[ECONOMIE]

A son viertis lis inscrizion pai 3 “Altromercato Summer Camp” che la centrâl plui impuartant dal Cumierç just e solidari talian e organize pe formazion di volontaris e operadôrs gnûfs (www.altromercato.it/altromercato-summer-camp/). Un dai 3 percors formatîfs al sarà inmaneât in Cjargne de cooperative “Bottega del Mondo”, ch’e gestìs i negozis solidaris di Codroip, di Glemone, di Spilimberc, di Tumieç e di Udin. L’edizion cjargnele e sarà programade dai 25 ai 31 di Lui, li de “Polse di Côugnes” (Zui), par zoventût dai 19 ai 26 agn, ch’a varan di dâsi in note dentri dai 30 di Jugn. Il titul dal cors al sarà: “Verso una nuova economia: il potere delle scelte”.

[CONVIGNIS]

Di chê strade di “Eirenefest”, il festival dal libri pe pâs e pe noviolence programât a Rome dai 2 ai 5 di Jugn, si cjacare ancje de talianizazion sfuarçade dai Slovens e dai Tirolês sot de ditature fassiste. Vinars ai 3 di Jugn, a 13 tal Borc di San Laurinç, si presentarà cun chel fin ancje il libri di Giorgio Giannini “La tragedia del confine orientale - L’italianizzazione degli Slavi, le foibe, l’esodo giuliano-dalmata” (“Luoghinteriori”, 2019). Giannini al è president dal “Centro Studi Difesa Civile” (www.pacedifesa.org).

[ECONOMIE]

Ancje a Puart si celebre la “Zornade mondiâl de diminuzion”. Sabide ai 4 di Jugn, il Circul “Livence-Tiliment” dal moviment pe “Legre diminuzion” al invide a 15, li dal parc di strade Valle, par un dopomisdì di zûcs, di ativitâts e di lavoratoris par cognossi il “yoga” e lis jerbis dai prâts. Si finissarà cuntune merende.

[AMBIENT]

«Costruire un nuovo impianto per produrre energia da fonti fossili vicino alle case è follia»: par pandi cheste veretât e par domandâ che la Zonte regjonâl e fermi l’implant di cogenerazion che la «Siot» e intint di realizâ daprûf de stazion di Testeons di Paluce, domenie ai 5 di Jugn, la int dal Cjanâl de Bût e protestarà a 14.30, te place di Paluce. «È ora di dire basta a queste politiche di sfruttamento – a scrivin chei dal Comitât «Tutela acque del bacino montano del Tagliamento», la zoventût di «Fridays for Future Carnia» e il Circul cjargnel di “Legambiente” – Rifiutiamo progetti lesivi per il paesaggio, la salute e la dignità delle popolazioni montane».

[MOSTRIS]

“Tiere Morus”, il museu dal taramot dal ’76, de riconstruzion e de rinassince al à tornât a viergi, a Vençon, daspò doi agns di fermade. La «Storia di un terremoto e della sua gente» e je contade li di palaç Orgnani Martina. Dal I di Jugn ai 31 di Avost, si podarà visitâlu, ogni dì di 10 a 18. Po vinars, di 14 a 18 e di sabide e di domenie, di 10 a 18.

[INFORMAZION]

«Contro la disumanità della guerra e la caccia al migrante: la viva lezione di Pierluigi Di Piazza»: chel chi al è il titul dal editoriâl dal numar dal mês di Jugn dal mensîl “Altreconomia”. Il diretôr Duccio Facchini al à decidût di dedicâlu al predi tualeot, fondatôr dal “Centri Balducci” di Çuian, muart ai 15 di Mai. L’articul al comence cun chestis peraulis: «Per tutta la vita ha denunciato la disumanità della guerra e il macabro gioco della caccia al migrante lungo le frontiere. “L’accoglienza mi attraversa – scrisse –, mi riempie tanto che mi pare di avere un cuore troppo piccolo”».

[AMBIENT]

Regjon e Cumons, s’a vuelin pardabon fermâ la matetât dai gnûfs implants par produsi energjie brusant gâs, programâts di “Siot” a Dolina, a Somplât e a Paluce, a àn un imprest juridic fondamentâl: la Convenzion europeane des Alps. Al è il mes che la manifestazion popolâr, inmaneade a Paluce ai 5 di Jugn, e à pandût a fuart. In place, Cjargnei di ducj i Cjanâi clamâts dongje dal Comitât “Tutela Acque del bacino montano del Tagliamento”, di “Fridays for Future Carnia” e di “Legambiente”.

[ECONOMIE]

A la barbe dai invîts di 85 clapis europeanis di produtôrs biologics, di ambientaliscj e di consumadôrs e di 17 organizazions talianis di chê fate, il Guvier talian al à stabilît di sospendi l’aplicazion de Politiche agricule comunitarie e di tornâ a sfrutâ 200 mil etars di campagnis, ch’a jerin pupilâts in gracie dai “Paiaments comunitaris pal inverdiment” (“greening”). Il ministri des Politichis agriculis, Stefano Patuanelli, al à firmât il decret, ch’al à za stât publicât (www.gazzettaufficiale.it/atto/serie_generale/caricaDettaglioAtto/originario?atto.dataPubblicazioneGazzetta=2022-05-31&atto.codiceRedazionale=22A03222&elenco30giorni=false). Pai oposidôrs, «No si distrighe i problems degradant ancjemò di plui il nestri ambient naturâl o aumentant la dipendence des energjiis fossilis, ma produsint e consumant la nestre mangjative in mût diferent».

[MOSTRIS]

Si varà timp fint ai 11 di Jugn par visitâ la mostre fotografiche e documentarie “I fiori del male. Donne in manicomio nel regime fascista”. Le àn imbastide Annacarla Valeriano e Costantino Di Sante li dal vieri Manicomi di San Svualt, a Udin. Oraris: di joibe a domenie, 14-18; pes visitis didatichis: lunis-vinars, 10.30-12.30 e lunis-miercus, 14-16 (daûr prenotazion).

[AMBIENT]

Joibe ai 9 di Jugn, li de “Sale Ajace” dal municipi di Udin, “Legambiente” e Cumon a organizin la convigne “Il Bosco di Udine. L’emergenza climatica e la nuova pianificazione urbana”. Lis voris a tacaran a 17.