[CULTURE]

La Comunitât di Acuilee e dute la Patrie, chest an, a ricuardin l’innovâl de muart di Renato Jacumin (1941-2012). Inteletuâl, om di scuele e politic, storic e poet, si è cetant messedât pe valoriazion de vile patriarcjâl e pe rinassince de Basse. In Acuilee, lu àn memoreât ai 8 di Lui Ferruccio Tassin (“L’uomo, l’intellettuale, il poeta”), Luisa Contin (“Essere di Aquileia”) e pre’ Piero Facchinetti (“Jacumin e i mosaici di Aquileia”). Jacumin al à stât un spieli di vite e di sapience spindudis a pro de Umanitât, scomençant dai plui biâts, al à dit Tassin. La sô poesie, cuntune fuarce morâl ferbinte, cul so impegn morâl e scjasse lis personis. Cun lui la lenghe furlane e rive a cjapâ a brace cuel l’Umanitât tal scori de storie e te contemporanitât.

[MOSTRIS]

Fintremai ai 28 di Avost, li dal Ospedâl dai Batûts, te strade Bellunello, la mostre “Martina, Zuccheri, Tramontin, De Rocco. Storie di pittura a San Vito” e onore la cariere artistiche dai artiscj Umberto Martina (Dardâc, 1880-Taurian, 1945), Luigi Zuccheri (Glemone, 1904-Vignesie, 1974), Virgilio Tramontin (San Vît, 1908-2002) e Federico De Rocco (Turide, 1918-San Vît, 1962) esponint 110 sôs oparis. I curadôrs Antonio Garlatti, Giancarlo Pauletto e Lodovico Tramontin a smirin di memoreâ i 60 agn de muart di De Rocco e 20 agn de muart di Virgilio Tramontin, profondint i leams artistics e umans cun Martina e Zuccheri. Oraris: sabide e domenie, 10.30-12.30 / 15.30-19.

[MOSTRIS]

Ancje la mostre “Mosaico&Mosaici” dal 2022 e je dedicade al centenari de “Scuele Mosaiciscj dal Friûl”. La rassegne des miôr oparis realizadis dai arlêfs e restarà imbastide li dai lavoratoris dal institût di Spilimberc fintremai ai 28 di Avost. Oraris: 10-12.30 / 16.30-20.

[LIBRIS]

Di chê strade di “Notturni di versi”, il festival de poesie e des arts noturnis, programât de clape “Porto dei Benandanti” dai 24 di Jugn tai Cumons di Tei, di Fossalte, di San Micjêl e di San Vît dal Tiliment, di Puart e di Udin, li des vieris presons di San Vît dal Tiliment, si pues rimirâ, fintremai ai 15 di Avost, la mostre “Libri di Versi 14”, risultât de colaborazion fra 40 poets e artiscj visîfs. Oraris: sabide e domenie, 10.30-12.30 / 15.30-19.

[POLITICHE]

«Par rivâ a la catastrofe nucleâr, a l’Umanitât i baste dome un malintindiment o un calcul falât»: cun chestis peraulis il secretari generâl des Nazions unidis, António Guterres, al à screât la convigne pe revision dal Compatât cuintri de proliferazion des armis nucleârs “Tnp”, programade a New York, fintremai ai 26 di Avost. Il “Tnp”, in vore dal 1970, al è il compatât plui ratificât e, in gracie so, si à passât des 70 mil bombis atomichis de ete de “Vuere frede” a 12 mil e 700 di cumò (ch’a costin 73 miliarts di dolars ad an pal mantigniment). Lis propuestis par miorâ la situazion a son fermis dal 2015 e la vuere de Ucraine e à moltiplicât lis preocupazions e i pericui, stant ch’al è in vore un procès di modernizazion dai vetôrs pal transpuart des armis nucleârs (F35, fusetis ipersonichis, bombis al idrogjin “B61-12”...). Il Pape, midiant di Twitter, al à visât: «L’uso di #ArmiNucleari, come pure il loro possesso, è immorale. Cercare di assicurare la stabilità e la pace attraverso un falso senso di sicurezza e un “equilibrio del terrore” conduce inevitabilmente a rapporti avvelenati tra popoli e ostacola il vero dialogo». Intant, ai 6 e ai 9 di Avost, al cole il LXXVII innovâl dai bombardaments atomics di Hiroshima e di Nagasaki.

[AMBIENT]

Joibe ai 4 di Avost, si torne a discuti sul avignî dal lât di Cjavaç. Il Comitât pe protezion des aghis dal bacin dal Tiliment e il Comitât pe protezion e pe valorizazion dal lât dai Trê Cumons a organizin a 20, te place 1 Maggio di Dalès, la convigne “La Siot, il lago”.

[AMBIENT]

Al torne a viergi il percors naturalistic dal palût Vuarbis, tal teritori dal Cumon di Cjavaç. La scree e je stabilide vinars ai 5 di Avost, a 11. L’itinerari al è servît de “Baita Palude Vuarbis”, ch’al è un dai 3 ambients gestîts de cooperative “Rete Bike Fvg - Cycletaurus”, cul “Forte Corazzato Col Badin” a Scluse e cu la “Casa del Popolo” di Prât in Cjargne.

[AMBIENT]

La Rêt dal patrimoni dal paisaç e des areis protezudis de Fondazion “Dolomiti Unesco” e à publicât il “Catalogo delle buone pratiche di conservazione attiva”. Fra lis iniziativis popolarizadis, chês furlanis a son: i progets “Piano di interventi sulla sentieristica”, “A scuola nel Parco” e “Esperienza in casera” dal “Parc naturâl Dolomitis furlanis”;l’“Albergo diffuso Valcellina e Val Vajont”, lis ativitâts dal “Consorzio delle Valli e delle Dolomiti friulane” e il proget dal Ecomuseu des aghis dal Glemonat “Adotta una mucca”. L’imprest al jentre te “Strategjie complessive di gjestion” de Fondazion.

[POLITICHE]

Ducj chei che, te Patrie, a lotin pal disarmament nucleâr, martars ai 9 di Avost – la dì dal innovâl dal bombardament atomic di Nagasaki – a son invidâts devant de “Base Usaf” di Davian pe manifestazion cuintri de menace nucleâr. La convigne e tacarà a 10, curade di “Beati i costruttori di pace”, cul jutori dal Centri pal biel acet “Balducci”, di “Pax Christi”, de Comunitât “San Martino al Campo”, de Cjase “Oasi 2” di Cordenons, di “Rete Dasi”, “Anpi” Pordenon, “Donne in nero” e “Arci Montreâl. Di chê strade, al sarà memoreât pre’ Pierluigi Di Piazza, ch’al à simpri animât l’apontament di Davian, spartint lis «sôs peraulis inluminadis e inspiradis» e il «so pinsîr profetic e atuâl».

[CONVIGNIS]

Dai 6 ai 28 di Avost, la clape di studis e di ricercjis storichis e archeologicjhis “Carnia Cultura” e propon lis convignis de XXXIII edizion dal “Agosto Archeologico”. I apontaments a colaran a Vergegnis, ai 6 e ai 9 di Avost; a Zui, ai 12 e ai 23; a Davâr, ai 17; e a Denemonç, ai 26.