Regjon al ven presentât lunis ai 6 di Jugn, a lis 14.30 a Udin. La convigne si le fasarà li dal palaç de Universitât furlane in vie Petracco.

[SALÛT]

Lunis ai 6 di Jugn, si fasarà a Tumieç il IV Forum de salût mentâl in Friûl e a Triest. La convigne e tacarà a lis 14, li de Comunitât montane cjargnele. La samblee e smire di popolarizâ la «dissociazion fra pratichis e enunciazions teorichis, tra risorsis e percors positîfs di cure».

[TEATRI]

Il cabarat par sloven dal “Teater 55” di Lubiane, lunis ai 6 di Jugn, al è su la sene a Gurize, li dal “Kulturni Dom”. Il spetacul al comence a lis 20.30.

[MUSICHE]

La rassegne di Paulêt “Incontri musicali & giovani talenti”, lunis ai 6 di Jugn, e presente un conciert dal cuartet di trombons “Venice Slide Quartet”. Il spetacul, organizât de associazion “Euritmia”, al tache a lis 20.45, li de Villa Domus Magna a Bielvedê di Marsuris.

[ECONOMIE]

Joibe ai 16 di Jugn, al tache il ’seminari su la progjetazion d’imprese par cure di “Montagna leader”. A vegnaran proponûts 3 modui di 4 oris lis dai uficis di vie Dante 28, a Manià. Ai 16 si discorarà di definizion dal concet d’imprese e dal concet d’impresis piçulis e mezanis; ai 17 di gjestion di un’aziende intune forme economiche e finanziarie; ai 23 di Jugn di “marketing strategjic”. Lis domandis di partecipazion a an di rivâ li de secretarie dentri dai 14 di Jugn.

[CONVIGNIS]

La convigne anuâl dal moviment “Bilanci di giustizia” chest an si fasarà in Friûl, dai 26 ai 28 di Avost. L’apontament programât a Lignan al frontarà la cuistion: “Energjie vuê e doman. Consumìn di mancul e produsìn miôr”. Lis adesions a son viertis fint ai 10 di Jugn.